സങ്കീർത്തനങ്ങൾ 97 - സത്യവേദപുസ്തകം C.L. (BSI)

ദൈവം സർവാധിപതി

¹ സർവേശ്വരൻ വാഴുന്നു, ഭൂമി സന്തോഷിക്കട്ടെ, ദ്വീപുകൾ ആഹ്ലാദിക്കട്ടെ.

² മേഘങ്ങളും കൂരിരുട്ടും അവിടുത്തെ ചുറ്റുമുണ്ട്. നീതിയിലും ന്യായത്തിലും അവിടുന്നു തന്റെ സിംഹാസനം സ്ഥാപിച്ചിരിക്കുന്നു.

³ അഗ്നി അവിടുത്തെ മുമ്പേ പോകുന്നു. ചുറ്റുമുള്ള വൈരികളെ അതു ദഹിപ്പിക്കുന്നു.

⁴ അവിടുത്തെ മിന്നൽപ്പിണരുകൾ ലോകത്തെ പ്രകാശിപ്പിക്കുന്നു. ഭൂമി അതു കണ്ടു വിറയ്‍ക്കുന്നു.

⁵ സർവേശ്വരന്റെ മുമ്പിൽ സർവലോകത്തിന്റെയും അധിപനായ സർവേശ്വരന്റെ മുമ്പിൽതന്നെ. പർവതങ്ങൾ മെഴുകുപോലെ ഉരുകുന്നു.

⁶ ആകാശം ദൈവത്തിന്റെ നീതി വിളംബരം ചെയ്യുന്നു. എല്ലാ ജനതകളും അവിടുത്തെ മഹത്ത്വം ദർശിക്കുന്നു.

⁷ മിഥ്യാമൂർത്തികളെ ആരാധിക്കുന്നവർ, വ്യർഥവിഗ്രഹങ്ങളിൽ അഭിമാനം കൊള്ളുന്നവർ, ലജ്ജിതരാകും. എല്ലാ ദേവന്മാരും അവിടുത്തെ മുമ്പിൽ കുമ്പിടുന്നു.

⁸ സീയോൻ ഇതു കേട്ടു സന്തോഷിക്കുന്നു, സർവേശ്വരാ, അവിടുത്തെ ന്യായവിധികൾ നിമിത്തം യെഹൂദാനഗരങ്ങൾ ആഹ്ലാദിക്കുന്നു.

⁹ സർവേശ്വരാ, അങ്ങ് സർവലോകത്തിന്റെയും അധിപനാണ്. സകല ദേവന്മാരെയുംകാൾ ഉന്നതനാണ്.

¹⁰ സർവേശ്വരനെ സ്നേഹിക്കുന്നവർ, തിന്മയെ വെറുക്കുന്നു. അവിടുന്നു തന്റെ ഭക്തരെ സംരക്ഷിക്കുന്നു. ദുഷ്ടന്മാരുടെ കൈയിൽനിന്ന് അവരെ വിടുവിക്കുന്നു.

¹¹ നീതിമാന്മാരുടെമേൽ പ്രകാശവും പരമാർഥഹൃദയമുള്ളവരുടെമേൽ ആനന്ദവും ഉദിക്കുന്നു.

¹² നീതിമാന്മാരേ, സർവേശ്വരനിൽ സന്തോഷിക്കുവിൻ. അവിടുത്തെ പരിശുദ്ധനാമത്തിനു സ്തോത്രം അർപ്പിക്കുവിൻ.