1 Milandu 21 - Amazwi Yakwe Leza 2013

Davidi wapenda antu

¹ Apa nsita imwi Satana walondanga ukuletelela aina Izlaeli, caleka atunkola Davidi kuti apende antu.

² Lyene Davidi apeela ilamulo kuli Yoabu na yamusika ya vita ati, “Pitini mukapende aina Izlaeli ukutandikila sile ku Belisyeba mpaka ukufika ku Dani. Lyene mwize munene kuti imanye impendwa yao.”

³ Lelo Yoabu aasuka ati, “Si Yawe asandulule ivita vyakwe amaila umwanda. We musambazi nupya umwene wane, Uzye antu yaa yonsi yasi akwako? Uzye pacani we musambazi wane ukasi kucita icintu cii? Uzye pacani cino ungaletelela aina Izlaeli?”

⁴ Lelo umwene apatikizya Yoabu ukuyela ilamulo lyakwe. Acino Yoabu afuma penepo nga aya konsikonsi umu mpanga ya Izlaeli, nga pacisila aswilila ku Yelusalemu.

⁵ Lyene Yoabu aya anena umwene Davidi impendwa ya asilika yakwe. Yonsi pamwi yali 1,100,000 angalwa inkondo ni zyampanga zyao, ukwika penepo nayauze amu Yuda ali 470,000 angalwa inkondo.

⁶ Lelo Yoabu atapendenkinye amu mutundu wakwe Levi na wakwe Benjamini, pamulandu wakuti atazangile mwi lamulo lya mwene.

⁷ Yawe nawe kwene atazangile mwi lamulo kwene lii. Acino wavunwike aina Izlaeli.

⁸ Lyene Davidi ailongwela kuli Leza ati, “Natinifya wakwe cimwi apakucita icintu cii. Lyene napapata, njelela ne muomvi wako. Natincita icauwelewele sana.”

⁹ Alino Yawe anena Gadi, kasema wakwe Davidi, ati,

¹⁰ “Yanga ukanene Davidi uti, ‘Mwene wati, Namakunena ivintu vitatu kuti usolole cino ukasi. Nani namakuvunukila ku cintu conga cino umasolola.’ ”

¹¹ Acino Gadi aya kuli Davidi nga amunena ati, “Yawe wavwanga wati, ‘Solola cino ukasi apa vintu vii:

¹² kukaye imyaka itatu ya cipowe, nanti imyezi itatu ya kupuuka ivita vya anisi inu, nanti amanda yatatu akufululwa ku lupanga lwakwe Yawe ni mpungo ino alaponya umu mpanga inu, nu kutuma umungeli wakwe kuti alete imfwa konsi umu Izlaeli.’ ”

¹³ Alino Davidi anena Gadi ati, “Nemo nkunyunguluka sana umu mwenzo pali ndakai. Ntangatemwa antu yamvunuke awe. Lelo cingazipa kuti Yawe aliwe amvunuke pamulandu wakuti wene uwa mizu.”

¹⁴ Acino Yawe aponya impungo pa ina Izlaeli, nga antu amazimbi amakumi cinimbali iyafwa.

¹⁵ Lyene Leza atuma umungeli wakwe kuti akonone umusumba wa Yelusalemu. Lelo ala umungeli acili akonona, Yawe amunena ati, “Ta! Calingana!” Apa nsita kwene ilya walanga umungeli wilya wakwe Yawe acili aimi pa lwano lwa kupuulila lwakwe Alauna umwina Yebusi.

¹⁶ Davidi asanzula amanso nga alola umungeli wakwe Yawe aimi pakasi ki yulu ni nsi, ala alemile nu lupanga umwi kasa lyakwe nu kulusonta ku Yelusalemu. Lyene Davidi na ikolo yamwi, azwite insalu zyakulanga ulanda, yafupama pansi.

¹⁷ Davidi anena Leza ati, “Uzye asi anene napiile ilamulo ilya kupenda ivita? Cumi kwene nene natinifya, nu kuluvyanya. Antu yaa yali wa mfwele. Uzye iifyo cii lino yene yatiyacita? Owe, we Yawe Leza wane, si ungala uvunuke sile nene na ang'anda yane! Lelo utaleka impungo ii itwalilile apa antu yako.”

¹⁸ Lyene umungeli wakwe Yawe apeela ilamulo kuli Gadi kuti anene Davidi aye akakuulile Yawe kavuwa pa lwano lwa kupuulila lwakwe Alauna umwina Yebusi.

¹⁹ Acino Davidi apita apa kuyela amazwi kwene yaa yakwe Yawe, yano Gadi wamunenyile.

²⁰ Lino Alauna acili akupuula ingano, aseleuka nga alola umungeli. Ana yakwe aonsi yani yano wali nayo, lino yalola umungeli iyafisama.

²¹ Lyene lino Davidi wapalama ukufika apaali Alauna, Alauna wiyo asanzula amanso nga amulola, asya ulwano lwa kupuulila nga aya akontama inkolelo yakwe Davidi ala ni cinso cakwe caticikumya umusili.

²² Davidi amunena ati, “Nkazya ulwano lwako lwa kupuulila, pakuti nkuulile penepo Yawe kavuwa kuti impungo ii iyatiponela antu, isile. Unkazye apa mutengo waluko onsi.”

²³ Alauna anena Davidi ati, “Awe, wemo tola sile. Su musambazi nupya umwene wane ale acite icingamuzipila. Namakupeela yacipambasi akupeela uwila wakoca, ni milangu nayo yakuomvya wa nkwi, nga ni ngano zyakupeela uwila wa usu. Namakupeela vii vyonsi.”

²⁴ Lelo umwene Davidi anena Alauna ati, “Awe, nemo nkasi ukulipa ukulingana nu mutengo waluko onsi. Ntangatola icintu cako uwila sile kuti ncipele kuli Yawe, nanti ukupeela uwila wakoca uno ntaculile.”

²⁵ Acino Davidi alipila Alauna impiya zyakwe zaabu ukulingana imyanda mutanda apakukala incende ilya.

²⁶ Davidi akuulila Yawe kavuwa kuku kwene nga aocelapo amawila yakoca na autandano. Apepa kuli Yawe, nga Yawe nawe amwaasuka apakutuma umoto ukufuma mwiyulu, nga uponela pa kavuwa ka mawila yakoca.

²⁷ Lyene Yawe apeela ilamulo ku mungeli, nga umungeli aswilizya ulupanga mu cituwo caluko.

²⁸ Apa nsita ilya, Lino Davidi walola ukuti Yawe watamwasuka pa lwano lwa kupuulila lwakwe Alauna umwina Yebusi wilya, ali pakupeela impolelwa papa kwene.

²⁹ Itaalu lya Ukongano lyakwe Yawe, lino Mose wapanzile mu lwanga, nga na kavuwa ka mawila yakoca alanga vili umu ncende yakupepelamo uku Gibyoni.

³⁰ Lelo Davidi waposiwe ukuya kweneko ku kuuzya kuli Yawe, pamulandu wakuti wali ni ntete zya kufwa ku lupanga lwa mungeli wakwe Yawe.