സങ്കീർത്തനങ്ങൾ 99 - സത്യവേദപുസ്തകം C.L. (BSI)

വിശുദ്ധനായ രാജാവ്

¹ സർവേശ്വരൻ വാഴുന്നു, ജനതകൾ വിറയ്‍ക്കട്ടെ. അവിടുന്നു കെരൂബുകളിന്മേൽ സിംഹാസനസ്ഥനായിരിക്കുന്നു; ഭൂമി കുലുങ്ങട്ടെ.

² സർവേശ്വരൻ സീയോനിൽ വലിയവനാണ്, അവിടുന്നു സകല ജനതകളെയും ഭരിക്കുന്ന പരമോന്നതൻ.

³ അവിടുത്തെ മഹത്തും ഭീതിദവുമായ നാമത്തെ അവർ പ്രകീർത്തിക്കട്ടെ, അവിടുന്നു പരിശുദ്ധനാണല്ലോ.

⁴ കരുത്തുറ്റ രാജാവേ, നീതിയെ സ്നേഹിക്കുന്നവനേ, അവിടുന്നു ന്യായത്തെ സുസ്ഥിരമാക്കിയിരിക്കുന്നു. അവിടുന്ന് ഇസ്രായേലിൽ നീതിയും ന്യായവും നടത്തിയിരിക്കുന്നു.

⁵ നമ്മുടെ ദൈവമായ സർവേശ്വരനെ വാഴ്ത്തുവിൻ. അവിടുത്തെ പാദപീഠത്തിൽ നമസ്കരിക്കുവിൻ. അവിടുന്നു പരിശുദ്ധനാകുന്നു.

⁶ മോശയും അഹരോനും അവിടുത്തെ പുരോഹിതഗണത്തിൽപ്പെട്ടവരാണ്. ശമൂവേൽ അങ്ങയുടെ നാമം വിളിച്ചപേക്ഷിച്ചവരിൽ ഉൾപ്പെടുന്നു. അവർ സർവേശ്വരനോട് അപേക്ഷിച്ചു, അവിടുന്ന് അവർക്ക് ഉത്തരമരുളി.

⁷ മേഘസ്തംഭത്തിൽനിന്ന് അവിടുന്ന് അവരോടു സംസാരിച്ചു; അവർ അവിടുത്തെ കല്പനകളും ചട്ടങ്ങളും പാലിച്ചു;

⁸ ഞങ്ങളുടെ ദൈവമായ സർവേശ്വരാ, അവിടുന്ന് അവർക്ക് ഉത്തരമരുളി. അവിടുന്ന് അവർക്കു ക്ഷമിക്കുന്ന ദൈവവും, അവരുടെ ദുഷ്പ്രവൃത്തികൾക്ക് ശിക്ഷ നല്‌കുന്നവനും ആയിരുന്നു.

⁹ നമ്മുടെ ദൈവമായ സർവേശ്വരനെ പ്രകീർത്തിക്കുവിൻ. വിശുദ്ധപർവതത്തിൽ അവിടുത്തെ ആരാധിക്കുവിൻ. നമ്മുടെ ദൈവമായ സർവേശ്വരൻ പരിശുദ്ധനല്ലോ.