1 Milandu 15 - Amazwi Yakwe Leza 2013

Yaiteyanya kuyatola Mbokosi ya Upangano

¹ Pacisila cakuikuulila amang'anda mu musumba wakwe Davidi, Davidi wateinye ni ncende yakusungila mwenemo Mbokosi ya Upangano yakwe Leza, aipangila ni Taalu kwene.

² Lyene Davidi avwanga ati, “Aina Levi yatupu, aliyo yazumiliziwa ukusenda Mbokosi ya Upangano, pamulandu wakuti Yawe uwayasolola kuti yasenda Mbokosi ya Upangano yakwe Yawe, na kuti yamutumikila amanda pe.”

³ Davidi akonganika aina Izlaeli yonsi umu Yelusalemu kuti yaye yakasende Mbokosi ya Upangano yakwe Yawe nga yaitwale uku ncende ino wene waiteyanyizizye.

⁴ Alino atuma akuya aama amu mupanda wakwe Aaloni nga na ina Levi kwene.

⁵ Mu amu mupanda wakwe Koati, Uliyeli uwali ntunguluzi, nga aliwe pamwi na akazi kakwe, yonsi pamwi yali 120.

⁶ Mu amu mupanda wakwe Melali, Asaiya uwali ntunguluzi, nga aliwe pamwi na akazi kakwe, yonsi pamwi yali 220.

⁷ Mu amu mupanda wakwe Gelisyomu, Yowelo uwali ntunguluzi, nga aliwe pamwi na akazi kakwe, yonsi pamwi yali 130.

⁸ Mu amu mupanda wakwe Elizafani, Syemaya uwali ntunguluzi, nga aliwe pamwi na akazi kakwe, yonsi pamwi yali 200.

⁹ Mu amu mupanda wakwe Hebuloni, Eliyeli uwali ntunguluzi, nga aliwe pamwi na akazi kakwe, yonsi pamwi yali 80.

¹⁰ Mu amu mupanda wakwe Uzieli, Aminadabu uwali ntunguluzi, nga aliwe pamwi na akazi kakwe, yonsi pamwi yali 112.

¹¹ Lyene Davidi atuma akuya aama yasimapepo, Zadoki na Abyata, nga aama na Uliyeli, Asaiya, Yowelo, Syemaya, Eliyeli nga na Aminadabu, aina Levi yalya.

¹² Alino ayanena ati, “Mwemwe muli ntunguluzi zya nko zya ina Levi. Mwemwe pamwi na ina Levi yauzo mulinzile mwaipaatula nu kuwezya Mbokosi ya Upangano yakwe Yawe, Leza wa ina Izlaeli. Mulete Mbokosi iyo ku ncende ino naiteyanyizizya.

¹³ Apamulandu wakuti apa kutandika mwemo mutazanyilwe kweneko kuti muwezye Mbokosi ilya, acili cino Yawe Leza witu watuponyezya ukali. Tutamuzizye ivyakucita apa kuiwezya.”

¹⁴ Acino yasimapepo na ina Levi yaya iyaipaatula pakuti yaye yakawezye Mbokosi ya Upangano yakwe Yawe, Leza wa ina Izlaeli.

¹⁵ Alino aina Levi yanyemula Mbokosi ya Upangano apa mipingilo pa viye vyao, wakwe vino Mose wapile ilamulo ndi muno Yawe wamunenile.

¹⁶ Pacisila cakwe vii, Davidi anena intunguluzi zya ina Levi ukusonta yamwi muno yali kuti yimbe inyimbo zya kuyasansamusya, mu vyakulizizyako inyimbo wakwe vii: yabanjo, yababatoni ni viwaya.

¹⁷ Acino aina Levi iyasonta Hemani umwana umonsi wakwe Yowelo, nu mu akazi kakwe namo yasonta Asafu umwana umonsi wakwe Belekiya. Mu ina yao amu luko lwakwe Melali, namo yasonta Etani umwana umonsi wakwe Kusyaya.

¹⁸ Pali pamwi na aliyo, yasonta aina yao alondelilepo. Amazina yao a Zakaliya, Yaaziyeli, Syemilamoti, Yeiyeli, Uni, Eliabu, Benaya, Maaseya, Matitiya, Elifeleu na Mikineya, ukwika penepo na yakalinda yapa mpongolo yaya, Obedi Edomu na Yeiyeli.

¹⁹ Yakiimba yaya, Hemani, Asafu na Etani aliyo yalizyanga ivisekese vya mukuwa.

²⁰ Zakaliya, Aziyeli, Syemilamoti, Yeeiyeli, Uni, Eliabu, Maaseya na Benaya aliyo yalizyanga mazeze ukulingana nu kusawila kwa papela.

²¹ Lelo Matitiya, Elifeleu, Mikineya, Obedi Edomu, Yeiyeli na Azaziya yalizyanga yababatoni, yala yakutungulula imimbile iyo, pano yali a yanyela.

²² Kenaniya, intunguluzi ya ina Levi uwangalilanga imimbile. Uo wali uli mulimo wakwe pamulandu wakuti waumanyikisye wakwe cimwi.

²³ Belekiya na Elikana yasonsilwe kuti yaye yakalinda yapa mpongolo alindanga Mbokosi ilya ya Upangano.

²⁴ Syebaniya, Yosafati, Netaneli, Amasai, Zakaliya, Benaya na Elieza yasimapepo aliyo yalingine ukulizya intandala inkolelo ya Mbokosi ya Upangano yakwe Leza. Obedi Edomu na Yeaya nayo kwene yalindanga Mbokosi ya Upangano ilya.

Mbokosi ya Upangano yasendwa ku Yelusalemu

²⁵ Acino Davidi pamwi na ikolo amu Izlaeli na yamusika ampuka ya vita izimbi iyapita ku kuleta Mbokosi ya Upangano yakwe Yawe ukufuma ku ng'anda yakwe Obedi Edomu, yala yakuzanga.

²⁶ Lyene antu yayo yafyula yacipambasi cinimbali na yasuku cinimbali, kuti yapeele impolelwa kuli Leza apakuti aazwilizye aina Levi yano yanyemwile nu kusenda Mbokosi ya Upangano yakwe Yawe.

²⁷ Davidi wazwite umwingila uswepulukile, ndi vino aina Levi yonsi asenzile Mbokosi ya Upangano yazwite, na yakiimba yonsi, pamwi na Kenaniya, kangalila wa ng'omba. Davidi wazwite ni cakuzwala ca efodi icapangilwa ku nsalu itelepelele.

²⁸ Acino aina Izlaeli yonsi iyaleta Mbokosi ya Upangano yakwe Yawe yala yakupunda nu kulizya ivinyenye ni ntandala, ni viwaya, na yabanjo na yababatoni.

²⁹ Lino Mbokosi ilya ya Upangano ikwingiziwa mu musumba wakwe Davidi, Mikala umwana umwanaci wakwe Saulo ala asungamile ukunzi apa nzota. Nga lino walola umwene Davidi akucina nu kuzevya, atandika kumusula umu mwenzo wakwe.