1 Milandu 12 - Amazwi Yakwe Leza 2013

Ivita vyaya ku lusansa lwakwe Davidi

¹ Davidi wikalanga ku Zikilagi pacisila ca kupuuka umwene Saulo umwana umonsi wakwe Kisyi. Kuko kwene ali kuno ivita vicenjele sana vyakwe Benjamini vyaile vyuminkana ni vita vyakwe.

² Yene yali aina Benjamini umwafumile Saulo, nupya yali anyela sana uku kulwa ni nceto na malapwa. Yamanyile ivya kufiika amalegeni ukwimani nu kwilunji kwene.

³ Aiezeli intunguluzi yao, na Yoasyi, yoili yaa yali ana yakwe Syemaa uwaku Gibeya. Alino lyene palondelela ivita iviili wakwe Yezieli na Peleti, ana aonsi yakwe Azimaveti. Nga palondelela nayauze ali wakwe Belaka, Yeu uwaku Anatoti,

⁴ alino na Isyimaya uwaku Gibyoni, ikonkoto limwi ilya vita impendwa amakumi yatatu. Nga a Yelemiya, Yaazieli, Yoanani, Yozabadi uwaku Gedela,

⁵ Eluzai, Yelimoti, Bealiya, Syemaliya na Syefatiya uwaku Halufu,

⁶ Elikana, Isiya, Azaleli, Yoezeli na Yasyobeamu yonsi kwene aku Kolai.

⁷ Pali na Yowelo na Zebadiya, ana aonsi yakwe Yeloamu uwaku Gedoli.

Alondezi yakwe Davidi ukufuma uku mutundu wakwe Gadi

⁸ Asilika yamwi alumbuke ukufuma mu mutundu wakwe Gadi yuminkana ni vita vyakwe Davidi, lino wene wali kwi cele lyakwe uku lwanga. Vyali ivita vimwi ivyamanyile ukulwa inkondo umu kuomvya amasumo ni visyangu. Yali akalale sana mu milolekele ngati a yacisama. Alino yali acincile wakwe yampombo amu myamba.

⁹ Ezeli wali intunguluzi yao. Nu wamulondelile wali a Obadiya. Alino wakwe citatu a Eliabu,

¹⁰ wakwe cini a Misyimana, wakwe cisano a Yelemiya,

¹¹ walenga mutanda a Atai, wakwe cinimbali a Eliyeli,

¹² walenga cinani a Yoanani, wakwe fundimbali a Elizabadi,

¹³ uwalenga ikumi a Yelemiya, nga uwalenga ikumi na wenga a Makibanai.

¹⁴ Antu yaa amu mutundu wakwe Gadi yali a yamusika yakulu a vita. Cila muntu wakweti iumba lya vita ilikulu ukulingana nu mwanda onga ndi cakuti umunono. Alino ndi cakuti umukalamba, wene wali nu kukwata ivita izimbi lyonga.

¹⁵ Umu mwezi wakutandika umwaka, lino Luzi lwa Yodani lukasambela, ali lino yene yalambwike. Iyapuusya na antu yonsi pyu aikalanga mu nyika zya mbalama zyonsi zyoili, ku ufumondaka nu ku uwondaka kwene.

Aina Benjamini nu mutundu wakwe Yuda yalondela Davidi

¹⁶ Uwanda umwi antu yamwi amu mutundu wakwe Benjamini nu mutundu wakwe Yuda yiza ukwi cele ukwali Davidi.

¹⁷ Davidi nawe akatuka ku kuyakomenkanya, nga ayanena ati, “Ndi cakuti mwiza ni myenzo itambalale apakuti mungazwe, awe lyene tunguvwana sile ningo. Lelo ndi cakuti mwiza pakuti mundetelele ku vipondo vyane, nanti nemo iminwe yane itatazile icite ulufyengo, Yawe Leza wa vikolwe vyane aliwe alandandwila nu kumvwangila.”

¹⁸ Alino Mupasi wakwe Leza aikila pali wenga uwa mwi umba lili, izina lyakwe a Amasai, uwizile aya umukalamba wa mpuka ya vita vivi amakumi yatatu. Nga nawe avwanga ati, “Ala! We Davidi, umwana wakwe Yese, sweswe antu yako! Ulongo luye kunuli na kuli yao akukwazwa! Leza ali ku lusansa lwako.” Alino Davidi ayazengela nga ayapeela ivifulo umu mpuka ya vita vyakwe.

Amu mutundu wakwe Manase yamwi yalondela Davidi

¹⁹ Asilika yamwi amu mutundu wakwe Manase yalondela Davidi lino wizile pamwi na ina Filisti ku kulwisya Saulo. Lelo Davidi wene atayazwilizye ukulwa inkondo foo, pamulandu wakuti intunguluzi zya ina Filisti zyapandine amano, izinena na Davidi kuti afume kunoyali. Pano zyelenginye ukuti limwi wene angavukila ku lusansa lwakwe Saulo, uwali umusambazi wakwe mpiti. Acino yamunena ukuswilila ku Zikilagi.

