ഉത്തമഗീതം 6 - സത്യവേദപുസ്തകം C.L. (BSI)

തോഴിമാർ

¹ പെൺകൊടികളിൽ അതിസുന്ദരീ, നിന്റെ പ്രിയൻ എവിടെപ്പോയി? ഏതു വഴിക്കാണ് അവൻ പോയത്? ഞങ്ങളും നിന്നോടൊത്ത് അവനെ തിരയാം.

മണവാട്ടി

² എന്റെ പ്രിയൻ ആടുകളെ മേയ്‍ക്കാനും ലില്ലിപ്പൂക്കൾ പറിക്കാനും തന്റെ ഉദ്യാനത്തിലേക്കു പോയി, സുഗന്ധസസ്യങ്ങളുടെ തടങ്ങളിലേക്ക് ഇറങ്ങിപ്പോയി.

³ ഞാൻ എന്റെ പ്രിയതമൻറേതാണ്; അവൻ എൻറേതും. അവൻ ലില്ലിപ്പൂക്കളുടെ ഇടയിൽ ആടു മേയ്‍ക്കുന്നു.

ഗീതം അഞ്ച് മണവാളൻ

⁴ എന്റെ പ്രിയേ, നീ തിർസാ നഗരിപോലെ സുന്ദരി; യെരൂശലേംപോലെ മനോഹരി, പതാകകൾ വഹിച്ചുകൊണ്ടു വരുന്ന സൈന്യംപോലെ നീ ഭയദായിനി.

⁵ നിന്റെ നോട്ടം എങ്കൽനിന്നു പിൻവലിക്കുക; അത് എന്നെ അസ്വസ്ഥനാക്കുന്നു. നിന്റെ കാർകൂന്തൽ, ഗിലെയാദു മലഞ്ചെരിവിലൂടെ ഇറങ്ങിവരുന്ന കോലാട്ടിൻനിര പോലെയാണ്.

⁶ നിന്റെ ദന്തനിര കുളിച്ചു കയറി വരുന്ന ചെമ്മരിയാട്ടിൻപറ്റംപോലെ വെൺമയുള്ളതാണ്; അവ ഒന്നൊഴിയാതെ എല്ലാം നിരയൊത്തിരിക്കുന്നു.

⁷ നിന്റെ കവിൾത്തടങ്ങൾ മാതളപ്പഴപ്പാതികൾ പോലെ മൂടുപടത്തിനുള്ളിൽ ശോഭിക്കുന്നു.

⁸ അറുപതു രാജ്ഞിമാരും എൺപതു ഉപനാരിമാരും എണ്ണമറ്റ തരുണികളും രാജാവിനുണ്ട്.

⁹ എന്നാൽ എന്റെ പ്രാവ് ഒരുവൾ മാത്രം; അവൾ കുറ്റമറ്റവൾ, അമ്മയുടെ ഓമനമകൾ, ഉദരത്തിൽ വഹിച്ചവളുടെ അഭിമാനം; പെൺകൊടികൾ അവളെ ഭാഗ്യവതി എന്നു വിളിച്ചു; രാജ്ഞിമാരും ഉപനാരിമാരും അവളെ പുകഴ്ത്തി.

¹⁰ ഉഷശ്ശോഭ ചൊരിയുന്ന ഇവൾ ആർ? ചന്ദ്രനെപ്പോലെ സൗന്ദര്യം തികഞ്ഞ ഇവൾ ആർ? സൂര്യതേജസ്സു വിതറുന്ന ഇവൾ ആർ? പതാകയേന്തിയ സൈന്യനിരപോലെ ഭയദായിനിയായ ഇവൾ ആർ?

¹¹ പൂത്തുലയുന്ന താഴ്‌വര കാണാൻ, മുന്തിരിവള്ളി മൊട്ടിട്ടോ എന്നും, മാതളം പൂത്തോ എന്നും നോക്കാൻ, ഞാൻ ബദാംതോട്ടത്തിലേക്ക് ഇറങ്ങിച്ചെന്നു.

മണവാട്ടി

¹² ഞാനറിയാതെതന്നെ മനോരഥം എന്നെ നാഥന്റെ സന്നിധിയിൽ എത്തിച്ചു.

തോഴിമാർ

¹³ ഹേ, ശൂലേംകുമാരീ, മടങ്ങിവരൂ, മടങ്ങിവരൂ; ഞങ്ങൾ നിന്നെ ഒന്നു കാണട്ടെ, മടങ്ങിവരൂ, മടങ്ങിവരൂ; രണ്ടു സൈന്യങ്ങൾക്കിടയിൽ, നൃത്തം ചെയ്യുന്നവളെ എന്നപോലെ നിങ്ങളെന്തിനു ശൂലേംകാരിയെ നോക്കുന്നു?