1 Milandu 11 - Amazwi Yakwe Leza 2013

Davidi walasikwa pa cilimba ca wene waku Izlaeli nu waku Yuda

¹ Antu yonsi pyu amu Izlaeli yaile kuli Davidi uku Hebuloni, nga yamunena yati, “Sweswe na akazi kako twaya awazi onga.

² Mu manda yampiti ala na Saulo acili umwene witu, wemo watungulwile antu ku kulwa inkondo nga Yawe Leza wako wakulavile ukuti ulatungulula antu yakwe nu kuya kateeka wao.”

³ Acino intunguluzi zyonsi izyamu Izlaeli zyaile kuli Davidi ku Hebuloni. Nawe ali pakucita upangano wamuzilo nazyo. Alino izimupaka amafuta, nga aya umwene wa ina Izlaeli, mu musango uli onga kwene uno Yawe walavile ukupitila muli kasema Samueli.

⁴ Umwene Davidi pamwi na ina Izlaeli yonsi ali pakuya ku kulwisya umusumba wa Yelusalemu. Lilyo ala ucili ukwamwa ukuti Yebusi. Na ina Yebusi, aikazi kololo amwenemo, ala amuno yacili.

⁵ Aina Yebusi ali pakunena Davidi ukuti atalatala aingile mu musumba. Lelo Davidi wene asuka apoka umusumba wao uwi linga uwaku Zioni. Nga wizile waamwa ukuti, “Umusumba wakwe Davidi.”

⁶ Davidi avwanga ati, “Umuntu wino alatandikila penepo ukukoma umwina Yebusi alaya musika mukulu uwa vita.” Lyene Yoabu, wino nyina wali a Zeluya, uwatungulwile aina Izlaeli ku ulwi, nga aya amusika mukulu uwa vita.

⁷ Apamulandu wakuti Davidi waile aikala mu musumba ulya uwi linga, alino cino yautemile izina yati Umusumba wakwe Davidi.

⁸ Davidi wakuululwile umusumba ukutandikila sile pa ncende yapa Milo pano yazifizye ulung'umba lwa ku ufumondaka wa kamwamba. Alino Yoabu nawe azifya ncende iyasyala yamu musumba mukasi.

⁹ Cila nsita Davidi walundulukanga umu kukwata amaka, pano Yawe Wamaka yonsi wali nawe.

Asilika alumbuke yakwe Davidi

¹⁰ Uu uli utantiko wa asilika alumbuke yakwe Davidi. Yakwene pali pamwi na ina Izlaeli asyala yazwilizye Davidi ukuya umwene, ndi muno Yawe walavile. Nga yazwilizye nu kukomya uwene wakwe.

¹¹ Uwakutandikila penepo wali a Yasyobeamu, uwamu luko lwakwe Hakimoni, uwali umukalamba wa ntunguluzi apa antu yalya. Wene walwisizye antu imyanda itatu nu kuyakoma yonsi pyu umu ulwi onga.

¹² Uwalondelela penepo a Eleaza umwana wakwe Dodo, uwamu luko lwakwe Aoi.

¹³ Wene wazwilizye Davidi ukulwisya aina Filisti ku ulwi waku Pasi Damimu. Wali mu calo ca mbezu zyakwe baale apa nsita ino aina Izlaeli yatandike ukuutuka.

¹⁴ Acino yene pali pamwi na antu yakwe yasile pakasi ka calo cici, yacicingilila nga yakoma aina Filisti. Yawe nawe amupeela ucimvyo ukulu wakwe cimwi.

¹⁵ Uwanda umwi asilika yatatu pali yao ali akalawane, yaile ku mulunda kuno Davidi watenzi apipi ni cele lyaku Adulamu. Cali apa nsita ino iumba limwi lya ina Filisti lyacisile inkambi mu Cifoloma ca Lefaimu.

¹⁶ Apa nsita ilya, walanga Davidi acili apa kalundu ka malinga, nga ni umba limwi lya ina Filisti ala lyapoka Betelemu nu kwikala mwenemo.

¹⁷ Davidi aluuka ukuya ku musumba nga avwanga ati, “Si cange cizipe umwi andetele amanzi yakumwa ukufuma ku cifula icaya pipi ni mpongolo yaku Betelemu!”

¹⁸ Fwandi asilika yatatu alumbuke ali pakuipatikizya kupita mu nkambi ya ina Filisti, yaya yatapa amanzi mu cifula, nga yaletela Davidi. Davidi nawe atamwile amanzi yayo, lelo ayapongolwela pansi wa wila kuli Yawe.

