1 Milandu 26 - Amazwi Yakwe Leza 2013

Yakalinda ya Ng'anda ikulu yakwe Yawe

¹ Impuka zyakwe yakalinda yapa mpongolo aizi: mu mpuka yakwe Kola mwali Mesyelemiya umwana umonsi wakwe Kole, wenga uwamu ana aonsi yakwe Asafu.

² Mesyelemiya wakweti ana yaa: iyeli wali a Zakaliya, wakwe ciili wali a Yediaeli, wakwe citatu wali a Zebadiya, wakwe cini wali a Yatinieli,

³ wakwe cisano wali a Elamu, wakwe mutanda wali a Yeoanani nga wakwe cinimbali wali a Elieoenai.

⁴ Obedi Edomu nawe kwene wakweti ana yaa aonsi: Syemaya uwali iyeli, wakwe ciili a Yeozabadi, wakwe citatu a Yowa, wakwe cini a Sakali, wakwe cisano a Netaneli,

⁵ wakwe mutanda a Amiyeli, wakwe cinimbali wali a Isakali nga na wakwe cinani a Peuletai. (Pasi pano Leza walanga wapolelela Obedi Edomu.)

⁶ Syemaya umwana wakwe umonsi nawe kwene wakweti ana aonsi, yano yali intunguluzi zya nko zyao pamulandu wakuti wali uwampomvu.

⁷ Ana aonsi yakwe Syemaya a: Otini, Lefaeli, Obedi na Elizabadi. Akazi kakwe yali a Eliu na Semakiya, nayo kwene yali na maka akutungulula.

⁸ Yaa yonsi yali amu mupanda wakwe Obedi Edomu. Aliyo pamwi na ana yao aonsi nga na akazi kao yali antu angatungulula nupya yali ampomvu. Yonsi pamwi yali 62.

⁹ Ukufuma mu aluko lwakwe Mesyelemiya yasolwile antu ampomvu 18.

¹⁰ Ukufuma mu akazi kakwe Melali yasolwile Hosa uwakweti ana yaa: Syimili uwali intunguluzi (nanti angala atali iyeli, isi uwamusozile ukuya intunguluzi.)

¹¹ Wakwe ciili wali a Hilikiya, wakwe citatu wali a Tebaliya, wakwe cini wali a Zakaliya. Ana aonsi yakwe Hosa pamwi na akazi kakwe yonsi pamwi yali 13.

¹² Yakalinda yapa mpongolo ya Ng'anda ikulu yakwe Yawe iyayika mu mpuka, ukulingana ni ndupwa zyao, nga yayapeela ni milimo mu ng'anda ikulu yakwe Yawe, ndi vino aina Levi yauze yapilwe.

¹³ Cila lupwa ilupendola, cisi cimwi yangaya ance nanti aikolo, kuti luzane angalinda apa mpongolo.

¹⁴ Syelemiya yamusolola kuti alinda apa mpongolo yaku ufumondaka. Zakaliya umwana wakwe umonsi, mpandamano umulamoke, nawe yamusolola kuti alinda apa mpongolo yaku katutu.

¹⁵ Obedi Edomu yamusola kuti alinda mpongolo yaku kaeya, nga ana yakwe aonsi yayasolola kuti yalinda ing'anda ya kusungilamo iviya.

¹⁶ Syupimu na Hosa yayasolola kuti yalinda mpongolo yaku uwondaka ni ya Syaleketi, lwaku museo wakupeela. Umulimo wakulinda wapelwanga ukulingana nu luti.

¹⁷ Lwaku ufumondaka kwayanga yakalinda mutanda, cila wanda. Ku katutu kwayanga yakalinda yani, cila wanda. Ku kaeya kwayanga yakalinda yani, cila wanda. Ku ng'anda ya kusungilamo iviya kwayanga yakalinda yaili, cila wanda.

¹⁸ Uku pipi nu musolo uwaku uwondaka, kwayanga yakalinda yani ku museo nga na yakalinda yaili uku musolo kwene uo.

