1 Milandu 4 - Amazwi Yakwe Leza 2013

Amu mupanda wakwe Yuda

¹ Yaa ali amu mupanda wakwe Yuda yamwi yamwi: Pelezi, Heziloni, Kalimi, Huli na Syobali.

² Syobali wali a isi wakwe Leaya. Leaya wali a isi wakwe Yaati. Yaati wali a isi wakwe Aumai na Laadi, yano yali ivikolwe vya antu aikalanga ku Zola.

³ Huli wali ali mwana mukalamba pa ana yakwe Efulati, umuci wakwe Kalebu. Nga amu mupanda wakwe ayano yasokwile umusumba wa Betelemu. Huli wakweti ana aonsi yatatu. Amazina yao a Etamu, Penueli na Ezeli. Etamu wakweti ana yatatu. Amazina yao a Yezileele, Isyima na Idibasyi. Kaci wao yamutemile izina yati a Hazeleleponi

⁴ Penueli uwasokwile umusumba wa Gedoli. Ezeli nawe uwasokwile umusumba wa Husya. Yakwene yali amu mupanda wakwe Huli, iyeli lyakwe Efulata isi wakwe Betelemu.

⁵ Asyuli, uwasokwile umusumba wa Tekoa, wakweti aci yaili. Amazina yao a Hela na Naala.

⁶ Naala wamuvyalile ana aonsi yani. Amazina yao a Auzamu, Hefeli, Temeni na Haasyitali. Yakwene yali amu mupanda wakwe Naala

⁷ Asyuli na Hela yakweti ana aonsi yatatu. Amazina yao a Zeleti, Izali na Etinani.

⁸ Kozi wali a isi wakwe Anubu na Zobeba. Nupya wali icikolwe ca amu mupanda wakwe Aalieli umwana wakwe Halumu.

⁹ Kwali umuntu umwi, izina lyakwe a Yabezi, simucindikwa uwamu akazi kakwe. Nyina wamutemile izina ati a Yabezi, pamulandu wakuti wene wacuzile sana pa kupapa.

¹⁰ Lelo kwene Yabezi wapefile kuli Leza wa ina Izlaeli ati, “We Leza, ungampolelela umpeele ni mpanga ikulu. Nkukulenga uye nani, nupya uwancingilila nu ku viipe vyonsi ivingandetela ukuwaika.” Nga Leza amupeela cino walenzile.

Inko zyuze ukulingana namuno zyalondekine

¹¹ Kalebu, umwina wakwe Syua wakweti umwana umonsi. Izina lyakwe a Meili. Meili wali a isi wakwe Esyitoni.

¹² Esyitoni wakweti ana aonsi yatatu. Amazina yao a Beti Lafa, Paseya na Teinaa. Teinaa uwasokwile umusumba wa Naasyi. Amu mupanda wa antu yaa ikalanga mu Leka.

¹³ Kenazi wakweti ana aonsi yaili. Amazina yao a Otinieli na Selaya. Otinieli nawe kwene wakweti ana aonsi yaili. Amazina yao a Hatati na Meonotai.

¹⁴ Meonotai wali a isi wakwe Ofula. Selaya wali a isi wakwe Yoabu, uwasokwile icifoloma ca Ge Halasyimu. Camilwanga ukwi zina lii apamulandu wakuti aikazi yakweneko yali yafundi ya milimo ya vyakupangapanga.

¹⁵ Kalebu umwana umonsi wakwe Yefune wakweti ana aonsi yatatu. Amazina yao a Ilu, Elaa na Naamu. Elaa wali a isi wakwe Kenazi.

¹⁶ Yealeleli wakweti ana aonsi yani. Amazina yao a Zifu, Zifa, Tiliya na Asaleli.

¹⁷ Ezilaa wakweti ana aonsi yani. Amazina yao a Yeteli, Meledi, Efeli na Yaloni. Meledi watwite Bitiya, umwana umwanaci wakwe Falao. Nga yoili yakweti umwana umwanaci, Milyamu, ukwika penepo na ana aonsi yaili. Amazina yao a Syamai na Isyiba. Isyiba uwasokwile umusumba wa Esyitemoa.

¹⁸ Meledi watwite umwanaci uwamu mutundu wakwe Yuda, nga yakweti ana yatatu aonsi. Amazina yao a Yeledi, uwasokwile umusumba wa Gedoli, na Hebeli, uwasokwile umusumba wa Soko, na Yekutieli, uwasokwile umusumba wa Zanowa.

¹⁹ Hodiya watwite kaci wakwe Naami. Amu mupanda wakwe yasokwile uluko lwakwe Galimu, ulwikalanga mu musumba wa Keila, nga nu luko lwakwe Maaka, ulwikalanga mu musumba wa Esyitemoa.

