സെഖര്യാവ് 14 - സത്യവേദപുസ്തകം C.L. (BSI)

സർവേശ്വരന്റെ ദിനം

¹ ഇതാ സർവേശ്വരന്റെ ദിനം വരുന്നു. അന്ന് യെരൂശലേമിൽനിന്ന് കൊള്ളയടിച്ച മുതൽ നിങ്ങളുടെ കൺമുമ്പിൽവച്ചുതന്നെ അവർ പങ്കിടും.

² യെരൂശലേമിനോടു യുദ്ധംചെയ്യാൻ ഞാൻ സകല ജനതകളെയും ഒരുമിച്ചുകൂട്ടും. നഗരം പിടിച്ചെടുക്കപ്പെടും. വീടുകൾ കൊള്ളയടിക്കപ്പെടും. സ്‍ത്രീകൾ അപമാനിക്കപ്പെടും. നഗരവാസികളിൽ പകുതിയും പ്രവാസികളായിത്തീരും. എന്നാൽ ശേഷിക്കുന്ന ജനത്തെ നഗരത്തിൽനിന്നു വിച്ഛേദിക്കുകയില്ല.

³ യുദ്ധദിനത്തിൽ എന്നപോലെ സർവേശ്വരൻ പടയ്‍ക്കു പുറപ്പെട്ട് ആ ജനതകളോടു പോരാടും.

⁴ യെരൂശലേമിനു കിഴക്കുള്ള ഒലിവുമലയിൽ അന്ന് അവിടുന്നു നില്‌ക്കും; ഒലിവുമല കിഴക്കുപടിഞ്ഞാറായി പിളരും; അവയ്‍ക്കു നടുവിൽ വിശാലമായ ഒരു താഴ്‌വര ഉണ്ടാകും. മലയുടെ ഒരു പകുതി വടക്കോട്ടും മറ്റേ പകുതി തെക്കോട്ടും നീങ്ങും.

⁵ മലയെ രണ്ടായി ഭാഗിക്കുന്ന താഴ്‌വര ആസൽവരെ എത്തും. യെഹൂദാരാജാവായ ഉസ്സിയായുടെ കാലത്ത് ഭൂകമ്പമുണ്ടായപ്പോൾ നിങ്ങളുടെ പൂർവികർ ഓടി രക്ഷപെട്ടതുപോലെ നിങ്ങൾ ഈ താഴ്‌വരയിലൂടെ ഓടി രക്ഷപെടും. അപ്പോൾ എന്റെ ദൈവമായ സർവേശ്വരൻ അവിടുത്തെ സകല വിശുദ്ധരോടുമൊപ്പം എഴുന്നള്ളും.

⁶ അന്നു ശൈത്യമോ മൂടൽമഞ്ഞോ ഉണ്ടാകുകയില്ല. ദിനരാത്രങ്ങൾ അന്നുണ്ടായിരിക്കുകയില്ല.

⁷ എപ്പോഴും പകലായിരിക്കും. രാത്രിയിലും വെളിച്ചമുണ്ടായിരിക്കും. ഇത് എപ്പോഴെന്നു സർവേശ്വരനു മാത്രമേ അറിയാവൂ.”

⁸ അന്നു യെരൂശലേമിൽനിന്നു ജീവജലം ഒഴുകും. പകുതി കിഴക്കേകടലിലേക്കും പകുതി പടിഞ്ഞാറേകടലിലേക്കും ഒഴുകും. ശീതകാലത്തും ഉഷ്ണകാലത്തും ഒരുപോലെ അത് ഒഴുകിക്കൊണ്ടിരിക്കും.”

സർവലോകത്തിന്റെയും രാജാവ്

⁹ സർവേശ്വരൻ സർവഭൂമിയുടെയും രാജാവാകും. അന്നു സർവേശ്വരനായി അവിടുന്നു മാത്രം; അവിടുത്തേക്ക് ഒരു നാമം മാത്രം.

¹⁰ ഗേബമുതൽ യെരൂശലേമിനു തെക്ക് രിമ്മോൻവരെ ദേശം മുഴുവൻ സമതലമായിത്തീരും. യെരൂശലേംനഗരമാകട്ടെ ബെന്യാമീൻഗോപുരംമുതൽ പണ്ടത്തെ ഗോപുരത്തിന്റെ സ്ഥാനത്തുള്ള കോൺഗോപുരംവരെയും ഹനനേൽഗോപുരംമുതൽ രാജാവിന്റെ മുന്തിരിച്ചക്കുകൾവരെയും വ്യാപിച്ചു സമീപദേശങ്ങളെക്കാൾ ഉയർന്നുനില്‌ക്കും.