¹⁹ Zikwene zili mpuka zyakwe yakalinda yapa mpongolo amu mupanda wakwe Kola na wakwe Melali.

Imilimo nayuze yamu Ng'anda ikulu yakwe Yawe

²⁰ Yauze amu ina Levi yawakanga icipao ca Ng'anda ikulu yakwe Yawe nga ni ng'anda zya kusungilamo ivintu vyapaatwilwa Leza.

²¹ Ladani, wenga uwamu ana yakwe Gelisyoni, wali icikolwe ca ndupwa izivule, ukwika penepo nu lupwa lwakwe Yeeiyeli, umwana wakwe umonsi.

²² Ana nayauze yakwe Yeeiyeli, Zetamu na Yowelo umwina wakwe, yawakanga icipao ca Ng'anda ikulu yakwe Yawe.

²³ Yauze amu mutundu wakwe Amulamu, Izali, Hebuloni na Uzieli, yapilwe imilimo.

²⁴ Syubaeli, uwamu mupanda wakwe Gelisyomu, umwana umonsi wakwe Mose wali a kangalila mukalamba uwa cipao ca Ng'anda ikulu yakwe Yawe.

²⁵ Akazi kakwe avilwe mwakwe Elieza yali a Leabiya umwana wakwe umonsi, uwali a isi wakwe Yesyaya, uwali a isi wakwe Yolamu, uwali a isi wakwe Zikili, uwali a isi wakwe Syelomiti.

²⁶ Syelomiti pamwi na akazi kakwe, yawakanga icuma consi cino umwene Davidi wapile, pamwi ni ntunguluzi zya mitundu, ni ntunguluzi zyakwe yamusika ya vita cila zimbi lyonga, pamwi na yamusika ya vita umwanda onga, na yamusika yakulu ampuka zya vita.

²⁷ Ivisampwe vimwi vino yapokolwile umu nkondo, iyavipela ku mulimo wa kuzifya Ng'anda ikulu yakwe Yawe.

²⁸ Syelomiti pamwi na akazi kakwe yasunganga ivintu vyonsi ivyapilwe kuti viombe mu Ng'anda ikulu yakwe Yawe, ukwika penepo na mawila alesilwe na kasema Samueli, nu mwene Saulo umwana umonsi wakwe Kisyi, na Abineli umwana umonsi wakwe Neli, nga na Yoabu umwana umonsi wakwe Zeluya, kumwi ni vintu vyuze ivyapeelwa na ali wensi uwasyala.

Imbilimo ya ina Levi yauze

²⁹ Mu amu mupanda wakwe Izali, Kenaniya na ana yakwe aonsi yapilwe imilimo yakwangalila ivintu, ndi vino ivyalembwa nga nu kupingula imilandu pakasi ka ina lzlaeli.

³⁰ Mu amu mupanda wakwe Hebuloni, Hasyabiya pamwi na akazi kakwe 1, 700, antu ampomvu, yapilwe umulimo uwakwangalila aina Izlaeli lwaku uwondaka wa luzi lwa Yodani, apa milimo yonsi ya upefi ni yi boma kwene.

³¹ Yeliyaa wali intunguluzi ya amu mupanda wakwe Hebuloni ukulingana ni vyalembwa vyakuvyalwa kwao. Mu mwaka walenga amakumi yani uwa kuteeka kwakwe Davidi kwali ukulondelezya mu vyalembwa, nga antu ampomvu amu mupanda wakwe Hebuloni yazanwa uku Yazeli ku Gileadi.

³² Umwene Davidi asolola intunguluzi 2,700 izya mpomvu izyamu mu luko lwakwe Yeliyaa kuti yaangalila amu mutundu wakwe Lubeni, na wakwe Gadi nga nu mutundu pakasi wakwe Manase apa vintu vyonsi ivikumile upefi nga ni vikumile umusambazi kwene.