സങ്കീർത്തനങ്ങൾ 84 - സത്യവേദപുസ്തകം C.L. (BSI)

സർവേശ്വരന്റെ ആലയം

ഗായകസംഘനേതാവിന്; ഗഥ്യരാഗത്തിൽ, കോരഹ്പുത്രന്മാരുടെ ഒരു സങ്കീർത്തനം.

¹ സർവശക്തനായ സർവേശ്വരാ, തിരുനിവാസം എത്ര മനോഹരം!

² അവിടുത്തെ ആലയത്തിലേക്കു വരാൻ ഞാൻ എത്രമാത്രം അഭിവാഞ്ഛിക്കുന്നു. ജീവിക്കുന്ന ദൈവത്തെ ഞാൻ സന്തോഷത്തോടെ, സർവാത്മനാ പാടിപ്പുകഴ്ത്തുന്നു.

³ എന്റെ രാജാവും ദൈവവുമായ സർവശക്തനായ സർവേശ്വരാ, കുരുവി ഒരു കൂടും മീവൽപ്പക്ഷി കുഞ്ഞുങ്ങൾക്ക് ഒരു വീടും അവിടുത്തെ യാഗപീഠത്തിനരികിൽ കണ്ടെത്തുന്നുവല്ലോ.

⁴ ഇടവിടാതെ അങ്ങയെ സ്തുതിച്ചുകൊണ്ട്, അവിടുത്തെ ആലയത്തിൽ വസിക്കുന്നവർ എത്ര ധന്യർ!

⁵ ശക്തി അങ്ങയിൽ ആയിരിക്കുന്നവർ അനുഗൃഹീതർ! സീയോനിലേക്കുള്ള രാജവീഥികൾ അവരുടെ ഹൃദയത്തിലുണ്ട്.

⁶ ഉണങ്ങിവരണ്ട ബാക്കാതാഴ്‌വരയിലൂടെ കടന്നുപോകുമ്പോൾ, അവർ അതിനെ നീരുറവുകളുടെ താഴ്‌വരയാക്കുന്നു. മുന്മഴയാൽ അത് അനുഗ്രഹിക്കപ്പെടുന്നു.

⁷ അവർ മേല്‌ക്കുമേൽ ശക്തി പ്രാപിക്കുന്നു. അവർ സീയോനിൽ ദേവാധിദേവനെ ദർശിക്കുന്നു.

⁸ സർവശക്തനായ ദൈവമേ, സർവേശ്വരാ, എന്റെ പ്രാർഥന കേൾക്കണമേ. യാക്കോബിന്റെ ദൈവമേ, ചെവിക്കൊള്ളണമേ.

⁹ ഞങ്ങളുടെ പരിചയായ ദൈവമേ, അവിടുത്തെ അഭിഷിക്തനെ കടാക്ഷിക്കണമേ.

¹⁰ അന്യസ്ഥലത്ത് ആയിരം ദിവസം ജീവിക്കുന്നതിനെക്കാൾ, അവിടുത്തെ ആലയത്തിൽ ഒരു ദിവസം ജീവിക്കുന്നത് അഭികാമ്യം. ദുഷ്ടന്മാരുടെ കൂടാരത്തിൽ പാർക്കുന്നതിനെക്കാൾ, എന്റെ ദൈവത്തിന്റെ ആലയത്തിലെ വാതിൽകാവല്‌ക്കാരൻ ആകുന്നതാണ് എനിക്ക് ഇഷ്ടം.

¹¹ സർവേശ്വരനായ ദൈവം നമ്മുടെ പരിചയും സൂര്യനും ആകുന്നു. അവിടുന്നു നമുക്കു കൃപയും മഹത്ത്വവും നല്‌കുന്നു. പരമാർഥതയോടെ ജീവിക്കുന്നവർക്ക് അവിടുന്ന് ഒരു നന്മയും നിഷേധിക്കുകയില്ല.

¹² സർവശക്തനായ സർവേശ്വരാ, അങ്ങയിൽ ശരണം വയ്‍ക്കുന്നവർ എത്ര അനുഗൃഹീതർ.