1 Kolinto 14 - Amazwi Yakwe Leza 2013

Mawila nayauze kufuma kuli Mupasi Wamuzilo

¹ Mwaezya kupimpa kukwata kutemwa. Ikini myenzo inu pa mawila kufuma kuli Mupasi Wamuzilo, lelo nu kuluta ikini mano pa wila wa kusema ilandwe kufuma kuli Leza.

² Umuntu wino akalandila mu ndimi zitamanyika wene asyalanda ku antu yauze, lelo akalanda kuli Leza pano kusi umwi akamanya vino wene akalanda. Wene akalanda inkama zino Mupasi Wamuzilo sile angamanya.

³ Lelo umuntu wino akasema ilandwe kufuma kuli Leza wene akalanda ku antu ala akuyazwa, akuyakomelezya, nga nu kuyatekezya.

⁴ Umuntu wino akalandila mu ndimi zitamanyika wene akayazwa umwisikulu sile, lelo wino akasema ilandwe kufuma kuli Leza wene akaazwa iuvi lyonsi.

⁵ Ningatemwa kuti mwensi kwene mwalandila mu ndimi zitamanyika. Lelo cingazipisya ndi mwakweti uwila wa kusema ilandwe kufuma kuli Leza. Pano umuntu wino akusema ilandwe kufuma kuli Leza, waluta wiyo akalandila mu ndimi zitamanyika, suka ndi pali umwi pipi uwakulondolola vino vikulandwa, pakuti iuvi lyonsi lyazwiwe.

⁶ Caleka, inane, ndi naca niza kunomuli nu kulandila mu ndimi zitamanyika, uzye cingamwazwa uli? Awe, citangamwazwa, suka sile ndi namuletela umbwilo umwi kufuma kuli Leza nanti kumanya kumwi, nanti kusema kumwi, nanti usambilizyo umwi.

⁷ Ndi vintu vino vitakwata umi, ivili wa mitolilo nanti mazeze vyalila, uzye mungamanya uli kupusana kwa kulila kwakwevyo? Ndi kalizya asyakulizya ningo, wino akuuvwa nawe atangamanya lwimbo luno akulizya.

⁸ Nupya ipenga ndi lyalila kwaula kuvwika ningo, uzye aweni angaiteyanya kuya ku kulwa kwa vita?

⁹ Mu musango uli onga kwene, uzye umuntu angamanya uli vino mukulanda ndi cakuti ilandwe linu lino mukulandila mu ndimi zitamanyika lisyakuvwika ningo? Mazwi inu yatalaya na cino yakusenula.

¹⁰ Muno mu nsi mwaya ndimi zingi zipusanepusane. Lelo kutaya cilimi cimwi cino mazwi yakweco yatakwata vino yakasenula.

¹¹ Lelo ndi nemo ntanguvwa mazwi ya cilimi cikulandwa vino yakusenula, ale umuntu wino akulanda akoline wa mwinamasi kunondi nga nani wa mwinamasi kunoli.

¹² Endi, mwemo mukulondesya kukwata mawila kufuma kuli Mupasi Wamuzilo. Caleka pimpini kuomvya mawila yano mungaomvya, mu kukuula nu kukomelezya iuvi.

¹³ Caleka, umuntu wino akalandila mu ndimi zitamanyika, alinzile kupepa kuti apelwe wila wakulondolola vino akulanda.

¹⁴ Pano ndi nkapepa mu ndimi zitamanyika, ale mwenzo wane ukapepa lelo kampingu wane wene citamupazi.

¹⁵ Uzye lyene ndinzile kucita uli? Namapepanga mu mwenzo nga na muli kampingu wane kwene. Namaimbilanga mu mwenzo nga na muli kampingu wane kwene.

¹⁶ Lino mukutaizya Leza mu myenzo inu sile, uzye umuntu wino muli nawe mu ukongano wa mapepo angavwanga uli ati, “Ameni” kwi pepo linu lya kutaizya,

¹⁷ Cingaya mwemo mukutaizya Leza ningo, lelo umuntu muze wene atangazwiliziwa nanti panono.

¹⁸ Nkutaizya Leza pano nemo nkalandila mu ndimi zitamanyika kuluta mwemwe.

¹⁹ Lelo lino tukupepa mu ukongano wi uvi, nemo cinganzipila kulanda mazwi yasano sile yano yanguvwika pakuti nsambilizye yauze, kuluta kulanda mazwi mazimbi ikumi yano yatanguvwika ku antu yauze.

