1 Milandu 18 - Amazwi Yakwe Leza 2013

Ukucimvya kwakwe Davidi mu ulwi

¹ Pacisila ca nsita imwi, Davidi alwisya aina Filisti nu kuyacimvya. Alino apokolola aina Filisti amaka akuteeka umusumba wa Gati ni mizi iyazingulwike.

² Davidi acimvya na ina Moabu kwene, nga yamutumikila nu kusonka imisonko kunoli.

³ Ukulundapo, Davidi alwisya Hadadezeli umwene waku Zoba, apipi nu ku Hamati, apa nsita ino waile ku kukomya uwene wakwe lwaku Luzi lwa Yufulate.

⁴ Davidi apoka amaceleta izimbi lyonga yakwe Hadadezeli, na yakapisya yamaceleta nayo amazimbi cinimbali nga na asilika yapa ngazo amazimbi amakumi yaili. Alino alemalika imfwalasi zyonsi pyu, lelo asya sile umwanda onga.

⁵ Lino aina Alamu aku Damasiko yiza ku kwazwa Hadadezeli umwene waku Zoba, Davidi akomola antu amazimbi amakumi yaili na yaili muli yayo.

⁶ Pacisila cakwe vivyo Davidi aika amaboma ya nkondo ku Damasiko mu mpanga ya Alamu. Acino aina Alamu yamutumikila nu kusonka imisonko kunoli. Yawe aleka kuti Davidi acimvye konsi kuno wapitanga.

⁷ Davidi atoola ivisyangu vyakwe zaabu vino antu yakwe Hadadezeli yasenzile nga avileta ku Yelusalemu.

⁸ Ukufuma ku Teba nu ku Kuni, imisumba yakwe Hadadezeli, Davidi atoola kweneko umukuwa uvule wakwe cimwi, uno pacisila Solomoni waomvizye pa kupangilako itanki lya mukuwa, ni ncesi nga ni viombelo vyuze vipusanepusane vyamu Ng'anda ikulu yakwe Yawe.

⁹ Lino Tou umwene waku Hamati uvwa ukuti Davidi watacimvya ivita vyonsi vyakwe Hadadezeli umwene waku Zoba,

¹⁰ Atuma Hadolamu umwana wakwe umonsi ku mwene Davidi ku kumukomenkanya nu kumuwanzya pa kucimvya Hadadezeli, wino amaila avule walwanga inkondo na Tou. Hadolamu pali pakuleta iviombelo vyakwe zaabu na vyakwe siluva.

¹¹ Umwene Davidi apeela iviombelo vii kuli Yawe, wakwe vino wapile siluva na zaabu wino wapokolwile ku antu amu nko kwene zizi, kuli kuti aina Edomu, na ina Moabu, aina Amoni na ina Filisti, nga na ina Amaleke.

¹² Abisyai umwana umonsi wakwe Zeluya wakomile aina Edomu amazimbi ikumi na cinani mu Cifoloma ca Musilya.

¹³ Alino Davidi aika impuka zya asilika umu mpanga ya Edomu, nga aina Edomu yonsi yatandika ukutumikila Davidi. Yawe aleka kuti Davidi acimvye konsi kuno wapitanga.

¹⁴ Davidi ateeka mu mpanga yonsi ya ina Izlaeli, ala akucitila antu yakwe yonsi ivisuma ni vyawololoke.

¹⁵ Yoabu umwana wakwe Zeluya uwali intunguluzi ya vita. Yeosafati umwana umonsi wakwe Ailudi wali akalemba wa milandu.

¹⁶ Zadoki umwana umonsi wakwe Aitubi nga na Aimeleki umwana umonsi wakwe Abyata yali asimapepo. Alino Syavisya wali a kalemba.

¹⁷ Benaya umwana umonsi wakwe Yeoyada wali a cilolo uwangalilanga aina Keleti na ina Peleti. Alino ana aonsi yakwe Davidi yali a yacilolo yakalamba mu milimo ya kutumikila umwene.