¹⁹ Alino avwanga ati, “Ntangamwa amanzi yaa! Cingakolana kwati nkumwa uwazi wa antu yaya atasakamile umi wao!” Acino wene wakanyile ukumwa amanzi yayo. Vii, ivyali vili vicitwa vyakuposya kwa asilika yaya yatatu alumbuke.

²⁰ Abisyai umwina wakwe Yoabu wali intunguluzi ya vita vivi amakumi yatatu. Wene walwisizye ivita ni sumo lyakwe, nga avikoma. Ivita vivyo vyali amakumi yatatu. Ali vino walumbwike apa antu yaya amakumi yatatu.

²¹ Wene walumbwike ukuluta yaya yonsi amakumi yatatu, nupya aya intunguluzi yakwe yonsi. Lelo atalumbwike ukuluta yaya amakumi yatatu.

²² Benaya umwana umonsi wakwe Yeoyada, uwaku Kabizeele, wali umusilika umulumbuke. Wene wacisile ivintu ivikulu, ukwika penepo nu kukoma ivita vikulu viili ivya ina Moabu. Wene watazile aingila mu ciwina nga akoma cisama pa wanda uno kwali cuma umukamantane wa mawe.

²³ Nupya wakomile umwina Eguputo, icilipaka ca monsi cituuluke. Umu utali cali ukuluta pali yamita yaili. Nupya caipangisye ni sumo ilitali ilikoline wa mulongoti wakwe kapikula. Benaya wene wacilungime sile ni ntuwa, afika acisompola isumo, alino awela acitota nalyo nga icifwa nu kufwa.

²⁴ Fwandi vivyo vili vicitwa vikulu vino Benaya umwana umonsi wakwe Yeoyada, wenga pali yayo amakumi yatatu, wacisile.

²⁵ Wene wali umukalawane pali yayo amakumi yatatu, lelo atalumbwike ukuluta yaya yatatu. Davidi wamucisile umukalamba pali yakalinda.

²⁶ Yaa ali antu yakalawane nayauze. Amazina yao a Asaeli umwina wakwe Yoabu, Elianani umwana umonsi wakwe Dodo, uwaku Betelemu.

²⁷ Syamoti uwaku Halodi, Helezi uwaku Peloni,

²⁸ Ila umwana umonsi wakwe Ikesyi waku Tekoa, Abiezeli uwaku Anatoti,

²⁹ Sibekai uwaku Husya, Ilai uwaku Aoi,

³⁰ Maalai uwaku Netofa, Heledi umwana umonsi wakwe Baana uwaku Netofa,

³¹ Itai umwana umonsi wakwe Libai uwaku Gibeya mu mpanga yakwe Benjamini, Benaya uwaku Pilatoni,

³² Hulai uwaku vifoloma ivya pipi nu ku Gaasyi, Abiyeli uwaku Alibati.

³³ Azimaveti uwaku Baalumi, Elyaba uwaku Syaaliboni,

³⁴ na ana yakwe Hasyemu uwaku Gizoni, Yonatani umwana umonsi wakwe Syage, uwaku Halali.

³⁵ Aiyamu umwana umonsi wakwe Sakali uwaku Halali, Elifala umwana umonsi wakwe Uli.

³⁶ Hefeli uwaku Mekelati, Aiya uwaku Peloni,

³⁷ Hezilo uwaku Kalimeli, Naalai umwana umonsi wakwe Ezibai.

³⁸ Yowelo umwina wakwe Natani, Mibali umwana umonsi wakwe Hagili,

³⁹ Zeleki uwaku Amoni, Naalai uwaku Beloti, umusenda mpamba wakwe Yoabu umwana umonsi wakwe Zeluya,

⁴⁰ Ila uwaku Itili, Galebu uwaku Itili,

⁴¹ Uliya umwina Hiti, Zabadi umwana umonsi wakwe Aalai.

⁴² Adina umwana umonsi wakwe Syiza umwana wakwe Lubeni, uwali umukalamba wa mutundu wakwe Lubeni, na antu yaya amakumi yatatu pamwi nu mwisikulu.

⁴³ Hanani umwana umonsi wakwe Maaka, Yosafati uwaku Mitini,

⁴⁴ Uziya uwaku Asyitelati, Syama na Yeiyeli ana aonsi yakwe Hotamu uwaku Aloeli.

⁴⁵ Yediaeli umwana umonsi wakwe Syimili, na Yoa uwaku Tizi,

⁴⁶ Eliyeli uwaku Maavi, Yelibai na Yosyaviya ana aonsi yakwe Elinaamu, Itima umwina Moabu,

⁴⁷ Eliyeli, Obedi na Yaasieli uwaku Mezobai.