1 Milandu 13 - Amazwi Yakwe Leza 2013

Mbokosi ya Upangano yasendwa ukufuma ku Kilyati Yealimu

¹ Umwene Davidi auzya cila muomvi pakasi ka ntunguluzi zya antu amazimbi, na pakasi ka antu imyanda, kuti yamupanzye amano.

² Lyene anena iuvi lyonsi lya ina Izlaeli akongine ati, “Ndi camuzipila, nupya ndu kulonda kwakwe Yawe Leza witu, lekini tutume amazwi ku ina itu yonsi aikala konsi mu mpanga ya Izlaeli. Alino nu ku ina Levi yonsi aikala pamwi na aliyo mu misumba nga nu ku mpanga zya mulemvwe izyakucemelamo, kuti yize ku kwikala naswe.

³ Alino lyene tupite tukawezye Mbokosi ya Upangano. Pasi pano umu manda ya kuteeka kwakwe Saulo swemo twatazyezile Mbokosi ya Upangano.”

⁴ Lyene yonsi akongine yazumilizya ukucita cii, pamulandu wakuti antu yonsi yalola ukuti icisuma.

⁵ Acino Davidi akonganika aina Izlaeli yonsi, ukutandikila sile ku Luzi lwa Syioli mu Eguputo mpaka ukufika nu ku wingililo wa Lebo Hamati, kuti yakawezye Mbokosi ya Upangano yakwe Leza ku Kilyati Yealimu.

⁶ Alino Davidi pali pamwi na ina Izlaeli yonsi yano yali na aliwe yaya ku Baala, kuli kuti, ku musumba wa Kilyati Yealimu mu mpanga ya Yuda, kuti yakawezye Mbokosi ya Upangano yakwe Yawe Leza. Mbokosi iyo yamanyika ukwizina lyakwe Yawe, uwikala papela pali yakelubi kwati apa cilimba ca wene.

⁷ Yene yasenda Mbokosi iyo ya Upangano yakwe Leza mu cikocikala icipya ukufuma ku ng'anda yakwe Abinadabu. Na yakapisya ya cikocikala cicyo yali a Uza na Aiyo.

⁸ Davidi pamwi na ina Izlaeli yonsi ala yakuzevya wakwe cimwi na maka yao yonsi, ala yakwimba inyimbo muli yababatoni, na yabanjo, nu tung'oma, ni viwaya, ni ntandala.

⁹ Lino yafika pa lwano lwa kupuulila ku Kidoni, yamasaye yaya yakasi kuponya Mbokosi ya Upangano ilya pamulandu wa kupumika. Caleka Uza atambalika ikasa lyakwe kuti aanke Mbokosi iyo.

¹⁰ Lilyo kwene ukali wakwe Yawe iuponela Uza, nga amukoma pamulandu wa kutambalika ikasa nu ku kumya Mbokosi ilya. Acino Uza afwa papa kwene pa manso yakwe Yawe.

¹¹ Lyene Davidi asoka pamulandu wakuti ukali wakwe Yawe waponela Uza, nga ukufika na pilelo kwene incende ilya ikaamwa ukuti Pelezi Uza.

¹² Uwanda ulya Davidi auvwila Leza intete nga auzya ati, “Uzye lyene namawezya uli Mbokosi ya Upangano yakwe Leza?”

¹³ Acino Davidi atawezizye Mbokosi ilya ku musumba wa Yelusalemu. Lelo waisenzile nu kuisya ku ng'anda yakwe Obedi, umukaya uwamu musumba uwa Giti.

¹⁴ Acino Mbokosi ilya yakwe Leza yasunzilwe na ang'anda yakwe Obedi Edomu, imyezi itatu mu ng'anda kwene yakwe Obedi Edomu. Nga Yawe apolelela a ng'anda yakwe Obedi Edomu pamwi na vyonsi vino wakweti.