¹¹ ജനങ്ങൾ അവിടെ വസിക്കും. കാരണം അവിടം ഇനിമേൽ ശാപഗ്രസ്തമാവുകയില്ല. യെരൂശലേം സുരക്ഷിതമായിരിക്കും.

¹² യെരൂശലേമിനോടു യുദ്ധം ചെയ്ത സകല ജനതകൾക്കും സർവേശ്വരൻ വരുത്തുന്ന ഭയങ്കരമായ വ്യാധി ഇതാണ്: അവർ ജീവനോടിരിക്കുമ്പോൾത്തന്നെ അവരുടെ മാംസം ചീഞ്ഞഴുകും; അവരുടെ കണ്ണുകളും നാവുകളും അഴുകിപ്പോകും.

¹³ അന്നു സർവേശ്വരൻ അവർക്കു കൊടുംഭീതി ഉളവാക്കും. തത്ഫലമായി അവർ പരസ്പരം കടന്നുപിടിക്കും; പരസ്പരം കൈ ഉയർത്തും.

¹⁴ യെഹൂദാപോലും യെരൂശലേമിനോടു പടവെട്ടും; ചുറ്റുമുള്ള സകല ജനതകളുടെയും സമ്പത്ത് അവർ പിടിച്ചെടുക്കും. ധാരാളം പൊന്നും വെള്ളിയും വസ്ത്രങ്ങളും തന്നെ.

¹⁵ ശത്രുവിന്റെ പാളയത്തിലെ കുതിര, കോവർകഴുത, ഒട്ടകം, കഴുത എന്നിങ്ങനെ സകല മൃഗങ്ങൾക്കും മുൻപറഞ്ഞവിധം മഹാവ്യാധി ഉണ്ടാകും.

¹⁶ യെരൂശലേമിനു നേരെ യുദ്ധത്തിനു വന്നവരിൽ ശേഷിച്ച സകല ജനതകളും രാജാധിരാജനും സർവശക്തനുമായ സർവേശ്വരനെ ആരാധിക്കാനും കൂടാരപ്പെരുന്നാൾ ആചരിക്കാനും വർഷംതോറും യെരൂശലേമിൽ വരും.

¹⁷ ഏതെങ്കിലും ജനത രാജാധിരാജനായ സർവശക്തനായ സർവേശ്വരനെ ആരാധിക്കാൻ യെരൂശലേമിലേക്കു വരുന്നില്ലെങ്കിൽ അവർക്കു മഴ കിട്ടുകയില്ല.

¹⁸ ഈജിപ്തുകാർ വരുന്നില്ലെങ്കിൽ അവർക്കും മഴ ലഭിക്കുകയില്ല. കൂടാരപ്പെരുന്നാൾ ആചരിക്കാൻ വരാത്ത ഈജിപ്തുകാർക്ക് ഇതര ജനതകൾക്കുണ്ടാകുന്ന ബാധകൾതന്നെ നേരിടും.

¹⁹ ഇതായിരിക്കും ഈജിപ്തിനും കൂടാരപ്പെരുന്നാൾ ആചരിക്കാൻ വരാത്ത മറ്റു ജനതകൾക്കും ലഭിക്കുന്ന ശിക്ഷ.

²⁰ അന്നു കുതിരകളുടെ മണികളിൽ “സർവേശ്വരനു വിശുദ്ധം” എന്ന് രേഖപ്പെടുത്തിയിരിക്കും. ദേവാലയത്തിലെ കലങ്ങൾ യാഗപീഠത്തിന്റെ മുമ്പിലെ കലശങ്ങൾപോലെ വിശുദ്ധമായിരിക്കും.

²¹ യെരൂശലേമിലെയും യെഹൂദ്യയിലെയും കലങ്ങളൊക്കെയും സർവശക്തനായ സർവേശ്വരനു വിശുദ്ധമായിരിക്കും. യാഗം കഴിക്കാൻ വരുന്നവർ യാഗമാംസം വേവിക്കാൻ ആ കലങ്ങൾ ഉപയോഗിക്കും; അന്നുമുതൽ സർവശക്തനായ സർവേശ്വരന്റെ ആലയത്തിൽ ഒരു വ്യാപാരിയും ഉണ്ടായിരിക്കുകയില്ല.