ഉത്തമഗീതം 1 - സത്യവേദപുസ്തകം C.L. (BSI)

ഗീതം ഒന്ന്

¹ ശലോമോന്റെ ഉത്തമഗീതം

മണവാട്ടി

² അങ്ങയുടെ അധരങ്ങൾ എന്നെ ചുംബനംകൊണ്ട് പൊതിയട്ടെ; അങ്ങയുടെ പ്രേമം വീഞ്ഞിനെക്കാൾ ശ്രേഷ്ഠം.

³ അങ്ങയുടെ അഭിഷേകതൈലം സുഗന്ധപൂരിതം; അങ്ങയുടെ നാമംതന്നെ തൈലധാരപോലെ സുരഭിലമാണ്; അതിനാൽ കന്യകമാർ അങ്ങയിൽ പ്രേമം പകരുന്നു.

⁴ നാഥാ, എന്നെയും കൊണ്ടുപോകുക; നമുക്കു വേഗം പോകാം; രാജാവ് തന്റെ മണവറയിലേക്ക് എന്നെ ആനയിച്ചിരിക്കുന്നു; ഞങ്ങൾ അങ്ങയിൽ ആഹ്ലാദിച്ചുല്ലസിക്കും; അങ്ങയുടെ പ്രേമം വീഞ്ഞിനെക്കാൾ മധുരമെന്നു ഞങ്ങൾ വാഴ്ത്തും. അവർ അങ്ങയെ പ്രേമിക്കുന്നത് ഉചിതംതന്നെ.

⁵ യെരൂശലേംപുത്രിമാരേ, ഞാൻ കറുത്തവളെങ്കിലും കേദാരിലെ കൂടാരങ്ങൾപോലെയും ശലോമോന്റെ യവനികപോലെയും അഴകുറ്റവളാണ്.

⁶ ഞാൻ നിറം മങ്ങിയവളും വെയിലേറ്റ് ഇരുണ്ടുപോയവളും ആണെന്നോർത്ത് എന്നെ തുറിച്ചുനോക്കരുതേ. എന്റെ അമ്മയുടെ പുത്രന്മാർക്ക് എന്നോട് അനിഷ്ടമുണ്ടായി; അവർ എന്നെ മുന്തിരിത്തോപ്പിനു കാവൽക്കാരിയാക്കി; എന്നാൽ, എന്റെ സ്വന്തം മുന്തിരിത്തോട്ടം ഞാൻ കാത്തുസൂക്ഷിച്ചുമില്ല.

⁷ പ്രാണപ്രിയാ, പറയൂ; എവിടെയാണ് അങ്ങ് ആടു മേയ്‍ക്കുന്നത്? എവിടെയാണ് അവ ഉച്ചയ്‍ക്കു വിശ്രമം കൊള്ളുന്നത്? അങ്ങയുടെ കൂട്ടുകാരുടെ ആട്ടിൻപറ്റങ്ങൾക്കു സമീപം ഞാനെന്തിന് അലഞ്ഞുതിരിയണം?

മണവാളൻ

⁸ പെൺകൊടികളിൽ അതിസുന്ദരീ, നിനക്ക് അതറിഞ്ഞുകൂടെങ്കിൽ ആടുകളുടെ കാൽപ്പാടുകളെ പിന്തുടർന്നു ചെല്ലുക; ഇടയരുടെ കൂടാരങ്ങൾക്കരികിൽ നിന്റെ കുഞ്ഞാടുകളെ മേയ്‍ക്കുക.

⁹ എന്റെ പ്രിയേ, ഫറവോന്റെ രഥം വലിക്കുന്ന പെൺകുതിരയോടു ഞാൻ നിന്നെ ഉപമിക്കുന്നു.

¹⁰ നിന്റെ കവിൾത്തടങ്ങൾ ആഭരണങ്ങൾകൊണ്ടും നിന്റെ കണ്ഠം രത്നഹാരങ്ങൾകൊണ്ടും അഴകാർന്നിരിക്കുന്നു.

¹¹ വെള്ളി പതിച്ച കനകാഭരണങ്ങൾ ഞങ്ങൾ നിനക്ക് നിർമ്മിച്ചു സമ്മാനിക്കാം.

മണവാട്ടി

¹² രാജാവു മഞ്ചത്തിൽ ശയിക്കേ എന്റെ നർദീൻ തൈലം പരിമളം പരത്തി.

¹³ സ്തനങ്ങൾക്കിടയിൽ അണിഞ്ഞ മൂറിൻകെട്ടാണ് എന്റെ പ്രിയതമൻ.

¹⁴ എന്റെ പ്രിയൻ എനിക്ക് എൻഗെദി മുന്തിരിത്തോട്ടങ്ങളിലെ മയിലാഞ്ചിപ്പൂങ്കുലയാകുന്നു.

മണവാളൻ

¹⁵ പ്രിയേ, ഹാ നീ എത്ര സുന്ദരി, നിന്റെ കണ്ണുകൾ ഇണപ്രാവുകളാണ്.

മണവാട്ടി

¹⁶ എന്റെ പ്രിയതമാ, അങ്ങ് എത്ര സുന്ദരൻ, എത്ര മനോഹരൻ;

¹⁷ നമ്മുടെ ശയനമഞ്ചം ഹരിത സുന്ദരം; ദേവദാരുകൊണ്ടു തുലാങ്ങളും സരളവൃക്ഷംകൊണ്ടു കഴുക്കോലും തീർത്തതാണ് നമ്മുടെ വീട്.