1 Milandu 16 - Amazwi Yakwe Leza 2013

¹ Antu yaya yawezya Mbokosi ya Upangano yakwe Leza nga yayingizya mwi taalu lino Davidi waiteyanyizizye, nga yayika pa ncende yakweyo. Alino yapeela amawila yakoca pamwi na utandano kuli Leza.

² Pacisila lino Davidi wamala kupeela amawila yakoca na autandano, apolelela antu umwi zina lyakwe Yawe.

³ Lyene apeela umukate na keke kuli cila muntu umu Izlaeli, ayapeela nu mukate utikinkanye ni mikoto ya viseekwa. Aankanya yonsi pyu, aonsi na anaci kwene.

⁴ Alino asonta aina Levi yamwi kuti yatumikila apa kutungulula amapepo inkolelo ya Mbokosi ya Upangano yakwe Yawe, apa kupepa, nu kutaizya, nga nu kulumbanya Yawe, Leza wa ina Izlaeli.

⁵ Asafu uwali ntunguluzi, nga Zakaliya wali wakwe ciili, nga palondelela Yeiyeli, Syemilamoti, Yeeiyeli, Matitiya, Eliabu, Benaya, Obedi Edomu na Yeiyeli. Yene alizyanga yabanjo nu tungoma. Asafu walizyanga iviwaya,

⁶ nga Benaya na Yaazieli yasimapepo yalizyanga intandala insita zyonsi inkolelo ya Mbokosi ya Upangano yakwe Leza.

Ulwimbo lwa kulumbanya Leza

⁷ Uwanda ulya kwene Davidi apeela Asafu na ina Levi yauze umulimo wa kwimbila Yawe.

Ulwimbo lwa kulumbanya

⁸ Taizini Yawe, lumbanyini ukulu wakwe. Nenini inko ivyakuzunguka vino wene wacita.

⁹ Lumbanyini Yawe umu nyimbo. Landini ivyakuzunguka vino wene wacita.

¹⁰ Sansamukini pano sweswe akwakwe. Lekini yonsi akamupepa yazange.

¹¹ Lengini Yawe kuti amwazwe, nupya mwamupepa lyonsi.

¹² Iusyini ivyakuzunguka vino Yawe wacisile, ni vinjelengwe vyakwe, nga nu uvunuko uno wene wacisile apa antu,

¹³ mwe amu mupanda wakwe Yakobo, mwe aomvi yakwe Leza, amu mupanda wakwe Izlaeli, mwemuno Leza wasolola.

¹⁴ Wene ali Yawe, Leza witu. Akateeka insi yonsi pano pansi.

¹⁵ Wene akaiusya upangano wakwe amanda pe, mutakilile amalamulo yakwe amanda pe.

¹⁶ Akaiusya upangano ulya uno wene wacisile na Abulaamu, umulapo uno wene wacisile kuli Isaki.

¹⁷ Upangano uo waupile kuli Yakobo wa cipope, nu ku ina Izlaeli kuti uye uwa manda pe.

¹⁸ Wavwanzile ati, “Kunuli ndapeela impanga ya Kenani, kuti iye icaupyanyi cako.”

¹⁹ Antu yakwe Leza alanga yatali yavule, nupya yali aenyi mu mpanga ilya ya Kenani.

²⁰ Yene yalulumbanga ukufuma mu mpanga yonga yaya uku mpanga yuze, ukufuma mu wene onga mpaka nu ku uze kwene.

²¹ Lelo Leza atazumilizye umuntu nanti wenga uku yazunya, na pakuyacingilila, wene wasokanga yamwene.

²² Wavwanzile ati, “Mutezya ukuzanza aomvi yane, nanti ukukumya yakasema yane.”

²³ Mwimbilini Yawe, mwe ikazi ya pano nsi mwensi. Kosolini ufyusi wakwe cila wanda, ilandwe lisuma ilyakuti wene watuula antu yakwe.

²⁴ Kosolini ululumbi lwakwe, ku antu amu nko zyonsi, mulande ivicitwa vyakwe vyamaka ku antu a mpanga zyonsi.

