സെഖര്യാവ് 5 - സത്യവേദപുസ്തകം C.L. (BSI)

പറക്കുന്ന ഗ്രന്ഥച്ചുരുൾ

¹ മറ്റൊരു ദർശനത്തിൽ പറന്നു പോകുന്ന ഒരു ചുരുൾ ഞാൻ കണ്ടു.

² “നീ എന്തു കാണുന്നു” എന്നു ദൂതൻ എന്നോട് ചോദിച്ചു. “പറന്നുപോകുന്ന ഒരു ചുരുൾ, അതിന് ഇരുപതുമുഴം നീളവും പത്തുമുഴം വീതിയുമുണ്ട്” എന്നു ഞാൻ പറഞ്ഞു.

³ പിന്നീട് അദ്ദേഹം ഇങ്ങനെ തുടർന്നു: “അത് ദേശമാസകലം വ്യാപിക്കുന്ന ശാപമാകുന്നു. അതിൽ എഴുതിയിരിക്കുന്ന പ്രകാരം കള്ളസ്സത്യം ചെയ്യുന്നവരും മോഷ്ടാക്കളും ആയ എല്ലാവരും ഇനിമേൽ നശിപ്പിക്കപ്പെടും.”

⁴ സർവശക്തനായ സർവേശ്വരൻ അരുളിച്ചെയ്യുന്നു: “ഞാൻ അത് അയയ്‍ക്കും; അതു മോഷ്ടാവിന്റെ വീട്ടിലും എന്റെ നാമത്തിൽ കള്ളസത്യം ചെയ്യുന്നവന്റെ വീട്ടിലും പ്രവേശിക്കും. അത് അവന്റെ വീട്ടിൽ കടന്ന് അതിലെ കല്ലും മരവും ഇടിച്ചു നശിപ്പിക്കുന്നതുവരെ അവിടെ വസിക്കും.”

അളവുകുട്ടയിലെ സ്‍ത്രീ

⁵ എന്നോടു സംസാരിച്ച ദൂതൻ പുറത്തുവന്ന് എന്നോടു പറഞ്ഞു: “ഈ പോകുന്നത് എന്തെന്നു നീ നോക്കുക.”

⁶ “ഇത് എന്ത്” എന്നു ഞാൻ ചോദിച്ചു. ദൂതൻ പറഞ്ഞു: “ഇതു സഞ്ചരിക്കുന്ന അളവുകുട്ട ആകുന്നു. അത് ദേശത്തെങ്ങും ഉള്ളവരുടെ അകൃത്യം ആണ്.”

⁷ പിന്നീട് ഈയംകൊണ്ടുള്ള അതിന്റെ അടപ്പ് ഉയർത്തപ്പെട്ടു. അതാ, അതിനുള്ളിൽ ഒരു സ്‍ത്രീ ഇരിക്കുന്നു.

⁸ “ഇതാണു ദുഷ്ടത” എന്നു ദൈവദൂതൻ പറഞ്ഞു. പിന്നീടു ദൂതൻ ആ സ്‍ത്രീയെ കുട്ടയുടെ ഉള്ളിലാക്കി ഈയപ്പലകകൊണ്ട് അതു മൂടി.

⁹ വീണ്ടും ഞാൻ ദർശനത്തിൽ രണ്ടു സ്‍ത്രീകൾ പറന്നു വരുന്നതു കണ്ടു. അവർക്കു കൊക്കിൻറേതുപോലെയുള്ള ചിറകുകൾ ഉണ്ടായിരുന്നു. അവർ ആകാശത്തേക്ക് അളവുകുട്ട ഉയർത്തിക്കൊണ്ടുപോയി.”

¹⁰ അവർ അളവുകുട്ട എവിടേക്കു കൊണ്ടുപോകുന്നു” എന്നു ഞാൻ ചോദിച്ചു.

¹¹ അതിനു ദൂതൻ പറഞ്ഞു: “ശിനാർദേശത്ത് അതിനുവേണ്ടി ഒരു വീടു നിർമിക്കാൻ പോകുന്നു. അത് പൂർത്തിയായാൽ അളവുകുട്ട അതിനുള്ളിൽ സ്ഥാപിക്കും.”