1 Kolinto 12 - Amazwi Yakwe Leza 2013

Mawila kufuma kuli Mupasi Wamuzilo

¹ Inane, nkulonda kuti mumanye cumi pamulandu wa mawila kufuma kuli Mupasi Wamuzilo.

² Mwamanya ukuti lino mwali antu atataila, mwaponziwe umu nzila zingi mu kupepa tuluwi tusivwanga.

³ Nkulonda kuti mumanye vino kusi umwi wino akatungululwa na Mupasi Wamuzilo angavwanga ati, “Yesu atipwe!” Nupya kusi umwi angavwanga paswe ati, “Yesu u Mwene,” suka akutungululwa na Mupasi Wamuzilo.

⁴ Kwaya mawila apusane kufuma kuli Mupasi Wamuzilo, lelo Mupasi ali umwi kwene awino akapela.

⁵ Kwaya nzila zipusane zyakutumikilamo, lelo Mwene ali umwi kwene akatumikilwa.

⁶ Kwaya maka apusane akutumikilamo, lelo Leza ali umwi akapeela maka kuli yonsi akatumikila.

⁷ Mupasi Wamuzilo akapeela cila muntu uwila upusane wa kuomba mulimo wa muzano kuli wensi.

⁸ Mupasi Wamuzilo akapeela umuntu umwi maka akulanda vya mano, nga Mupasi Wamuzilo ali umwi kwene akapeela umuntu muze maka akulanda mazwi akusambilizya.

⁹ Mupasi Wamuzilo ali umwi kwene akapeela utailo ku umuntu wenga, nga ku muntu muze nako akapeela maka akupozya ndwala.

¹⁰ Mupasi Wamuzilo akapeela muntu umwi maka akucita vinjelengwe. Kuli muze nawe amupeela uwila wakulanda ilandwe lyakwe Leza. Kuli muze nawe amupeela maka akulondolola kupusana kwaya pa mawila yano yafuma kuli Mupasi Wamuzilo nga na yano yatafuma kunoli. Kuli muze nawe akamupeela maka akulandila mu ndimi zyuze zitamanyika, nga na kuli muze nawe akamupeela maka akulondolola vikulandwa mu ndimi zitamanyika.

¹¹ Lelo a Mupasi Wamuzilo wenga nupya ali umwi kwene wino akacita vii vyonsi. Kuli cila muntu, wene akapeela uwila uiyele ndi vino akasi.

Aina Klistu yali wa vilundwa vya mwili wakwe Klistu

¹² Klistu akoline wa mwili onga uno ukweti vilundwa vingi. Nanti angala wapangwa ku vilundwa vipusane vingi, wene mwili onga sile.

¹³ Mu musango uli onga kwene, swensi kwene, Ayuda nanti Akulukuwa, azya nanti antungwa, twawatiziwe na Mupasi Wamuzilo ali umwi kwene kuti tuye mwili onga. Nupya swensi twapokelela Mupasi Wamuzilo wenga kwene.

¹⁴ Pano mwili uwisikulu utakwata cilundwa conga sile, lelo wakwata vilundwa vingi.

¹⁵ Ndi cali lwazo lwavwanga lwati, “Nemo nsi kasa, caleka nsi cilundwa ca mwili” uzye lwene lutangaya cilundwa ca mwili pamulandu wakwe cico?

¹⁶ Ndi cali ikutwi lyavwanga lyati, “Nemo nsi linso, caleka nsi cilundwa ca mwili,” uzye lyene litangaya cilundwa ca mwili?

¹⁷ Ndi cali mwili onsi wali linso, uzye umuntu angauvwa uli? Ndi cali mwili wali ikutwi, uzye umuntu anganunsya uli?

¹⁸ Lelo ndi vino cili Leza wiika cilundwa consi pa cifulo caciko, wakwe vino umwisikulu walondanga kuti ciye.

¹⁹ Vilundwa vyonsi iviya cilundwa conga, ale lyene mwili utangayako.

²⁰ Lelo vilundwa vyene ivingi, nanti angala mwili uli onga sile.

²¹ Caleka lyene, linso litanganena ikasa liti, “Ntakukulonda foo!” Nanti mutwe utanganena ingazo uti, “Ntakumulonda, foo!”

²² Mucumi, vilundwa vino vikaloleka vitonte vilivyo vikalondekwa kuluta.

²³ Tukasakamala kusunga ningo vilundwa vya mwili vino tukaelenganya ukuti visi vya mpomvu kuluta. Ku mbali yuze, vilundwa vya mwili vino vikatuletela insonyi vili vino tukazwika ningo

²⁴ kuluta vilundwa viyembesye vikaloleka. Leza umwisikulu uwalundanya vilundwa vya mwili mu musango umwi uwakuti acindamike cuze vilundwa vimwi vya mwili vino vikalonda mucinzi uwo.

²⁵ Wene wacisile cii pakuti alenge vilundwa vya mwili vyonsi vyaomba ningo kwaula kupaatukana, na cila cilundwa casakamala icuze.

²⁶ Ndi cilundwa conga ca mwili cacula, ni vilundwa vyuze navyo vikaculila pamwi naco. Ndi cilundwa conga ca mwili catasiwa, ni vilundwa vyuze navyo vikakumako ku luzango lwakweco.

²⁷ Mwensi kwene mwemwe mwili wakwe Klistu, nupya cila muntu munomuli wene cilundwa cauko.

²⁸ Mwi uvi Leza wika antu yaa, nkolelo atumwa, yakwe ciili akasema, nga yakwe citatu akasambilizya. Alino wika na yao akacita vinjelengwe, nga palondelela yao apelwa maka akupozya nanti kwazwa yauze nanti kuyatungulula nanti kulandila mu ndimi zyuze zitamanyika.

²⁹ Uzye onsi atumwa? Uzye onsi akasema? Uzye onsi akasambilizya? Uzye onsi yakwata maka akucita vinjelengwe?

³⁰ Uzye onsi yakwata maka akupozya ndwala? Uzye onsi yakwata maka akulandila mu ndimi zyuze zitamanyika? Uzye onsi yakwata maka akulondolola vino vikulandwa mu ndimi zitamanyika?

³¹ Awe, lelo mwemo ikini myenzo inu pa mawila acindame kuluta. Ndakai, namamulanga nzila ilusile pali zyonsi.