1 Kolinto 8 - Amazwi Yakwe Leza 2013

Vyakulya ivyapeelwa impolelwa ku tuluwi

¹ Muli kalata wino mwandembile mwanguzizye pamulandu ni vyakulya vino vyapeelwa mpolelwa ku tuluwi. Cacumi, swensi kwene tumanyile pa cintu cii. Lelo kumanya kwene kuu, kukatulenga kuitutumula pamulandu witu sweisikulu, lino kutemwa kwene kukatulenga kwazwa yauze.

² Wino wensi akaelenganya vino wamanya cimwi, mucumi wene atamanya ndi vino alinzile kumanya.

³ Lelo Leza wene asyatwisika umuntu wino wamutemwa.

⁴ Acino lyene nanti angala vyakulya vikapelwa impolelwa ku tuluwi, swemo twamanya vino kutaya nanti kaluwi konga muno mu nsi kano kaya nu umi. Twamanya vino kwaya Leza wenga sile.

⁵ Nanti angala vintu vingi mwiyulu na pano pansi vikaamwa ukuti, “Yaleza,” nga nu kuti, “Yamwene,”

⁶ lelo swemo twakwata Leza wenga sile. Wene ali Tata nga aliwe kwene ali kaumba wa vintu vyonsi, nupya swemo tukamutumikila. Yesu Klistu sile ali Mwene witu. Vintu vyonsi vyaumvilwe na aliwe, nga munoli swemo twapelwa umi.

⁷ Lelo asi yonsi amanya cumi cii. Antu yamwi aingi mu kukula kwao yataila vino tuluwi twaya nu umi. Caleka lino yakulya vyakulya vya musango uu, yene ala yacili yakwelenganya vino yakulya vyakulya vyapeelwa ku tuluwi. Myenzo yao yatonta, nupya yakoweziwa.

⁸ Lelo vyakulya vitangatupalamika pipi na Leza. Tutalaponzya cimwi ndi tusyalya, nanti kukwata cimwi ndi tukulya.

⁹ Lelo mucenjele nu untungwa winu uo pa kucita vintu, pano ungaya cisiki cakuponya atonte asi nu utailo ukome.

¹⁰ Ndi cali umuntu akweti mwenzo uutonte wakulola we muno ukweti “Kumanya” ukulya vyapeelwa impolelwa ku tuluwi, uzye cii citalamukomelezya kulya vyakulya vyapeelwa impolelwa ku tuluwi?

¹¹ Lyene umuntu wii mutonte, munyonko wino Klistu wafwilile alalowa pamulandu wa “Kumanya kwako!”

¹² Ndi mwifya ina Klistu yauzo musango kwene uu, nu kucisa myenzo yao ala mukwifya kuli Klistu kwene.

¹³ Caleka, ndi cakulya cii cingalenga mwinane kupumika ale lyene ntalatala ndye inyama nupya, pakuti ntalenga mwinane apone.