1 Kolinto 7 - Amazwi Yakwe Leza 2013

Mauzyo pamulandu wa utwazi

¹ Lyene pamulandu wa vintu vino mwandembile, cazipila umuntu kuntatwala.

² Lelo pamulandu wa kuti kucita ulenzyo kwati kukula cuze, umonsi wensi alinzile akwate muci wakwe, nga nu mwanaci wensi alinzile akwate iya wakwe.

³ Iya alinzile kufikilizya kulonda kwa muci wakwe ukwa ng'anda. Vivyo kwene muci nawe alinzile kufikilizya kulonda kwakwe iya.

⁴ Mwanaci mwili wakwe usiwakwakwe lelo uwakwe iya. Vivyo kwene nu monsi nawe mwili wakwe usi wakwakwe lelo uwa muci wakwe.

⁵ Caleka cila wenga atalinzile kukanya kufikilizya kulonda kwa mwili ku muze, suka sile ndi mwati muzumilizyanya kuntacita cii pamulandu wakuti musumbe nsita mu kupepa. Lelo mulinzile kutandika nupya kufikilizya ivyaya mu utwazi. Mu musango kwene uu, amuno mulacingililwa ku mezyo yakwe Ciwa pamulandu wa kuntaikanya kwinu.

⁶ Ntakupeela ilamulo kunomuli lino nkumunena cii, lelo nkumuzumilizya sile.

⁷ Endi! Nemo ningatemwa ndi cakuti antu yonsi yakolana nani. Lelo Leza wapela uwila uiyele kuli cila muntu, onga ku muntu wenga nga nauze kuli muze.

⁸ Ndakai, nkunena mwe muno mutatwala nanti kutwalwa ukuti cingazipisya mutwalilile kwikala mu usimbe wakwe vino nani nikala.

⁹ Lelo ndi mutangaikanya mweisikulu, cingazipisya mule mutwale nanti mutwalwe, pamulandu wa kuntaikanya kwinu. Cazipisya kutwala nanti kutwalwa kuluta kuya ni mbunu.

¹⁰ Ku antu atwalana nkweti lamulo lyakuyapa. Asi lamulo lyane, lelo lyafuma ku Mwene lyakuti muci atalinzile kutaana niya wakwe.

¹¹ Lelo ndi angacita vivyo, alinzile kutwalilila kwikala mu usimbe nanti limwi awikizyanye niya. Iya nawe atalinzile kuta muci wakwe.

¹² Yauze nao nkuyanena vii (Nemwisikulu, asi Mwene awe), ndi cakuti umwina Klistu umonsi wakwata muci atataila, nga muci nawe wazumila kwikala nawe, wene atalinzile kumuta.

¹³ Vivyo kwene, ndi cakuti mwanaci mwina Klistu watwalwa ku monsi atataila, nga umonsi wiyo wazumila kutwalilila kwikala nawe, wene atalinzile kutaana nawe.

¹⁴ Umonsi atataila nawe kwene akaya mwina Leza lino wasakwa ku mwanaci mwina Klistu. Nu mwanaci kwene atataila akaya mwina Leza lino wasakwa ku monsi mwina Klistu.

¹⁵ Lelo nanti cingaya vivyo, wenga wino atataila akulonda kuti yatane na wiyo ali mwina Klistu, lekini cicitike vivyo kwene. Lino caya vivyo, ndi wenga munoyali mwina Klistu, cingaya a iya nanti muci, wene umuntungwa kucita cico. Leza wamwama kuti mwikale mu mutende.

¹⁶ Uzye lyene wamanya uli, we muci we mwina Klistu, ukuti utangatuula iya wako? Nanti we iya we mwina Klistu, uzye ungasininkizya uli ukuti utangatuula muci wako?

Mwaikala ndi vino Leza wamwama

¹⁷ Cila muntu alinzile kutwalilila kwikala muno Mwene wamusungila na muno Leza wamwamile. Lii, lili lamulo lino nkasambilizya mu mauvi yonsi.

¹⁸ Ndi cakuti umuntu wino wasilamulwa wazumila lwamo lwakwe Leza, wene atalinzile kufisa usilamu wakwe. Ndi cakuti umuntu wino atasilamulwa wazumila lwamo lwakwe Leza, wene atalinzile kusilamulwa.

¹⁹ Pano muntu ndi wasilamulwa nanti foo, cisyakusenula nanti cimwi. Cikalamba ukuyela masunde yakwe Leza.

