സങ്കീർത്തനങ്ങൾ 83 - സത്യവേദപുസ്തകം C.L. (BSI)

ശത്രുക്കളുടെ പതനത്തിനുവേണ്ടി

ആസാഫിന്റെ സങ്കീർത്തനം

¹ ദൈവമേ, മൗനമായിരിക്കരുതേ! അവിടുന്നു മിണ്ടാതെ നിശ്ചലനായിരിക്കരുതേ.

² ഇതാ, അവിടുത്തെ ശത്രുക്കൾ കലാപമുണ്ടാക്കുന്നു; അങ്ങയെ വെറുക്കുന്നവർ, അങ്ങേക്കെതിരെ തല ഉയർത്തിയിരിക്കുന്നു.

³ അവിടുത്തെ ജനത്തിനെതിരെ അവർ ഗൂഢപദ്ധതികൾ തയ്യാറാക്കുന്നു. അവിടുന്നു സംരക്ഷിക്കുന്ന ജനത്തിനെതിരെ അവർ ഗൂഢാലോചന നടത്തുന്നു.

⁴ വരുവിൻ, ഇസ്രായേൽ ഒരു ജനതയായിരിക്കാത്തവിധം നമുക്ക് അവരെ തുടച്ചു നീക്കാം ഇനിമേൽ അവരുടെ നാമം പോലും ആരും ഓർക്കാനിടവരരുത് എന്ന് അവർ പറയുന്നു.

⁵ അവർ ഒരുമയോടെ ഗൂഢാലോചന നടത്തി; അങ്ങേക്കെതിരെ സഖ്യമുണ്ടാക്കി.

⁶ എദോമ്യരും ഇശ്മായേല്യരും മോവാബ്യരും ഹഗര്യരും

⁷ ഗെബാൽ, അമ്മോൻ, അമാലേക്ക്, സോർ, ഫെലിസ്ത്യനിവാസികളും ഒത്തുചേർന്നു.

⁸ അസ്സീറിയാക്കാരും അവരോടു ചേർന്നു; ലോത്തിന്റെ മക്കളുടെ സുശക്തകരമാണ് അവർ.

⁹ മിദ്യാന്യരോടു ചെയ്തതുപോലെ അവരോടു ചെയ്യണമേ. കീശോൻനദീതീരത്തു വച്ച് സീസരയോടും യാബീനോടും ചെയ്തതുപോലെതന്നെ.

¹⁰ എൻദോരിൽവച്ച് അവിടുന്ന് അവരെ നശിപ്പിച്ചു, അവർ മണ്ണിനു വളമായിത്തീർന്നു.

¹¹ അവരുടെ പ്രമാണികളോട് ഓരേബ്, സേബ് എന്നിവരോടും, അവരുടെ പ്രഭുക്കന്മാരോട് സേബഹ്, സല്മുന്നാ എന്നിവരോടും ചെയ്തതുപോലെ ചെയ്യണമേ.

¹² ദൈവത്തിന്റെ വകയായ ഈ മേച്ചിൽസ്ഥലം നമുക്കു പിടിച്ചെടുക്കാം എന്ന് അവർ പറഞ്ഞല്ലോ.

¹³ എന്റെ ദൈവമേ, അവരെ ചുഴലിക്കാറ്റിൽ പറക്കുന്ന പൊടിപോലെയും കാറ്റിൽ പാറുന്ന പതിരുപോലെയും ആക്കണമേ.

¹⁴ വനത്തെ ദഹിപ്പിക്കുന്ന അഗ്നിപോലെയും മലകളെ വിഴുങ്ങുന്ന തീനാമ്പുകