1 Milandu 19 - Amazwi Yakwe Leza 2013

Davidi wacimvya aina Amoni na ina Alamu

¹ Pacisila ca nsita imwi, Naasyi umwene wa ina Amoni afwa, nga Hanuni umwana wakwe umonsi amupyana pa cilimba ca wene.

² Davidi aelenganya ati, “Ndacita uluse kuli Hanuni umwana umonsi wakwe Naasyi, pamulandu wakuti isi wancitile uluse.” Acino Davidi atuma inkombe kuti yakalange uluse kuli Hanuni apa kufwilwa isi. Nga lino antu yakwe Davidi yafika kuli Hanuni, mu mpanga ya ina Amoni kuti yalange uluse kunoli,

³ ivilolo vya ina Amoni ivinena Hanuni viti, “Uzye ukwelenganya ukuti Davidi cino wakutumila inkombe apamulandu wakuti akulonda ukulanga uluse apa kufwilwa so? Uzye asi apamulandu wakuti inkombe zyakwe zize zyendezye impanga, nu kuzanza, nga yaipoke?”

⁴ Acino Hanuni alema inkombe zizi zyakwe Davidi, azipela inyele, aputola ni vizwalo vyao lwamu ntungu, nga ayazinga.

⁵ Lino Davidi uvwa ivyacitikile inkombe zyakwe, atuma inkombe zyuze zyakuya yakomenkanya, pamulandu wakuti Hanuni wayazewinye wakwe cimwi. Umwene ayanena ati, “Ikalini ku Yeliko mpaka ivilezu vikamele, nga pacisila muce muwele.”

⁶ Lino aina Amoni yiluka ukuti lyene yaya anisi yakwe Davidi na Hanuni, lyene iyatuma siluva ukulingana amakilogalamu 34,000, kuti yakalipile apa maceleta kumwi na yakapisya yayako ukufuma ku Alamu Naalaimu, nu ku Alamu Maaka na Zoba.

⁷ Yalipila amaceleta ukulingana 32,000 kumwi na yakapisya ya maceleta, nga nu mwene waku Maaka kumwi ni vita vyakwe. Yayo yizile yacita inkambi pipi nu ku Medeba. Aina Amoni nayo kwene yafuma mu misumba yao nga yaiteyanya uku ulwi.

⁸ Lino Davidi uvwa vii, atuma Yoabu pamwi ni mpuka yakwe yonsi ya vita.

⁹ Aina Amoni yafumila ukunzi nga yatantama pa mpongolo ya musumba wa Laba, nga yamwene aizile ku kuyazwa nayo yali yonga umu ncende zyaulamo imiti.

¹⁰ Yoabu alola ukuti anisi yangamuzanza ukufuma uku cisila nu ku nkolelo kwene. Acino asolola yanyela ya asilika amu Izlaeli kuti ayano yalungatane ni vita vya ina Alamu.

¹¹ Antu yauze asyala ayaika mu makasa yakwe Abisyai umwinakwe, nga nawe ayatantamika kuti yalungatane na ina Amoni.

¹² Yoabu anena Abisyai ati, “Ndi cakuti aina Alamu yanduta amaka, lyene wize ungazwe. Lelo ndi walola ukuti aina Amoni yakuluta amaka, lyene namaiza nkwazwe.

¹³ Posya sile nga ulwe iconsi, pamulandu wa antu itu ni misumba yakwe Leza witu. Yawe alacita icingamuzanzya.”

¹⁴ Lyene Yoabu pamwi ni vita vyakwe yaya pa nkolelo ku kulwisya aina Alamu, nga aina Alamu yamuutuka.

¹⁵ Lino aina Amoni yalola ukuti aina Alamu yutuka, nayo kwene yutuka Abisyai umwina wakwe, nga yaya yingila mu musumba. Acino Yoabu aswilila ku Yelusalemu.

¹⁶ Pacisila lino aina Alamu yalola ukuti yatiyacimviwa na ina Izlaeli, yatuma inkombe ku kuleta ivita vyao vyuze ukufuma ku mbalama yuze ya Luzi lwa Yufulate, ala vikutungululwa na Syofaki, musika wilya uwa vita vyakwe Hadadezeli.

¹⁷ Lino Davidi uvwa vii, akonganika ivita vyonsi vya ina Izlaeli nga yalamba Luzi lwa Yodani. Alino atwala ivita vyakwe apa nkolelo nu kuvitantamika kuti yatandike ukulwa nayo. Lyene lino Davidi watantamika ivita vyakwe ukulungatana na ina Alamu, yene iyatandika ukumulwisya.

¹⁸ Lelo pacisila, aina Alamu yutuka aina Izlaeli, nga Davidi akoma aina Alamu yakapisya ya maceleta yano yali 7,000, nga na asilika yao apa ngazo nayo 40,000. Akoma na Syofaki kwene, musika mukulu uwa vita vyao.

¹⁹ Lino yamwene atumikilanga Hadadezeli yalola ukuti yatiyacimviwa ku ina Izlaeli, yacita umutende pakasi kao na Davidi nga yamutumikila. Caleka aina Alamu yatakasi ukwazwilizya aina Amoni nupya.