സങ്കീർത്തനങ്ങൾ 92 - സത്യവേദപുസ്തകം C.L. (BSI)

നീതിമാന്റെ സന്തോഷം

ശബത്തുനാൾക്കുള്ള ഗീതം

¹ സർവേശ്വരാ, അങ്ങേക്കു സ്തോത്രം അർപ്പിക്കുന്നതും അത്യുന്നതനായ ദൈവമേ, അങ്ങേക്കു കീർത്തനം ആലപിക്കുന്നതും എത്ര ശ്രേഷ്ഠം!

² പത്തു കമ്പികളുള്ള വീണയും കിന്നരവും മീട്ടി

³ പ്രഭാതംതോറും അവിടുത്തെ അചഞ്ചല സ്നേഹവും രാത്രിതോറും അവിടുത്തെ വിശ്വസ്തതയും പ്രഘോഷിക്കുന്നത് എത്ര ഉചിതം.

⁴ സർവേശ്വരാ, അങ്ങയുടെ പ്രവൃത്തികൾ എന്നെ സന്തോഷിപ്പിക്കുന്നു. അങ്ങയുടെ കൈകളുടെ പ്രവൃത്തികൾ കണ്ട് ഞാൻ ആനന്ദഗീതം ആലപിക്കുന്നു.

⁵ സർവേശ്വരാ, അങ്ങയുടെ പ്രവൃത്തികൾ എത്ര മഹനീയം! അങ്ങയുടെ ചിന്തകൾ എത്ര അഗാധം!

⁶ മൂഢൻ അതു ഗ്രഹിക്കുന്നില്ല; ഭോഷന് അതു മനസ്സിലാക്കാൻ കഴിയുന്നുമില്ല.

⁷ ദുഷ്ടന്മാർ പുല്ലുപോലെ മുളയ്‍ക്കുന്നു; അധർമം പ്രവർത്തിക്കുന്നവർ തഴച്ചുവളരുന്നു. എങ്കിലും അവർ ഉന്മൂലനം ചെയ്യപ്പെടും.

⁸ എന്നാൽ സർവേശ്വരാ, അവിടുന്ന് എന്നും പരമോന്നതനാണ്.

⁹ പരമനാഥാ, നിശ്ചയമായും അവിടുത്തെ ശത്രുക്കൾ നശിക്കും. സകല ദുഷ്കർമികളും ചിതറിക്കപ്പെടും.

¹⁰ എന്നാൽ അവിടുന്ന് എനിക്കു കാട്ടുപോത്തിന്റെ ശക്തി തന്നു, അവിടുന്ന് എന്റെമേൽ പുതുതൈലം ഒഴിച്ചു.

¹¹ എന്റെ ശത്രുക്കളുടെ പതനം ഞാൻ കണ്ടു. എന്നെ എതിർക്കുന്ന ദുഷ്കർമികളുടെ നിലവിളി ഞാൻ കേട്ടു.

¹² നീതിമാൻ പനപോലെ തഴയ്‍ക്കും. ലെബാനോനിലെ ദേവദാരുപോലെ വളരും.

¹³ സർവേശ്വരന്റെ ആലയത്തിൽ അവരെ നട്ടിരിക്കുന്നു. നമ്മുടെ ദൈവത്തിന്റെ ആലയത്തിലെ അങ്കണത്തിൽ അവർ തഴച്ചുവളരും.

¹⁴ വാർധക്യത്തിലും അവർ ഫലം നല്‌കും. പച്ചിലച്ചാർത്ത് ചൂടി എന്നും പുഷ്‍ടിയോടിരിക്കും.

¹⁵ സർവേശ്വരൻ നീതിമാനാണെന്ന് അവർ പ്രഘോഷിക്കുന്നു. അവിടുന്നാണ് എന്റെ അഭയശില. അനീതി അങ്ങയിൽ ഒട്ടും ഇല്ലല്ലോ.