²⁰ Cila muntu alinzile kwikala mu umi uno wali nao lino wazumile lwamo lwakwe Leza.

²¹ Uzye wali muzya lino Leza wakwamile? Endi, utasakamala. Lelo ndi ungaya muntungwa uomvye untungwa.

²² Pano muzya wino Mwene waama wene muntungwa ku Mwene. Mu musango uli onga kwene muntu muntungwa wino Klistu waama wene muzya wakwe.

²³ Mwemo Leza wamukala pa mutengo ukulu. Caleka mutaya azya ya antu.

²⁴ Inane, cila muntu alinzile kwikalilila mu utandano na Leza ndi vino wali lino Leza wamwamile.

Mauzyo nayauze apa Utwazi

²⁵ Pali vino mwalemvile pamulandu wa antu atatwala, nemo ntakweti lamulo kufuma ku Mwene. Lelo nkupeela langulusi lyane wakwe umwi wino angatailwa pano Mwene waya na mizu kunondi.

²⁶ Pamulandu wa ntazi zikulu zya ndakai, nkwelenganya vino cingazipa kuluta kuti umuntu aikale ndi vino ali.

²⁷ Uzye wemo ukweti muci wako? Lyene utezya kumuta. Uzye wemo utatwala? Lyene utezya ukulonda muci wako.

²⁸ Lelo ndi watwala ale utacisile iifyo, nga ndi cakuti mwanaci wino atatwalwa watwalwa, ale nawe kwene atacisile iifyo. Lelo nkwezya kumucingilila ku ntazi zya cila wanda zino atwala yalakwata.

²⁹ Cino nkusenula inane, icakuti, insita yaticepesya nga kufuma ndakai kwene atwala yalinzile kwikala kwati yatatwala.

³⁰ Na yao akulosya, yalinzile kwikala kwati yasyakulosya, yao akuseka, yalinzile kwikala kwati yatasansamwike. Yao akukala vintu, yalinzile kwikala kwati yasi aine ya vintu vino yakala,

³¹ na yao akaculuzya vintu, yalinzile kwikala kwati yatiikako myenzo yao. Pano insi ii, ndi vino ndakai ili, italikalilila.

³² Nkulonda kuti mutaya na masakamiko. Monsi wino atatwala akasakamala mulimo wa Mwene, pano wene akaezya kuzanzya Mwene.

³³ Lelo umonsi wino watwala akasakamala vintu vyamu nsi, pano wene akalonda kwelenganya vya kuzanzya muci wakwe.

³⁴ Caleka wene akalema viili. Mwanaci atatwalwa nanti a mwali wene akasakamala mulimo wa Mwene, pano wene akalonda kuti mwili nga nu mupasi wakwe vipelwe cuze ku Mwene. Lelo mwanaci wino watwalwa akasakamala vintu vyamu nsi, pano wene akalonda kwelenganya vya kuzanzya iya.

³⁵ Nkulanda vintu vii, pano nkulonda kuti mwazwe. Nsyakwezya kwika viindo pano muli. Lelo mu cifulo cakwe cico, nkulonda kuti mwacita cisuma nupya icampomvu, nga nu kuipelesya mweisikulu ku kutumikila Mwene kwaula ca kumupumvyanya.

³⁶ Pamulandu wakwe lumbwe na mwali, yao yano yelenganya kuntatwalana, ndi cakuti umonsi walola ukuti mipitile yakwe ku mukazyana isi ningo, nga ndi cakuti akweti mbunu nupya wacizana ukuti cazipa yatwalane, lyene yalinzile kutwalana ndi vino akulonda. Musi iifyo mukucita cii.

³⁷ Lelo ndu muntu, kwaula kupatikiziwa, wacizana ukuti cazipa kuntatwala, ndi ali namaka akwikala kwaula kutwala, ale wene wacita ningo.

³⁸ Caleka monsi wino watwala mwali wiyo ala wacita ningo, lelo atamutwite wene wacita ningo kuluta.

³⁹ Mwanaci wino watwalwa wene asi nu untungwa wa kutwalwa lino iya acili nu umi. Lelo ndi iya wafwa, lyene ala waya nu untungwa wakutwalwa ku monsi wensi wino akulonda, cikulu sile ale umonsi wiyo umwina Klistu.

⁴⁰ Nanti cingaya vivyo, mwanaci wiyo angaya ni nsansa kuluta ndi cakuti wikala kwaula kutwalwa. Lii, lili langulusi lyane, nupya nani kwene nkwelenganya vino nkweti Mupasi Wamuzilo.