സങ്കീർത്തനങ്ങൾ 89 - സത്യവേദപുസ്തകം C.L. (BSI)

സർവേശ്വരൻ ഞങ്ങളുടെ രാജാവ്

എസ്രാഹ്യനായ ഏഥാന്റെ ഒരു ധ്യാനം

¹ സർവേശ്വരാ, ഞാൻ എന്നും അവിടുത്തെ അചഞ്ചലസ്നേഹത്തെ പ്രകീർത്തിക്കും. ഞാൻ എന്നും അവിടുത്തെ വിശ്വസ്തതയെ പ്രഘോഷിക്കും.

² അവിടുത്തെ സ്നേഹം എന്നേക്കും നിലനില്‌ക്കുന്നു. അവിടുത്തെ വിശ്വസ്തത ആകാശംപോലെ സുസ്ഥിരമാണ്.

³ അവിടുന്ന് ഇങ്ങനെ അരുളിച്ചെയ്തു: “എന്റെ തിരഞ്ഞെടുക്കപ്പെട്ട ദാസനോടു ഞാൻ ഉടമ്പടിയുണ്ടാക്കി. എന്റെ ദാസനായ ദാവീദിനോടു സത്യം ചെയ്തു.

⁴ നിന്റെ സന്തതികളെ ഞാൻ സുസ്ഥിരമാക്കും; അവർ നിന്റെ സിംഹാസനത്തിൽ എന്നേക്കും വാഴും.

⁵ സർവേശ്വരാ, സ്വർഗം അവിടുത്തെ അദ്ഭുതപ്രവൃത്തികൾ സ്തുതിക്കട്ടെ; അങ്ങയുടെ വിശ്വസ്തത ദിവ്യസഭയിൽ പ്രകീർത്തിക്കപ്പെടട്ടെ.

⁶ സർവേശ്വരനു സമനായി സ്വർഗത്തിൽ ആരുണ്ട്? ദേവഗണത്തിൽ സർവേശ്വരനു തുല്യനായി ആരുണ്ട്?

⁷ ദേവസഭയിൽ എല്ലാവരും അങ്ങയെ ഭയപ്പെടുന്നു, അവർ അങ്ങയുടെ ചുറ്റും ഭയഭക്തിയോടെ നില്‌ക്കുന്നു.

⁸ സർവശക്തനായ ദൈവമേ, സർവേശ്വരാ, അങ്ങയെപ്പോലെ ബലവാൻ ആരുണ്ട്? വിശ്വസ്തത അങ്ങയെ വലയം ചെയ്തിരിക്കുന്നു.

⁹ ഇളകിമറിയുന്ന സമുദ്രത്തെ അവിടുന്നു ശാസിച്ചൊതുക്കുന്നു. തിരമാലകൾ ഉയരുമ്പോൾ അവിടുന്ന് അവയെ ശാന്തമാക്കുന്നു.

¹⁰ അവിടുന്നു രഹബിനെ പിണമെന്നപോലെ തകർത്തു. അവിടുത്തെ ബലിഷ്ഠഭുജം ശത്രുക്കളെ ചിതറിച്ചു.

¹¹ ആകാശവും ഭൂമിയും അങ്ങയുടേതാണ്, ലോകവും അതിലുള്ള സകലവും അവിടുന്നാണ് സൃഷ്‍ടിച്ചത്.

¹² തെക്കുമുതൽ വടക്കുവരെയുള്ള എല്ലാ ദേശങ്ങളെയും അവിടുന്നു സൃഷ്‍ടിച്ചു. താബോറും ഹെർമ്മോനും ആഹ്ലാദപൂർവം അങ്ങയെ പുകഴ്ത്തുന്നു,

¹³ അവിടുത്തെ ഭുജം എത്ര ശക്തിയുള്ളത്. അവിടുത്തെ കരം എത്ര കരുത്തുറ്റത്. അവിടുന്നു വലങ്കൈ ഉയർത്തിയിരിക്കുന്നു.

¹⁴ അവിടുന്നു തന്റെ രാജ്യം നീതിയിലും ന്യായത്തിലും സ്ഥാപിച്ചിരിക്കുന്നു. അങ്ങയുടെ സുസ്ഥിരസ്നേഹവും വിശ്വസ്തതയും തിരുമുമ്പിൽ നടക്കുന്നു.

¹⁵ സ്തുതിഘോഷത്താൽ അങ്ങയെ ആരാധിക്കുന്നവർ, അവിടുത്തെ വരപ്രസാദത്തിൽ ജീവിക്കുന്നവർ തന്നെ, എത്ര അനുഗൃഹീതർ.

¹⁶ അവർ അങ്ങയിൽ എപ്പോഴും ആനന്ദിക്കുന്നു. അങ്ങയുടെ നീതിയെ അവർ പ്രകീർത്തിക്കുന്നു.

