1 Kolinto 3 - Amazwi Yakwe Leza 2013

Aomvi yakwe Leza

¹ Inane, nemo ntavwanzile kunomuli ndi vino nkavwanga ku antu ali na Mupasi Wamuzilo. Navwanzile kuno muli wa antu amu nsi ali wa ana anono mu utailo muli Klistu.

² Acino namwimulanga iziya, asi vyakulya vikome, pano alanga mutali kuti muiteyanye kuvilya,

³ pano micitile inu icili wa micitile ya antu amu nsi. Pakasi kinu mukuzuwilana nu kulemanila wenga nu muze. Uzye cii cisyakusininkizya vino mwemwe amu nsi, mukucita vintu kulingana ni miyele ya muno nsi?

⁴ Lino umwi uwa munomuli wati, “Nemo nkalondela Paulo,” nga namuze ati, “Nemo nkalondela Apolo,” uzye ale micitile inu isi wa micitile ya antu amu nsi?

⁵ Uzye Apolo aweni? Uzye Paulo aweni? Sweswe aomvi sile yakwe Leza, yao amwazwilizye kuti mutaile. Cila wenga uwa munotuli akaomba mulimo uno Leza wamupile kuti acita.

⁶ Nemo natile imbezu, Apolo nawe azikontelela manzi, lelo Leza aliwe walenzile kuti zikule.

⁷ Muntu wino akata imbezu nanti wiyo akakontelela, oili yasi cimwi. Cikalamba u kusakamala kwakwe Leza, wino akalenga kuti vimelwa vikule.

⁸ Pasi kupusana pa muntu akata imbezu nga na wino akazikontelela manzi. Leza alalambula cila wenga uwa munotuli kulingana ni milimo ino waomba.

⁹ Pano sweswe aomvi alemana pamwi mu kuombela Leza, nga namwe mwemwe calo cakwe Leza. Nupya mwemwe cikulwa cakwe Leza.

¹⁰ Leza wampile uwila wakuya nkonkotela yamakule, nga nani naomvizye uwila uu pa kwimba mufula, uno umuntu muze akukuulapo. Lelo cila muntu alinzile atekele musango uno akukuulilamo.

¹¹ Pano Leza wimba mpiti mufula onga sile, nu mufula uu, a Yesu Klistu nga kusi mufula na uze uno ungimbwa.

¹² Yamwi yakaomvya zaabu nanti siluva nanti mawe amutengo ukulu cuze, pa kukuula pa mufula. Yamwi nao yakaomvya imiti nanti isote nanti makambalala.

¹³ Lelo umpomvu wa mulimo wakwe cila muntu ulaloleka lino Wanda wakwe Klistu ulausokolola. Pano pa Wanda ulya umoto uno Leza alatuma ulezya mulimo uo nu kulanga umpomvu wakweo vino uli.

¹⁴ Ndi cico icakuzilwe pa mufula citalapya mu moto, ale lyene kakuula wakweco alapokelela cilambu.

¹⁵ Lelo ndi cilapya mu moto, ale lyene kakuula wakweco atalapokelela cilambu, lelo umwisikulu wene alatuulwa wa muntu akuutuka kufuma mu moto.

¹⁶ Cumi mwemo mwamanya vino mwemwe Ng'anda ikulu yakwe Leza nga na vino Mupasi Wamuzilo akaikala munomuli.

¹⁷ Caleka umuntu umwi ndi wonona Ng'anda ikulu yakwe Leza, Leza nawe alamonona. Pano Ng'anda ikulu yakwe Leza yene iya muzilo, nga mweisikulu mwemwe muli Ng'anda ikulu yakwe Leza.

¹⁸ Muntu nanti umwi ataitumpika. Umwi uwa munomuli ndi akwelenganya vino uwa mano kulingana ni vintu vya muno nsi, nkolelo alinzile aye wa muwelewele, pakuti mucumi aye uwa mano.

¹⁹ Pano cintu cino amu nsi yakwelenganya ukuti ica mano, cene uwelewele pa manso yakwe Leza. Cili ndi vino calembwa mu malembelo cati, “Leza akalema antu yamano mu ucenjezi wao.”

²⁰ Nupya calembwa mu malembelo cati, “Mwene wamanya vino melenganyo ya antu yamano yene yasi nu mulimo.”

²¹ Lyene kutaya umwi wakutumika antu pali vino antu yakacita. Pano vintu vyonsi ivya kwinu.

²² Paulo, Apolo, nga na Petulo, insi ii ya pansi, umi nanti imfwa, ivilipo ndakai nga ni viliza, vii vyonsi ivya kwinu,

²³ nga namwe mwemwe yakwe Klistu, Klistu nawe uwakwe Leza.