²⁰ Syimoni wakweti ana aonsi yani. Amazina yao a Amunoni, Lina, Beni Hanani na Tiloni. Amu mupanda wakwe Isyi a Zoeti, nga na Beni Zoeti.

Amu mupanda wakwe Syela

²¹ Syela wali umwana wenga umonsi uwamu ana yakwe Yuda. Amu mupanda wakwe aeya: Ele, uwasokwile umusumba wa Leka. Laada, uwasokwile umusumba wa Malesya nu luko lwakwe yakapikula ya nsalu aikalanga mu musumba wa Beti Asyibea,

²² na Yokimu na antu aikalanga mu musumba wa Kozeba. Na Yoasyi na Salafu, wino watwite anaci aina Moabu nga ikala mu Betelemu. (Ivyalembwa vii, vyali ivyaku katalili.)

²³ Yali a yanakamata, aombelanga umwene. Nu kwikala yikalanga mu misumba yaku Netaimu na Gedela.

Amu mupanda wakwe Simeoni

²⁴ Simeoni wakweti ana aonsi yasano. Nemueli, Yamini, Yalibu, Zela na Syauli.

²⁵ Syauli wakweti umwana umonsi. Izina lyakwe a Syalumu. Umwizikulu wakwe wali a Mibisamu. Alino icizikulula cakwe wali a Misyima.

²⁶ Ana aonsi yakwe Misyima a Hamueli, Zakuli na Syimei.

²⁷ Syimei wakweti ana aonsi ikumi na mutanda, na ana anaci mutanda. Lelo akazi kakwe yatakweti ana avule, nga umutundu wakwe Simeoni utakuzile ndi vino umutundu wakwe Yuda wakuzile.

²⁸ Yene yikalanga ku Belisyeba, Molada, Hazali Syuali,

²⁹ Bilaa, Ezemu, Toladi,

³⁰ Betuele, Holima, Zikilagi,

³¹ Beti Malikaboti, Hazali Susimu, Beti Bili na Syaalaimu. Ikwene yali imisumba yao ukufika na lino Davidi wateekanga.

³² Ni mizi yakweyo iyazingulwike yali a Etamu, Aini, Limoni, Tokeni na Asyani,

³³ nga ni mizi yuze yonsi ukuzinguluka imisumba kwene ii mpaka ukufika ku Baalati. Kukwene akuno ikalanga. Vivi avino yasunzile ivyalembwa ivya ndupwa zyao.

³⁴ Antu yaa alondelela penepo yali intunguluzi zya nko zyao. Mesyobabu, Yamuleki, Yosya umwana umonsi wakwe Amaziya,

³⁵ Yowelo, Yeu umwana umonsi wakwe Yosyibiya, umwana umonsi wakwe Selaya, umwana umonsi wakwe Asieli,

³⁶ ukwika penepo na Elioenai, Yaakoba, Yesyoaya, Asaiya, Adiyeli, Yesimieli, Benaya,

³⁷ na Ziza umwana umonsi wakwe Syifi, umwana umonsi wakwe Alooni, umwana umonsi wakwe Yedaya, umwana umonsi wakwe Syimili, umwana umonsi wakwe Syemaya.

³⁸ Antu yano amazina yatantikwa apapela yali intunguluzi zya nko zyao. Akazi kao yasandulwike wakwe cimwi.

³⁹ Nga yasalanganile lwaku uwondaka mpaka nu kufika pipi nu ku Gedoli, lwaku ufumondaka wa cifoloma cici ala yakulonda incende yakucemelamo iviteekwa vyao.

⁴⁰ Yazanyile kweneko impanga ivunde umwakucemela iviteekwa vyao, umu mpanga itambalale iyali cele nupya iyamutende. Amu mutundu wakwe Hamu aliyo yatenzi mwenemo mpiti.

⁴¹ Antu amu mutundu wakwe Simeoni yayo yano amazina yao yatantikwa apapela yizile mu manda yakwe Hezekiya, umwene waku Yuda. Ali lino yazanzile aina Hamati mu ncende zyao zino yatenzi mwenemo, nga yazanza na ina Meuni yano yali kweneko nu kuyakomola yonsi pyu, ndi vino cili napilelo kwene. Alino lyene yikala mwenemo, pamulandu wakuti mwali incende zyakucemelamo iviteekwa vyao.

⁴² Amu mutundu wakwe Simeoni nayauze ukufika ku mpendwa imyanda isano yaile ku ufumondaka wa Edomu. Yene yatungulwilwe na ana aonsi yakwe Isyi. Amazina ya ana yao a Pelatiya, Nealiya, Lefaya na Uzieli.

⁴³ Kuku akuno yakomile aina Amaleke asile yayo yano alanga yutuka, nga ukufika na ndakai kwene akuno yakaikala.