¹⁷ അവിടുന്നാണ് അവരുടെ ശക്തിയും മഹത്ത്വവും. അങ്ങയുടെ അനുഗ്രഹമാണ് അവർക്കു വിജയമരുളുന്നത്.

¹⁸ സർവേശ്വരനാണ് ഞങ്ങളുടെ സംരക്ഷകൻ, ഇസ്രായേലിന്റെ പരിശുദ്ധനാണ് ഞങ്ങളുടെ രാജാവ്.

ദൈവം ഉടമ്പടി പാലിക്കും

¹⁹ പണ്ട് ഒരു ദർശനത്തിൽ ദൈവം തന്റെ ഭക്തനോട് അരുളിച്ചെയ്തു: “വീരനായ യോദ്ധാവിനെ ഞാൻ കിരീടം അണിയിച്ചു, ജനത്തിൽനിന്ന് ഒരാളെ തിരഞ്ഞെടുത്ത് രാജാവാക്കി.

²⁰ എന്റെ ദാസനായ ദാവീദിനെ ഞാൻ കണ്ടെത്തി, വിശുദ്ധതൈലംകൊണ്ടു ഞാൻ അവനെ അഭിഷേകം ചെയ്തു.

²¹ എന്റെ കരം എപ്പോഴും അവനോടൊത്ത് ഉണ്ടായിരിക്കും, എന്റെ ഭുജം അവനെ ശക്തനാക്കും.

²² ശത്രു അവനെ തോല്പിക്കുകയില്ല; ദുഷ്ടൻ അവന്റെമേൽ വിജയം നേടുകയില്ല.

²³ ഞാൻ അവന്റെ ശത്രുക്കളെ അവന്റെ മുമ്പിൽ വച്ചു തകർക്കും. അവനെ ദ്വേഷിക്കുന്നവരെ ഞാൻ സംഹരിക്കും.

²⁴ എന്റെ വിശ്വസ്തതയും അചഞ്ചലസ്നേഹവും അവന്റെ കൂടെ ഉണ്ടായിരിക്കും. ഞാൻ കൂടെയുള്ളതുകൊണ്ട് അവന്റെ ശക്തി വർധിക്കും.

²⁵ ഞാൻ അവന്റെ അധികാരം സമുദ്രത്തിന്മേലും നദികളിന്മേലും ഉറപ്പിക്കും.”

²⁶ അവിടുന്നാണ് എന്റെ പിതാവ്, എന്റെ ദൈവം, എന്റെ രക്ഷാശൈലം, എന്ന് അവൻ എന്നോട് ഉച്ചത്തിൽ പറയും.

²⁷ ഞാൻ അവനെ എന്റെ ആദ്യജാതനും ഭൂമിയിലെ രാജാക്കന്മാരിൽ അത്യുന്നതനുമാക്കും.

²⁸ എന്റെ അചഞ്ചലസ്നേഹം ഞാനെന്നും അവനോടു കാണിക്കും. അവനോടുള്ള എന്റെ ഉടമ്പടി സുസ്ഥിരമായിരിക്കും.

²⁹ ഞാൻ അവന്റെ രാജവംശത്തെ ശാശ്വതമായി നിലനിർത്തും. അവന്റെ സന്തതികൾ ആകാശമുള്ളിടത്തോളം കാലം രാജാക്കന്മാരായിരിക്കും.

³⁰ അവന്റെ സന്തതി എന്റെ ധർമശാസ്ത്രം ഉപേക്ഷിക്കുകയും എന്റെ അനുശാസനം അനുസരിക്കാതിരിക്കുകയും

³¹ എന്റെ ചട്ടങ്ങൾ ലംഘിക്കുകയും എന്റെ കല്പനകൾ പാലിക്കാതിരിക്കുകയും ചെയ്താൽ

³² ഞാൻ അവരുടെ അതിക്രമങ്ങൾക്ക് അവരെ വടികൊണ്ട് അടിക്കും. അവരുടെ അധർമങ്ങൾക്ക് അവരെ ചാട്ടവാറുകൊണ്ടു പ്രഹരിക്കും.

³³ എങ്കിലും എന്റെ അചഞ്ചലസ്നേഹം ഞാൻ അവരിൽനിന്നു പിൻവലിക്കുകയില്ല. ഞാൻ എന്നും അവനോടു വിശ്വസ്തത പുലർത്തും.

³⁴ ഞാൻ എന്റെ ഉടമ്പടി ലംഘിക്കുകയില്ല. എന്റെ വാഗ്ദാനത്തിൽനിന്നു പിൻമാറുകയില്ല.

³⁵ എന്റെ വിശുദ്ധനാമത്തെപ്രതി ഞാൻ എന്നേക്കുമായി ശപഥം ചെയ്തിരിക്കുന്നു. ദാവീദിനോടുള്ള എന്റെ വാഗ്ദാനം ഞാൻ ഒരിക്കലും ലംഘിക്കുകയില്ല.

