1 Milandu 22 - Amazwi Yakwe Leza 2013

¹ Acino Davidi avwanga ati, “Pa ncende ii, apalinzile kuya Ng'anda ikulu yakwe Yawe Leza, nga pakwene apalinzile kuya kavuwa ka mawila yakoca ya ina Izlaeli.”

² Caleka Davidi apeela ilamulo kuti yakonganike ainamasi yano yali mu mpanga ya Izlaeli. Lyene pakasi kao asonta yakalepula ya mawe kuti yateyanye amawe akukuulila Ng'anda ikulu yakwe Leza.

³ Davidi ayapeela ni cipimo icikulu ca vyela vyakupangila insunga zyakupampamila ivisasa vyapa mpongolo nga na maincezi, nga ayapeela nu mukuwa nauze uno utangapimwa ukunyoma.

⁴ Ayapeela ni milando ya mikelide nayuze ino itangapimwa ukunyoma, pasi pano antu aku Sidoni na aku Tuli alanga yaletela Davidi impendwa ikulu ya milando.

⁵ Davidi avwanga ati, “Solomoni umwanane acili umwance nupya atakweti umanyililo wa vintu, nga ni ng'anda ikulu ino wene amakuulila Yawe ilinzile kuya ikulu, iyembe wakwe cimwi nupya iya lulumbi ku manso ya antu amu nko zyonsi. Acino namateyanyizizya ng'anda iyo ivikulondekwa.”

⁶ Alino Davidi atuma akuya aama Solomoni umwana wakwe umonsi nga amukonkomezya ku kuulila Yawe Ng'anda yakwe ikulu, Leza wa ina Izlaeli.

⁷ Davidi anena Solomoni ati, “Mwanane, nalondanga ku kuula Ng'anda ikulu yakwe Yawe kuti nacindikilamo Yawe Leza wane.”

⁸ Lelo Yawe wanena wati, “Wemo wakomola antu avule wakwe cimwi nupya walwa inkondo izivule sana. Acino utalinzile ku nkuulila Ng'anda ikulu awe.

⁹ Lelo ulakwata umwana umonsi wino alateeka mu mutende, pamulandu wakuti nemo ndamupeela umutende pakasi ka anisi yakwe yonsi ali umu mbali zyonsi. Izina lyakwe lilaamwa ukuti Solomoni, pamulandu wakuti mu manda ya utesi wakwe ndapeela aina Izlaeli umutende nu ucingililo.

¹⁰ Aliwe kwene alankuulila Ng'anda ikulu. Wene alaya umwanane umonsi, nga nani ndaya isi, na amu mupanda wakwe yalateeka apa cilimba ca wene wa Izlaeli umuyayaya.”

¹¹ Davidi atwalilila ukuvwanga ati, “Acino mwanane, si Yawe aye nawe, kuti uye nu longo nga ukuulile Yawe Leza wako Ng'anda ikulu, ndi muno wene walandile.

¹² Si Yawe akupeele ukwiluka na mano, pakuti wateeka aina Izlaeli ukulingana na masunde yakwe Yawe Leza wako.

¹³ Ndi cakuti wayela amasunde ni vipope vyonsi vino Yawe wapile Mose kuti anene aina Izlaeli, lyene ulaya nu longo. Posya nupya uzyansye. Utuvwa intete nanti kutovoka.

¹⁴ Umu ntazi zyonsi, nemo natinezya ukuleta ivintu vii vyakukuulila Ng'anda ikulu yakwe Yawe, zaabu umunyome ukulingana na matani 3,400, na siluva ukulingana na matani 34,000, nga ukwika penepo nu mukuwa ni vyela vino vitangapimwa ukunyoma. Natinteyanya imbao na mawe kwene, lelo ulinzile ukongezya penepo navyuze.

¹⁵ Ukweti aomvi avule sana wakwe yaa: yakalepula ya mawe, yakaconga ya mawe na yakawaza ya mbao, nga na yafundi ya milimo ya misango yonsi

¹⁶ yakwe zaabu, siluva, ni ya mukuwa ni cela, avule wakwe cimwi. Caleka wemo tandika ukuomba umulimo. Si Yawe aye nawe.”

¹⁷ Lyene Davidi apeela ilamulo ku ntunguluzi zyonsi zya ina Izlaeli kuti yazwilizye Solomoni.

¹⁸ Ayanena ati, “Yawe Leza winu ali namwe, nga amamupeela umutende uku mbali zyonsi. Wene wampile ucimvyo apa antu yonsi aikalanga umu mpanga ii, nga ndakai antu yayo yakutumikila mwemwe na Yawe kwene.

¹⁹ Acino mulinzile mwatumikila Yawe Leza winu na mano inu nga nu mwenzo winu onsi. Tandikini ku kuula Ng'anda ikulu yakwe Yawe, pakuti mwike mwenemo Mbokosi ya Upangano yakwe Yawe nga ni viombelo vyuze ivyakuomvya apa kumupepa.”