സങ്കീർത്തനങ്ങൾ 93 - സത്യവേദപുസ്തകം C.L. (BSI)

ദൈവം നമ്മുടെ രാജാവ്

¹ സർവേശ്വരൻ വാഴുന്നു; അവിടുന്നു മഹിമ ധരിച്ചിരിക്കുന്നു. അവിടുന്നു ശക്തികൊണ്ട് അര മുറുക്കിയിരിക്കുന്നു, അവിടുന്നു ഭൂമിയെ യഥാസ്ഥാനത്തു സ്ഥാപിച്ചിരിക്കുന്നു, അതിന് ഇളക്കം തട്ടുകയില്ല.

² അങ്ങയുടെ സിംഹാസനം പണ്ടുതന്നേ സ്ഥാപിക്കപ്പെട്ടിരിക്കുന്നു. അങ്ങ് അനാദിമുതലേ ഉള്ളവനാണ്.

³ സർവേശ്വരാ, പ്രവാഹങ്ങൾ ഉയരുന്നു; പ്രവാഹങ്ങൾ ഇരമ്പുന്നു. പ്രവാഹങ്ങൾ ഗർജനം മുഴക്കുന്നു.

⁴ പ്രവാഹങ്ങളുടെ മുഴക്കത്തെക്കാളും സമുദ്രത്തിലെ തിരമാലകളെക്കാളും സർവേശ്വരൻ ശക്തിയുള്ളവൻ.

⁵ അവിടുത്തെ കല്പനകൾ അലംഘനീയം. സർവേശ്വരാ, വിശുദ്ധി അവിടുത്തെ ആലയത്തെ എന്നേക്കും അലങ്കരിക്കുന്നു.