സങ്കീർത്തനങ്ങൾ 98 - സത്യവേദപുസ്തകം C.L. (BSI)

ദൈവം ലോകത്തെ ഭരിക്കുന്നു

ഒരു സങ്കീർത്തനം

¹ സർവേശ്വരന് ഒരു പുതിയ പാട്ടു പാടുവിൻ; അവിടുന്ന് അദ്ഭുതങ്ങൾ പ്രവർത്തിച്ചിരിക്കുന്നു. അവിടുത്തെ വലങ്കൈയും വിശുദ്ധഭുജവും വിജയം നേടിയിരിക്കുന്നു.

² സർവേശ്വരൻ തന്റെ വിജയം വിളംബരം ചെയ്തു. ജനതകളുടെ മുമ്പിൽ അവിടുന്നു തന്റെ നീതി വെളിപ്പെടുത്തിയിരിക്കുന്നു.

³ ഇസ്രായേൽജനത്തോടുള്ള അവിടുത്തെ സുസ്ഥിരസ്നേഹവും വിശ്വസ്തതയും അവിടുന്ന് ഓർത്തു; സർവഭൂവാസികളും നമ്മുടെ ദൈവത്തിന്റെ വിജയം ദർശിച്ചിരിക്കുന്നു.

⁴ ഭൂവാസികളേ, സർവേശ്വരന് ആഹ്ലാദാരവം മുഴക്കുവിൻ. ആനന്ദഘോഷത്തോടെ സ്തോത്രഗീതം ആലപിക്കുവിൻ.

⁵ കിന്നരം മീട്ടി സർവേശ്വരനു സ്തോത്രം പാടുവിൻ. കിന്നരത്തോടും ശ്രുതിമധുരമായ സംഗീതത്തോടുംകൂടി പാടുവിൻ.

⁶ കൊമ്പും കാഹളവും ഊതി, രാജാവായ സർവേശ്വരന്റെ മുമ്പിൽ ആനന്ദഘോഷം ഉയർത്തുവിൻ.

⁷ സമുദ്രവും അതിലുള്ളവയും, ഭൂമിയും അതിലെ നിവാസികളും ആർത്തുഘോഷിക്കട്ടെ.

⁸ ജലപ്രവാഹങ്ങൾ സർവേശ്വരന്റെ മുമ്പിൽ കരഘോഷം മുഴക്കട്ടെ. കുന്നുകൾ ഒത്തുചേർന്ന് അവിടുത്തെ മുമ്പിൽ ആനന്ദഗീതം ആലപിക്കട്ടെ.

⁹ അവിടുന്നു ലോകത്തെ നീതിയോടും ജനതകളെ ന്യായത്തോടും ഭരിക്കും.