1 Milandu 23 - Amazwi Yakwe Leza 2013

Umulimo wa ina Levi

¹ Lino Davidi wakota, waya umukombe wa myaka ivule, alasika Solomoni umwana wakwe umonsi pa cilimba ca wene.

² Davidi akonganika ni ntunguluzi zyonsi zya ina Izlaeli, pamwi na yasimapepo na ina Levi kwene.

³ Apenda aina Levi aonsi yonsi ali ni myaka amakumi yatatu nanti ukuluta. Impendwa yao yonsi pamwi yali 38,000.

⁴ Alino Davidi avwanga ati, “Pa antu yaa, 24,000 yapeelwa uwangalizi wa milimo yamu Ng'anda ikulu yakwe Yawe. Antu 6,000 yalinzile ukuya ivilolo na yakapingula,

⁵ antu 4,000 yalinzile ukuya yakalinda yapa mpongolo, nga antu yauze 4,000 yalinzile ukulumbanya Yawe ni vyakulizizyako inyimbo vino nayapeela.”

⁶ Pacisila cakwe vii, Davidi apaatula aina Levi mu maumba maumba ukulingana na ana yaa yakwe Levi: Gelisyomu, Koati na Melali.

⁷ Ana aonsi yakwe Gelisyomu yali a Ladani na Syimei.

⁸ Ana aonsi yakwe Ladani yali a Yeeiyeli uwali iyeli, nga palondelela Zetamu na Yowelo. Yonsi pamwi yali yatatu.

⁹ Ana aonsi yakwe Syimei yali yatatu: Syelomoti, Hazieli na Halani. Yakwene yali intunguluzi zya nko ukufuma mu amu mupanda wakwe Ladani.

¹⁰ Ana aonsi yakwe Syimei yali a Yaati, Zina, Yeusyi na Beliya. Yakwene yali ana aonsi yakwe Syimei. Yonsi pamwi yali yani.

¹¹ Yaati uwali iyeli, nga wakwe ciili a Ziza. Lelo Yeusyi na Beliya yatakweti ana aonsi avule. Acino yene yapenzilwe wa ang'anda yonga apilwe umulimo onga.

¹² Ana aonsi yakwe Koati yali a Amulamu, Izali, Hebuloni na Uzieli. Yonsi pamwi yali yani.

¹³ Ana aonsi yakwe Amulamu yali a Aaloni na Mose. Aaloni pamwi na amu mupanda wakwe yayapaatwile kuti yaangalila ivintu vyamuzilo, na kuti yapeela impolelwa apa manso yakwe Yawe umuyayaya, nu kutumikila inkolelo yakwe Yawe nga nu kupolelela antu umwi zina lyakwe umuyayaya.

¹⁴ Lelo ana aonsi yakwe Mose, umuntu wakwe Leza yapendilwe kumwi na amu mutundu wakwe Levi.

¹⁵ Ana aonsi yakwe Mose yali a Gelisyomu na Elieza.

¹⁶ Intunguluzi ya amu mupanda wakwe Gelisyomu wali a Syubaeli.

¹⁷ Intunguluzi ya amu mupanda wakwe Elieza wali a Leabiya. Elieza atakweti ana aonsi nayauze, lelo ana aonsi yakwe Leabiya yali nyanya.

¹⁸ Intunguluzi ya ana aonsi yakwe Izali wali a Syelomiti.

¹⁹ Ana aonsi yakwe Hebuloni a: Yeliya wali iyeli, wakwe ciili a Amaliya, na wakwe citatu a Yaazieli nga wakwe cini a Yekameamu.

²⁰ Ana aonsi yakwe Uzieli a Mika wali iyeli, nga wakwe ciili wali a Isiya.

²¹ Ana aonsi yakwe Melali a Maali na Musyi. Ana aonsi yakwe Maali yali a Eleaza na Kisyi.

²² Eleaza wafwile ukwaula kukwata ana aonsi. Lelo wakweti sile ana anaci. Avyala yao, ana aonsi yakwe Kisyi, ali yano yayatwite.

²³ Ana aonsi yakwe Musyi a Maali, Edeli na Yelemoti. Yonsi pamwi yali yatatu.

²⁴ Yakwene yali amu mupanda wakwe Levi ukulingana ni ntunguluzi zya mitundu ya nko zyao, ndi muno yalembilwe. Cila wenga mu amu mupanda wao wapilwe umulimo wakuomba mu Ng'anda ikulu yakwe Yawe.

²⁵ Pasi pano Davidi walanga walanda wati, “Yawe, Leza wa ina Izlaeli, wapeela umutende ku antu yakwe. Nupya amaikalanga mu Yelusalemu umuyayaya.

²⁶ Acino nupya cisikulondekwa ukuti aina Levi yasenda Itaalu lya Ukongano ni viombelo vyonsi ivikaomviwa apa kupepa.

²⁷ Apa kulondela amazwi yakusyalikizya autunguluzi wakwe Davidi, aina Levi iyapendwa ukutandikila na yao ali ni myaka yakuvyalwa amakumi yaili nu kuluta.

²⁸ Umulimo wa ina Levi wali uwakwazwa amu mupanda wakwe Aaloni mu kutumikila mu Ng'anda ikulu yakwe Yawe. Ukusunga imisolo ni miputule yakweyo, ukuswefya ivintu vyonsi vyamuzilo nu kuomba imilimo yuze yamu Ng'anda ikulu yakwe Yawe.

²⁹ Yene yapilwe umulimo wakuteyanya umukate wamuzilo api tebulo, nu usu uwa wila wa mbezu, nu mukate wa mpanda usi na citutumusi. Yapilwe nu mulimo wa kupanga mikate, nu kutikinkanya usu uo na mafuta ya miolivi, nga nu kupima cipimo ca mawila yonsi aletwanga ku Ng'anda ikulu yakwe Yawe.

³⁰ Yalinzile ukutaizya nu kulumbanya Yawe cila katondo. Nupya yalinzile ukucita icili cimwi kwene cila manguzi lino ilanzi lyatemba.

³¹ Alino yalinzile ukucita icili cimwi kwene lino yakupeela amawila yakoca kuli Yawe apa Masabata na pa kuzevya imyezi ipya, nga na pa uzevyo wa vimulo vyuze. Ni vipope vyapilwe ivyakulondolola impendwa ya ina Levi alinzile ukuomba imilimo kwene ii cila nsita. Aina Levi yapilwe umulimo wa kupepa Yawe umuyayaya.

³² Avili vino aina Levi yaombanga imilimo yao umwi Taalu lya Ukongano, nu mu Ncende Yamuzilo, nga nu kwazwilizya akazi kao, amu mupanda wakwe Levi mu Ng'anda ikulu yakwe Yawe.”