1 Kolinto 10 - Amazwi Yakwe Leza 2013

Kusokwa pamulandu wa kupepa Tuluwi

¹ Inane, nkulonda kumwiusya vintu vino vyacitikile vikolwe vitu vyonsi ivyalondelanga Mose. Vikolwe vitu vyonsi vyacingililwe ni kumbi, nga nu kupita mutende muli Yemba Muyenzu.

² Cii cali wa kuwatiziwa nga nu kuya alondezi yakwe Mose.

³ Onsi kwene yalile cakulya cili cimwi ca umupasi

⁴ nga nu kumwa cakumwa cili cimwi ca umupasi, cino yamwanga kufuma mu mulunda wa umupasi uno wapitanga nayo. Nu mulunda uo wali a Klistu umwisikulu.

⁵ Lelo nanti cali vivyo aingi munoyali yatazanzizye Leza. Caleka vyala vyao vyasansansilwe monsi mu lwanga.

⁶ Lyene vii vyonsi ivilangililo kunotuli, vya kutusoka kuti tutalonda vintu viipe, ndi vino yene yacisile,

⁷ nanti kupepa tuluwi ndi vino yamwi munoyali yacisile. Cili ndi vino calembwa mu malembelo cati, “Antu yatenzi pansi kuti yalye nu kumwa pacisila yakatuka nu kucina.”

⁸ Tutalinzile kucita ulenzyo, ndi vino yamwi munoyali yacisile nga nu mu wanda onga yene yafwile kulingana mazimbi makumi yaili na yatatu.

⁹ Tutalinzile kwezya Mwene, ndi vino yamwi munoyali yacisile nga pacisila yalumika ni nzoka, yafwa.

¹⁰ Tutalinzile kuilizyanya, ndi vino yamwi munoyali yacisile nga pacisila yononwa nu mungeli wa mfwa.

¹¹ Vintu vii vyonsi vyacitikile vikolwe vitu kuti ciye ukusokwa, nupya vyalemvilwe kuti viye vyakutusambilizya swe muno tukulolela mpelelekezyo yakwe vyonsi.

¹² Wino wensi akwelenganya ukuti aimi nu kuzyansya, wene alinzile kutekela kuti atapona.

¹³ Ukweziwa konsi kuno kukamucitikila, kuli kumwi kwene ukukacitikila antu yauze. Lelo Leza wene uwakutailwa. Wene atalazumilizya kuti mweziwe kuluta pali vino mungaposya. Pa nsita ino mukweziwa, wene alamulanga inzila yakuleukila matunko pa kumupeela maka akuti muposye.

¹⁴ Acino mwe yacuza akundwe, leukini ku kupepa tuluwi.

¹⁵ Nkulanda kunomuli wa antu yamano. Muipingule mweisikulu pali vino nkumunena.

¹⁶ Pa Cimulo ca Mwene, lino tukamwa mu lwako nu kutaizya Leza, uzye tusyakumako ku kwankana wazi wakwe Klistu? Lino tukamokoola umukate nu kulya, uzye tusyakumako ku kwankana mwili wakwe Klistu?

¹⁷ Pa kukumako ku kwankana umukate uli onga kwene, swensi tukaya mwili onga, nanti angala tuvuzile.

¹⁸ Elenganyini pa ina Izlaeli. Yao akalya vyapeelwa impolelwa yakakumako ku kutumikila Leza pa kavuwa.

¹⁹ Uzye nkulanda ukuti tuluwi nanti vyakulya vino vikapelwa impolelwa vikweti muzano umwi?

²⁰ Awe, cisi viyo! Mucumi vyakulya vivyo vikapelwa impolelwa ku mipasi yankota, asi kuli Leza. Ntakulonda kuti mwemo mwandane ni mipasi yankota.

²¹ Mutangamwa mu lwako lwa Mwene nga nu mulwako lwa mipasi yankota. Mutangalya pa cipango ca Mwene nga na pa cipango ca mipasi yankota.

²² Nanti uzye tukulonda kuleka Mwene aye nu uzuwa? Swemo tutaluta Mwene maka.

²³ Swemo tungati, “Vintu vyonsi vyazumiliziwa kunotuli,” lelo asi vyonsi vingatwazwa. Vintu vyonsi vyazumiliziwa, lelo asi vyonsi vili nu muzano.

²⁴ Tulinzile kwelenganya pa vilondwa vya antu yauze, asi sile pa vilondwa vitu.

²⁵ Nanti cingaya vivyo, mwemwe antungwa kulya cintu cili consi cikakaziwa mwi sokoni lya nyama, kwaula kuuzya iuzyo nanti lyonga pakuti mutasakamika myenzo inu.

²⁶ Pano calembwa mu malembelo cati, “Insi nga na vyonsi ivyaya mwenemo ivya Mwene.”

²⁷ Ndi cakuti umuntu umwi wino atataila watamwimula, wamwama ku kulya vyakulya nga namwe mwazumila kuya kweneko, lyene yangini mukalye vino watamwimula, kwaula kuuzya iuzyo nanti lyonga, pakuti mutasakamika imyenzo inu nupya pamulandu nu kukowela.

²⁸ Lelo umwi ndi wamunena wati, “Vyakulya vii, vyapeelwa impolelwa ku tuluwi,” lyene mutalya vyakulya vivyo, pamulandu wakuntaleta intazi kuli wiyo uwatamunena nga na pamulandu wa kuntasakamika myenzo inu.

²⁹ Asi myenzo inu lelo a kampingu wa muntu wali wamunena. “Endi, lyene,” umwi anganguzya ati, “Uzye pacani ntangaya nu untungwa uwakucita cino nkasi pamulandu wakwe kampingu wa muntu muze?

³⁰ Ndi nkataizya Leza pa vyakulya vyane, pacani umuntu muze anganenola pamulandu wa vyakulya vino nkapelelapo ntaizyo?”

³¹ Endi, consi cino mukucita, cingaya ukulya nanti kumwa, mucicite ku lulumbi lwakwe Leza.

³² Ikalini mu musango uno utangaleta intazi ku Ayuda nanti Akulukuwa nanti kwi uvi lyakwe Leza.

³³ Mwacita sile ndi vino nani nkacita, kwezya kuzanzya antu yonsi muli vyonsi vino nkacita, kwaula kuyelenganyizizya visuma nemwisikulu, lelo visuma vya kwazwa yauze pakuti yangatuulwa.