Bhaebulaniya 1 - ULufingo uLupwa

ɄMʉlʉngʉ akʉlonga nɨɨtwe kʉshɨlɨla kwa Mwana waakwe

¹ Ɨmaandɨ, ʉMʉlʉngʉ álonjile na bhamaama bhɨɨtʉ kʉshɨlɨla ku bhakuwi. Ábhombile shiniishi akhinji, na kʉ madala nɨɨgo nɨɨgo.

² Ɨleelo insiku izi ɨzya papɨɨpɨ na kʉmpeleela, ʉMʉlʉngʉ alonjile nɨɨtwe kʉshɨlɨla kwa Mwana waakwe. Ámʉsabhʉʉye wʉnʉʉyo ʉMwana agaale ivintu vwonti, khabhɨlɨ kʉshɨlɨla kʉkwakwe ʉMʉlʉngʉ ápelile kʉmwanya na paasɨ na vwonti vwe vɨlɨ mʉmwo.

³ ɄMwana waakwe wʉnʉʉyo we akʉlama ku wumwamu wa Mʉlʉngʉ, kʉnongwa ye ʉweene shifwani sha Mʉlʉngʉ wʉʉyo. Kʉ makha gi zwi lyakwe akʉlɨndɨɨlɨla ivintu vwonti. We abhazelufwa abhantʉ kwepa mu mbiibhi zyabho, ayɨkhaaye ɨnyoobhe ɨya kʉndɨɨlo ɨya Mʉlʉngʉ apa lushindikho ʉlʉpɨtɨ nhaani kʉmwanya.

UYeesu mʉpɨtɨ kʉshɨla abhakhabhɨzya

⁴ ɄMʉlʉngʉ ámubhiishile ʉMwana waakwe abhe mʉpɨtɨ kʉshɨla abhakhabhɨzya, anza she ámupiiye ɨtaawa lye lɨpɨtɨ kʉshɨla amataawa gaabho.

⁵ Kʉnongwa ye ʉMʉlʉngʉ atámubhuziizye ʉkhabhɨzya ngaweeka mʉ bhakhabhɨzya bhaakwe kʉtɨ, “Ɨwe we Mwana waanɨ, ʉmʉsanyʉʉnʉ nabha ne Taata waakho.” Khabhɨlɨ ʉMʉlʉngʉ atálonjile amazwi ganaaga kwa khabhɨzya wowonti kʉtɨ, “Ɨne ɨntɨbhe ne Taata waakwe, woope atɨbhe Mwana waanɨ.”

⁶ Ɨleelo ʉMʉlʉngʉ we akʉmʉsonteelezya ʉMwana waakwe ʉwa kwanda kʉpaapwa mʉ nsɨ, átɨlɨ, “Abhakhabhɨzya bhonti abha Mʉlʉngʉ bhamupuutaje ʉweene.”

⁷ Khabhɨlɨ we akʉlonga kʉ zya bhakhabhɨzya, átɨlɨ, “Akʉbhabhɨɨkha abhakhabhɨzya bhaakwe kʉbha mupepu, bhoope abhabhombi bhaakwe akʉbhabhɨɨkha kʉbha ngatɨ mbɨɨtʉ zya mwoto.”

⁸ Ɨleelo kʉ zya Mwana waakwe akʉtɨ, “We Mʉlʉngʉ, ʉwʉmwene waakho wʉtɨjendeelele wiila na wiila! Ɨwe ʉkʉtabhaala mʉ wʉmwene waakho ku wugolosu.

⁹ Ɨwe uyiganile uwugolosu, ɨleelo ukuwuviitilwa uwubhiibhi. Ye nongwa ʉMʉlʉngʉ, ʉMʉlʉngʉ waakho, akupashile amafuta aga kʉkʉkhondezya na kʉkʉbhɨɨkha kʉbha we mʉpɨtɨ kʉshɨla abhamwinyu bhonti.”

¹⁰ Khabhɨlɨ ʉMʉlʉngʉ akʉmʉbhʉʉzya ʉMwana waakwe akʉtɨ, “Ɨwe Mwene we wápelile ɨnsɨ kʉwandɨlo, khabhɨlɨ we wápelile kʉmwanya nɨ nyoobhe zyakho.

¹¹ Vɨnɨɨvwo vwonti vikhayisila, vɨkhayɨlala anza menda. Ɨleelo ɨwe ʉkhayɨbha insiku zyonti.

¹² Ɨwe ukhayizivungaanya-vungaanya anzɨ golole, anzʉ mwenda zɨkhayɨlala. Ɨleelo ɨwe ʉtakʉgalʉnhana, amanha gaakho gatakusila naalumo.”

¹³ Bhʉlɨ, khabhɨzya alikwi we ʉMʉlʉngʉ amubhuziizye lumo kʉtɨ, “Yɨɨkhala kʉmbalɨ ɨyɨ nyoobhe yaanɨ ɨya kʉndɨɨlo, paka we nabhabhɨɨkha abhalʉgʉ bhaakho paasɨ pa vɨnama vwakho”?

¹⁴ Pe shɨnɨɨsho, abhakhabhɨzya bhe bhooni? Mpepu zye zɨkʉmʉbhombela ʉMʉlʉngʉ, woope akʉzɨsonteelezya zɨbhabhombelaje bhaala bhe bhakhayɨposheela uwuposhi.