1 Kolinto 4 - Amazwi Yakwe Leza 2013

Kuomba kwa atumwa yakwe Klistu

¹ Mwatulola wa yaomvi yakwe Klistu yano apelwa mulimo wakwangalila vya nkama vyakwe Leza.

² Cintu conga cino cikalondekwa ku muomvi cakuti alinzile kuya uwakutailwa kuli wino akatumikila.

³ Ndakai cisi cimwi ndi napingulwa namwe nanti cilye ca milandu. Nanti nemwisikulu nsyaipingula.

⁴ Mumwenzo wane muli cumi, lelo cii cisyakusininkizya ukuti nene wakaele. Mwene aliwe akampingula.

⁵ Acino mutalinzile kupingula umuntu ali wensi lino nsita yasontwa itali kuti ifike. Upinguzi wakusyalikizya utalacitika suka Mwene akize. Wene alasokolola paswe vintu vino vyafiswa mu mfinzi, nga nu kuumbula mapange ya nkama aya mu melenganyo ya antu. Alino lyene umuntu wensi Leza alamutasya ndi vino cingamulinga.

⁶ Inane, naomvya Apolo nga na nemwisikulu kuya cilangililo ca kumulangilila vino mazwi yakasenula, yano akati, “Mwalondela ivya tantikwa mu malembelo.” Kutaya nanti wenga uwa munomuli kutasya umuntu umwi nu kusuula muze.

⁷ Uzye aweni uwakwisile kuya mukulu kuluta pa auzo? Uzye Leza atakupile vyonsi vino wakwata? Uzye lyene ungaitumika uli kwati cino wakwata cisi uwila?

⁸ Uzye mukweti vyonsi vino mukalonda? Uzye mwati muya akama? Uzye mwati muya yakateeka kwaula sweswe? Nanti swemo tusivivyo? Endi, vino nalondesya kuti muye yakateeka, pakuti naswe kwene tungaya yakateeka pamwi namwe.

⁹ Pano kunondi caloleka ukuti Leza wapela cifulo cakusyalikizya kuli sweswe swe atumwa. Tuli wa antu avunukwa ku kukomwa pa swe, nupya tuli akutambwa ni viumbwa, asi antu yatupu, lelo na angeli kwene.

¹⁰ Pamulandu wakwe Klistu antu yakutulola wa viwelewele. Lelo mwemwe yamano muli Klistu! Swemo sweswe atonte, lelo mwemo mwemwe yakomeleke! Swemo twasulwa, lelo mwemo mwacindikwa.

¹¹ Na ndakai kwene tukupita ala tuli ni nzala nu lusala. Tuzwite nsamu. Tukaumwa. Tukazeya kufuma mu cifulo conga kuya ku cuze.

¹² Tukavuneka ni milimo ikome kuti tuilisye. Lino antu yatutipwila, swemo tukalenga Leza kuti ayapolelele. Lino antu yatuzunya, swemo tukaposya.

¹³ Lino antu yatutuka, swemo tukaasuka na mazwi ya mutembo. Ndakai antu yakatulola wa vikona vyamu nsi, nga nu kuti sweswe yaipe cuze mu antu yonsi amu nsi!

¹⁴ Nkumulembela cii, asi pamulandu wa kumucita insonyi, lelo apakuti imusambilizye wa akundwe.

¹⁵ Mungaya na yakasambilizya mazimbi ikumi mu wina Klistu winu, lelo mutangaya na yaso aingi, nemo nizile nja wakwe so pa kukosola Ilandwe Lisuma kunomuli.

¹⁶ Acino ndakai nkumulenga kuti mukolane nani mu micitile.

¹⁷ Uli mulandu uno nkutuma Timoti kunomuli. Nemo namutemwa wa mwana, nupya wene umuomvi mutailwe wa Mwene. Wene alamwiusya vintu vino nkacita mu kulondela Klistu, vino vitapusana kuli vino nkasambilizya mu mauvi yonsi.

¹⁸ Yamwi munomuli yakuitumika kwati ntaliza ku kumutandalila.

¹⁹ Ndi cakuti Mwene akasi, ndiza zuwazuwa kunomuli, nga lyene nemwisikulu ndalondelezya milimo ya antu yaa amataki ndi yakuomba nanti kuvwanga sile.

²⁰ Pano mu Wene wakwe Leza asi kulandikisya sile mazwi, lelo ukuomba.

²¹ Uzye icani cino mukulonda nkacite lino ndiza? Uzye mukulonda nkize nkamufulule nanti nkize nu mwenzo wa kutemwa nu ufuke?