²⁰ Antu yakwe Manase yamwi pali pakulondela Davidi lino waswililemo ku Zikilagi. Amazina yao a Adina, Yozabadi, Yediaeli, Mikaeli, Yozabadi, Eliu na Ziletai. Lino yali mu mpanga yakwe Manase, yene yali intunguluzi zya mpuka ya vita izimbi.

²¹ Fwandi lyene ali vino yene yazwilizye Davidi wakwe cimwi umu kukomya impuka yakwe, pakuzana ukuti yonsi kwene kuno yafumile yali akanzane. Alino nupya kuu nako yiza yaya akalamba ya vita.

²² Kweleula manda yonsi kwizilanga penepo antu nayauze ku kwiza azwa Davidi, suka inkambi yakwe izula wakwe cimwi, wa vita vyakwe Leza.

Utantiko wa vita vyakwe Davidi

²³ Impendwa ya vita ivyalondile Davidi ku Hebuloni lino uwene wapokolwilwe kuli Saulo nga upelwa kuli Davidi, ukulingana na vino Yawe walavile, yali ndi vii:

²⁴ Amu mutundu wakwe Yuda, aiteinye ukulwa inkondo yali 6,800, yao aipangisye visyangu na masumo.

²⁵ Amu mutundu wakwe Simeoni, aiteinye ukulwa inkondo yali 7,100, yao akalawane.

²⁶ Amu mutundu wakwe Levi yali 4,600.

²⁷ Ukwika penepo na yao alondelanga Yeoyada, uwamu mupanda wakwe Aloni, nayo yali 3,700.

²⁸ Alino Zadoki, umulumendo umusipe nupya umucincile wakwe cimwi ku ulwi, nawe wakweti antu 22, yamusika amu luko lwakwe.

²⁹ Antu yakwe Benjamini, amu luko lwakwe Saulo, yali 3,000. Aingi pali yaa yali acumi kuli Saulo ukufika na pa nsita kwene ilya.

³⁰ Antu yakwe Efulemu, ivita viposye nupya antu alumbuke umu nko zyao, nayo yali 20,800

³¹ antu amu mutundu pakasi wakwe Manase, yano yasolwilwe ukuyazanwa ku kulasika Davidi pa cilimba cawene, nayo yali 18,000.

³² Antu amu mutundu wakwe Isakali yano yamanyile ningo vino Izlaeli wali nu kucita, nga ni nsita ino wali nu kucitilamo vivyo, nayo yali intunguluzi 200, ukwika penepo na akazi kao yano yatungululanga.

³³ Antu amu mutundu wakwe Zebuluni, asilika ali a yanyela ku kulwa inkondo, nupya aiteinye ukuya ku kulwa ni vyanzo vya misango yonsi, nayo yali 50,000. Yaile ku kwazwa Davidi nu mwenzo onsi pyu.

³⁴ Antu amu mutundu wakwe Nafutali yakweti yamusika ya vita 10,000, ukwika penepo nayauze asenzile ivisyangu na masumo, yali 37,000.

³⁵ Amu mutundu wakwe Dani aiteinye ku kulwa inkondo, yali 28,600.

³⁶ Antu yakwe Asyeli, asilika yanyela aiteinye ku ulwi, nayo yali 40,000.

³⁷ Nga uku mbalama ya Luzi lwa Yodani, lwaku ufumondaka, kwafumile amu mutundu wakwe Lubeni, na wakwe Gadi, na amu mutundu pakasi wakwe Manase yano yaipangisye ivyanzo vya misango yonsi, nayo yali 120,000.

³⁸ Asilika yaa yonsi, aiteinye ukuya ku kulwa, yaile ku Hebuloni, ala iyaciika ku mwenzo kuti yakalasike Davidi pa cilimba ca wene wa mpanga yonsi ya Izlaeli. Na ina Izlaeli yonsi asyala yali ni lango lyonga.

³⁹ Yene yamazile amanda yatatu ala yali pamwi na Davidi, yakulya nu kumwa vino akumwao yayimwile.

⁴⁰ Ainipamba, ukufuma kwakwe Isakali, kwakwe Zebuluni na Nafutali, nayo kwene yaletanga ivyakulya pali yapunda na pa ngamila, na pa nyumbu na yamasaye. Fwandi ivyakulya vyali nyanya, ivili wa usu wa ngano, amasamvu, utumikoto twa viseekwa, na waini, nga na mafuta ya miolivi. Yalesile ing'ombe ni mfwele izya kufyula, nga yeleke yalye. Ala cazifile wakwe cimwi. Mwali insansa nu luzango umu mpanga yonsi ya ina Izlaeli.