²⁰ Mwe inane, mute kwelenganya wa ance. Mu viipe muye akaele wa tunya. Lelo mukwelenganya muye wa antu aikolo.

²¹ Calembwa mu malembelo cati, “Ndaomvya antu atamanyika nupya akalanda ndimi zitamanyika pa kulanda ku antu yane. Yene yalalanda mazwi yane kunoyali mu ndimi zitamanyika, lelo antu yane nalyo kwene yatalanguvwa. Avino Mwene walanda”

²² Caleka kulandila mu ndimi zitamanyika cingasenula cimwi ku antu atataila lelo citangasenula cimwi ku antu ataila Mwene. Alino kusema ilandwe lyakwe Leza cingasenula cimwi ku antu ataila, lelo citangasenula cimwi ku antu atataila Mwene.

²³ Lyene ndi iuvi lyonsi lyakongana pamwi nga yonsi kwene yatandika kulanda mu ndimi zitamanyika, alino antu yamwi asi amwi uvi nanti yamwi atataila iiza munomuli, uzye yatangalanda ukuti mwensi kwene mwati mupena?

²⁴ Lelo ndi yakusema ilandwe lyakwe Leza alino kwiza umuntu umwi atataila nanti umwi asi uwa mwi uvi wiza munomuli, wene alasinilwa pa viipe vyakwe pa mazwi yonsi yano akuuvwa. Mazwi yano aluvwa yalamulenga kuzenzuka,

²⁵ alino vifisame vyamu mwenzo wakwe vilaumbulwa paswe, nga nawe alafukama ainame nu kupepa Leza, ale akulanda ati, “Cumi kwene Leza ali pakasi kinu.”

Vintu vyonsi vilinzile vyacitwa mu utantiko wi uvi

²⁶ Inane, lino mwakongana ku kupepa, vii avino cilinzile kuya, umuntu umwi akwimba umwi asambilizya, umwi aumbula vino Leza wamunena, umwi alanda mu ndimi zitamanyika umwi nawe alondolola vino mazwi amu cilimi cico yakusenula.

²⁷ Ndi cakuti pali yamwi akulonda kulandila mu ndimi zitamanyika, lekini yaili nanti yatatu yalande, ale yakulekanila, nga umuntu muze nawe alinzile kulondolola vino vikulandwa.

²⁸ Lelo ndi pasi umwi uwa kulondolola, lyene wiyo akalandila mu ndimi zitamanyika alinzile kwikala cele mu ukongano uwo, ale akulanda na Leza mu mwenzo.

²⁹ Antu yaili nanti yatatu yangasema ilandwe lyakwe Leza, ale yauze yakuuvwa mu kutekela.

³⁰ Lelo ndi cakuti Leza waumbula cimwi ku muntu umwi wino ali penepo, wino akulanda alinzile kuta kulanda.

³¹ Lekini mwensi mwalanda ilandwe lyakwe Leza, ala mukulekanila, pakuti yonsi yasambiliziwe nu kukomeleziwa.

³² Yao akweti wila wakusema ilandwe lyakwe Leza, yalinzile kulekela auze nao yalanda.

³³ Pano Leza asyalonda cimvulunganya, suka sile kuvwana nu mutende. Ndi vino caya mu mauvi yonsi ya antu yakwe Leza,

³⁴ lino yali mu ukongano anaci yalinzile kwikala cele nu kuvwa, pano yene yatazumiliziwa kulanda. Cili ndi vino calembwa mu malembelo ukuti yene yalinzile kwikala cele nu kuvwa.

³⁵ Ndi cakuti yakulonda kuuzya pali cimwi, yalinzile kuuzya ya iya yao ku mang'anda. Cili icansonyi kuzumilizya mwanaci kulanda mu ukongano wi uvi.

³⁶ Uzye mazwi yakwe Leza yafuma kunomuli? Nanti uzye mazwi kwene yaa yavwanzilwe sile kuli mwemwe?

³⁷ Ndi cakuti umuntu umwi akutunganya ukuti wene akasema, alinzile kumanya ukuti vino nkumulembela, ilamulo ilyafuma ku Mwene Leza.

³⁸ Lelo ndi cakuti asyakusumbako mano kuli cii, namwe kwene mutakasumbe mano kunoli.

³⁹ Caleka inane, lyene ikini myenzo inu mu kulanda ilandwe lyakwe Leza, lelo mutainda yauze kulandila mu ndimi zitamanyika.

⁴⁰ Vintu vyonsi vilinzile kucitwa umu nzila isuma nupya itantikwe.