സങ്കീർത്തനങ്ങൾ 87 - സത്യവേദപുസ്തകം C.L. (BSI)

സീയോൻ-ജനതകളുടെ മാതാവ്

കോരഹ്പുത്രന്മാരുടെ സങ്കീർത്തനം; ഒരു ഗീതം

¹ സർവേശ്വരൻ തന്റെ നഗരം വിശുദ്ധ പർവതത്തിൽ സ്ഥാപിച്ചു.

² ഇസ്രായേലിലെ എല്ലാ സ്ഥലങ്ങളെക്കാളും അവിടുന്നു സീയോനെ സ്നേഹിക്കുന്നു.

³ ദൈവത്തിന്റെ നഗരമേ, നിന്നെക്കുറിച്ചു മഹത്തായ കാര്യങ്ങൾ ദൈവം അരുളിച്ചെയ്തിരിക്കുന്നു.

⁴ എന്നെ അംഗീകരിക്കുന്നവരുടെ കൂട്ടത്തിൽ, ഈജിപ്തും ബാബിലോണും ഉൾപ്പെടുന്നു. ഫെലിസ്ത്യരും സോർ നിവാസികളും എത്യോപ്യരും ‘ഇവൻ അവിടെ ജനിച്ചവൻ’ എന്ന് അഭിമാനിക്കും.

⁵ സകല ജനതകളും തങ്ങൾ സീയോനിൽ ജനിച്ചവരാണെന്നു പറയും. അത്യുന്നതനായ ദൈവമാണ് ആ നഗരം സ്ഥാപിച്ചത്.

⁶ സർവേശ്വരൻ ജനതകളുടെ കണക്കെടുക്കുമ്പോൾ, എല്ലാവരും സീയോനിൽ ജനിച്ചവരെന്നു രേഖപ്പെടുത്തും.

⁷ ‘സീയോനാണ് ഞങ്ങളുടെ അനുഗ്രഹങ്ങളുടെ ഉറവിടം’ എന്ന് എല്ലാവരും പാടി നൃത്തം ചെയ്യും.