³⁶ അവന്റെ വംശം ശാശ്വതമായിരിക്കും അവന്റെ സിംഹാസനം സൂര്യനുള്ളിടത്തോളം കാലം നിലനില്‌ക്കും.

³⁷ ദാവീദിന്റെ രാജത്വം ചന്ദ്രനെപ്പോലെ നിലനില്‌ക്കും. ആകാശമുള്ളിടത്തോളം കാലം അതു സുസ്ഥിരമായിരിക്കും.

രാജാവിന്റെ പരാജയം

³⁸ എങ്കിലും ഇപ്പോൾ അവിടുന്ന് അങ്ങയുടെ അഭിഷിക്തനോട് ഉഗ്രമായി കോപിച്ചിരിക്കുന്നു. അവനെ അങ്ങ് പരിത്യജിച്ചു.

³⁹ അവിടുത്തെ ദാസനോടുള്ള ഉടമ്പടി ലംഘിച്ചു. അവന്റെ കിരീടം നിലത്തെറിഞ്ഞ് അശുദ്ധമാക്കി.

⁴⁰ അവിടുന്ന് അവന്റെ പട്ടണത്തിന്റെ മതിലുകൾ പൊളിച്ചു; കോട്ടകൾ ഇടിച്ചുനിരത്തി.

⁴¹ വഴിപോക്കർ അവനെ കൊള്ളയടിക്കുന്നു. അയൽക്കാർ അവനെ പരിഹസിക്കുന്നു.

⁴² അവിടുന്ന് അവന്റെ ശത്രുക്കൾക്ക് വിജയം നല്‌കി; അവന്റെ സകല ശത്രുക്കളെയും ആഹ്ലാദഭരിതരാക്കി.

⁴³ അവിടുന്ന് അവന്റെ വാളിന്റെ വായ്ത്തല മടക്കി. യുദ്ധത്തിൽ ചെറുത്തുനില്‌ക്കാൻ അവനെ അശക്തനാക്കി.

⁴⁴ അവിടുന്ന് അവന്റെ കൈയിൽനിന്നു ചെങ്കോൽ എടുത്തുമാറ്റി. അവന്റെ സിംഹാസനത്തെ നിലത്തു മറിച്ചിട്ടു.

⁴⁵ അവിടുന്ന് അവന്റെ യൗവനകാലം ചുരുക്കി, അപമാനംകൊണ്ട് അവനെ മൂടി.

വിമോചനത്തിനായുള്ള പ്രാർഥന

⁴⁶ സർവേശ്വരാ, ഇത് എത്ര കാലത്തേക്ക്? അങ്ങ് എന്നേക്കും മറഞ്ഞിരിക്കുമോ? അങ്ങയുടെ ക്രോധം എത്ര കാലം അഗ്നിപോലെ ജ്വലിക്കും?

⁴⁷ പരമനാഥാ, മനുഷ്യായുസ്സ് എത്ര ഹ്രസ്വമെന്ന് ഓർത്താലും! അവിടുന്നു സൃഷ്‍ടിച്ച മർത്യരുടെ ജീവിതം എത്ര വ്യർഥമെന്ന് ഓർക്കണമേ.

⁴⁸ അമർത്യത മനുഷ്യനു ലഭിക്കുമോ? പാതാളത്തിന്റെ പിടിയിൽനിന്നു ജീവനെ രക്ഷിക്കാൻ ആർക്കെങ്കിലും കഴിയുമോ?

⁴⁹ നാഥാ, അങ്ങയുടെ അചഞ്ചലസ്നേഹം വെളിപ്പെടുത്തിയ പണ്ടത്തെ പ്രവൃത്തികൾ എവിടെ? വിശ്വസ്തനായ അവിടുന്നു ദാവീദിനു നല്‌കിയ വാഗ്ദാനങ്ങൾ എവിടെ?

⁵⁰ നാഥാ, അവിടുത്തെ ദാസൻ നിന്ദാപാത്രമായിരിക്കുന്നത് ഓർക്കണമേ, സർവവിജാതീയരുടെയും നിന്ദയും ശാപവും ഞാൻ ഏല്‌ക്കുന്നതു മറക്കരുതേ.

⁵¹ സർവേശ്വരാ, അങ്ങയുടെ ശത്രുക്കൾ അവിടുത്തെ അഭിഷിക്തനെ അധിക്ഷേപിക്കുന്നു. എങ്ങോട്ടു തിരിഞ്ഞാലും അവർ അവനെ പരിഹസിക്കുന്നു.

⁵² സർവേശ്വരൻ എന്നേക്കും വാഴ്ത്തപ്പെടട്ടെ. ആമേൻ, ആമേൻ.