²⁵ Yawe u mukulu nupya uwakulumbanya sana, wene uwakucindika wakwe cimwi, ukuluta tuleza tonsi utwasyala.

²⁶ Pasi pano tuleza tonsi utwamu nko utuluwi, lelo Yawe uwaumvile amayulu.

²⁷ Ululumbi nu usambazi vimuzingulwike, amaka nu luzango vili mu wikalo wakwe.

²⁸ Lumbanyini Yawe, mwe antu amu mitundu yonsi, lumbanyini ululumbi na maka yakwe.

²⁹ Lumbanyini izina lyakwe Yawe ilya lulumbi. Izini na mawila uku Ng'anda yakwe ikulu, kontamini inkolelo yakwe Yawe, nu kumupepa mu lulumbi lwa muzilo wakwe.

³⁰ Muye ni ntete mwensi mwe ikazi yamu nsi! Endi, insi yikala ndi nupya itangaseziwa awe.

³¹ Zangini mwe ikazi ya kwiyulu, sansamukini mwe ikazi ya pano nsi. Nenini antu amu nko zyonsi muti, “Yawe umwene.”

³² Lekini Yemba alandikisye, pamwi na vyonsi ivyaya mwenemo, lekini ivyalo visansamuke, pamwi na vyonsi ivyaya mwenemo!

³³ Lyene imiti yamu mitengo ilimbila uku nsansa lilyo lino Yawe aliza ku kuteeka vyonsi pano nsi.

³⁴ Taizini Yawe, pano wene umusuma. Ukutemwa kwakwe ukwa manda pe.

³⁵ Mulaizye muti, “Si ututuule, we Leza Katuula witu. Utukonganike nu kutukulula ku antu amu nko, pakuti tukutaizye, nu kulumbanya izina lyako ilyamuzilo, nu kuya ni cilumba caku kulumbanya.

³⁶ Lumbanyini Yawe, Leza wa ina Izlaeli! Mulumbanyini ukutandikila ndakai mpaka nu ku muyayaya!” Nga antu yonsi yavwanga yati, “Ciye vivyo kwene.” Alino yalumbanya Yawe.

Antu yapepa uku Yelusalemu nu ku Gibyoni

³⁷ Lyene Davidi asya Asafu na aomvi yauze pa ncende apali Mbokosi ya Upangano yakwe Yawe, kuti lyonsi yatumikila kweneko, ukulingana ni vyalondekwanga ukucita cila wanda.

³⁸ Davidi wayasilile Obedi Edomu umwana umonsi wakwe Yedutuni, na aomvi yauze 68 kuti yaazwana mu kutumikila kuko. Obedi Edomu umwana umonsi wakwe Yedutuni, na Hosa, yali yakalinda yapa mpongolo.

³⁹ Davidi asya simapepo Zadoki na yasimapepo yauze ukwi Taalu lyakwe Yawe, apa ncende yakupepela penepo uku Gibyoni.

⁴⁰ Cila katondo na manguzi yalinzile ukupeela amawila yakoca kuli Yawe apa kavuwa ka mawila yakoca, lyonsi kwene, ukulingana na vyonsi ivyalembwa mu lupapulo lwa Masunde yakwe Mose, yano Yawe wapile aina Izlaeli.

⁴¹ Antu yayo yali pamwi na Hemani na Yedutuni, na asyala yonsi yano yasolwilwe nu kwamilwa ku mazina, kuti yalumbanya Yawe, pamulandu wakuti ukutemwa kwakwe ukwa manda pe.

⁴² Hemani na Yedutuni yapilwe umulimo wa kulizya intandala ni visekese nga nu kulizya ivintu vyuze mu nyimbo zyamuzilo. Ana aonsi yakwe Yedutuni yapilwe umulimo wa kulinda apa mpongolo.

⁴³ Lyene antu yonsi yapita kumwao, nga Davidi aswilila ukwakwe kuti atale aikale na amu ng'anda yakwe.