1 Milandu 10 - Amazwi Yakwe Leza 2013

Imfwa ya mwene Saulo

¹ Aina Filisti yalwile inkondo na ina Izlaeli pa Mwamba wa Giliboa. Aina Izlaeli yafwile nyanya. Asyala kumwi nu mwene Saulo na ana yakwe aonsi yutwike.

² Lelo aina Filisti yayazinginye yasuka yayazana nga yakoma na ana aonsi yatatu yakwe Saulo, na mazina yao a Yonatani, Abinadabu na Malikisyua.

³ Fwandi ulwi wali ukalipisye sana pali Saulo. Uluceto lwa anisi yao lwizile lumukwesa nu kumucisa uyi uyi.

⁴ Saulo wiyo apali pakunena umusenda mpamba wakwe ati, “Somola ulupanga lwako unkome, pakuti iviyantu vii ivitamanya Leza vitiza vyansoweka.” Lelo umulumendo wilya auvwa intete wakwe cimwi izyakucita cico. Acino Saulo atoola ulupanga lwakwe umwisikulu, alusimpa, nga aponela penepo, aikoma.

⁵ Umusenda mpamba wilya lino walola ukuti Saulo wafwa, nawe kwene acita icili cimwi kwene, nga afwa.

⁶ Acino Saulo pali pamwi na ana yakwe yatatu aonsi iyafwa, nga kutasiile nanti umwi uwamu mupanda wakwe uwakuti ateeke.

⁷ Alanga aina Izlaeli asile ku Cifoloma ca Yezileele yuvwa ukuti asilika yonsi yatiyapuuka, ali vino nayo yasile imisumba yao yutuka. Lyene aina Filisti yiza yikala mwenemo.

⁸ Uwanda uwalondelile penepo pacisila lino inkondo yatisila, aina Filisti yizile ku kusampa ivyali ku vyala. Ali pakuzana pano Saulo na ana yakwe yatuzi pa Mwamba wa Giliboa

⁹ Alino yaputula umutwe wakwe Saulo, nga yatoola ni vilwilo vyakwe vyonsi. Alino yatuma inkombe zyao kuti yavipisyanye umu mpanga ya ina Filisti kuti yakalande ilandwe lisuma kuli tuleza twao nga nu ku antu yao.

¹⁰ Alino iyaya yika ivyanzo vyakwe Saulo mu ng'anda yao imwi yamapepo yakwe Dagoni, leza wao.

¹¹ Alanga aikazi yaku Yabesyi Gileadi yuvwa vino aina Filisti yatiyacita kuli Saulo,

¹² yatuma antu yamwi aposye kuti yakatole icala cakwe Saulo ni vya ana yakwe aonsi. Alino yasenda ivyala vivi ku Yabesyi. Yaya yavizika kuku umwisika ya muti umuoko, nga yata ukulya amanda cinimbali.

¹³ Saulo wafwile pamulandu wakuti atali uwacumi kuli Yawe. Wene atayelanga amasunde yakwe Yawe. Walondanga utunguluzi ukupitila mu kusapola ku mipasi ya afwe

¹⁴ mu cifulo ca kuuzya kuli Yawe. Acino Yawe amukoma nga alasika Davidi, umwana wakwe Yese, apa cilimba ca wene.