സങ്കീർത്തനങ്ങൾ 88 - സത്യവേദപുസ്തകം C.L. (BSI)

സഹായത്തിനുവേണ്ടിയുള്ള യാചന

കോരഹ്പുത്രന്മാരുടെ സങ്കീർത്തനം; ഗായകസംഘനേതാവിന്, മഹലത്ത് രാഗത്തിൽ എസ്രാഹ്യനായ ഹേമാന്റെ ഒരു ധ്യാനം.

¹ എന്റെ രക്ഷകനായ ദൈവമേ, സർവേശ്വരാ; രാവും പകലും ഞാൻ തിരുസന്നിധിയിൽ നിലവിളിക്കുന്നു;

² എന്റെ പ്രാർഥന ശ്രദ്ധിക്കണമേ; എന്റെ നിലവിളി കേൾക്കണമേ.

³ ഞാൻ ദുരിതത്തിൽ അകപ്പെട്ടിരിക്കുന്നു; ഞാൻ പാതാളത്തോടു സമീപിച്ചിരിക്കുന്നു.

⁴ മൃത്യുഗർത്തത്തിൽ പതിക്കാൻ പോകുന്നവരുടെ കൂട്ടത്തിൽ ഞാൻ എണ്ണപ്പെട്ടിരിക്കുന്നു. എന്റെ ശക്തി ചോർന്നുപോയിരിക്കുന്നു.

⁵ മരിച്ചവരിൽ ഒരുവനെപ്പോലെ, ഞാൻ ഉപേക്ഷിക്കപ്പെട്ടിരിക്കുന്നു. വധിക്കപ്പെട്ട് ശവക്കുഴിയിൽ തള്ളപ്പെട്ടവനെപ്പോലെയായി ഞാൻ. അവിടുത്തെ സ്മരണയിൽനിന്നു മറഞ്ഞവന്റെ സ്ഥിതിയിലാണു ഞാനിപ്പോൾ. അവർ അങ്ങയുടെ പരിപാലനത്തിൽനിന്നു ഛേദിക്കപ്പെട്ടിരിക്കുന്നുവല്ലോ.

⁶ പാതാളത്തിന്റെ അടിത്തട്ടിൽ, അന്ധകാരനിബിഡമായ അഗാധഗർത്തത്തിൽ, അവിടുന്ന് എന്നെ തള്ളിയിട്ടിരിക്കുന്നു.

⁷ അവിടുത്തെ ക്രോധം എന്നെ ഞെരുക്കുന്നു. അവിടുത്തെ രോഷത്തിന്റെ തിരമാലകൾ എന്നെ മൂടുന്നു.

⁸ സ്നേഹിതർ എന്നെ കണ്ട് ഒഴിഞ്ഞുമാറാൻ, അവിടുന്നിടയാക്കി. അവർക്കു ഞാനൊരു ഭീകരദൃശ്യമാണ്. രക്ഷപെടാനാവാത്തവിധം ഞാൻ തടവറയിലായിരിക്കുന്നു.

⁹ ദുഃഖംകൊണ്ട് എന്റെ കാഴ്ച മങ്ങിയിരിക്കുന്നു; സർവേശ്വരാ, ഞാൻ ഇടവിടാതെ അങ്ങയെ വിളിച്ചപേക്ഷിക്കുന്നു. ഞാൻ കൈ ഉയർത്തി അവിടുത്തോടു പ്രാർഥിക്കുന്നു.

¹⁰ മരിച്ചവർക്കുവേണ്ടി അവിടുന്നു അദ്ഭുതം പ്രവർത്തിക്കുമോ? മൃതന്മാർ എഴുന്നേറ്റ് അങ്ങയെ സ്തുതിക്കുമോ?

¹¹ ശവക്കുഴിയിൽ അവിടുത്തെ അചഞ്ചല സ്നേഹം പ്രഘോഷിക്കപ്പെടുമോ? മൃതരുടെ ലോകത്ത് അവിടുത്തെ വിശ്വസ്തത പ്രസ്താവിക്കപ്പെടുമോ?

¹² ആ അന്ധലോകത്ത് അവിടുത്തെ അദ്ഭുതങ്ങളോ, വിസ്മൃതിയുടെ ലോകത്ത് അവിടുത്തെ നീതിയോ അറിയപ്പെടുമോ?

¹³ എന്നാൽ, സർവേശ്വരാ, ഞാൻ അങ്ങയോടു നിലവിളിക്കുന്നു. പ്രഭാതംതോറും ഞാൻ അങ്ങയോടു പ്രാർഥിക്കുന്നു.

¹⁴ സർവേശ്വരാ, അവിടുന്ന് എന്നെ തള്ളിക്കളഞ്ഞിരിക്കുന്നതെന്ത്? അവിടുന്ന് എന്നിൽനിന്നു മുഖം മറയ്‍ക്കുന്നതെന്ത്?

¹⁵ ചെറുപ്പംമുതലേ ഞാൻ പീഡിതനും മരണാസന്നനും ആണ്. അവിടുന്ന് ഏല്പിച്ച ക്രൂരകഷ്ടതകളാൽ ഞാൻ നിസ്സഹായനായിത്തീർന്നിരിക്കുന്നു.

¹⁶ അവിടുത്തെ ക്രോധം എന്റെ മീതെ കവിഞ്ഞൊഴുകി. അവിടുത്തെ ഭയങ്കര പീഡനങ്ങൾ എന്നെ നശിപ്പിക്കുന്നു.

¹⁷ പെരുവെള്ളംപോലെ അവ എപ്പോഴും എന്നെ വലയം ചെയ്യുന്നു. അവ കൂട്ടമായി വന്ന് എന്നെ പൊതിയുന്നു.

¹⁸ ഉറ്റവരും സ്നേഹിതരും എന്നിൽനിന്ന്, അകന്നു മാറാൻ അവിടുന്ന് ഇടയാക്കി. എനിക്കു കൂട്ടുവരാൻ ഇരുൾ മാത്രം!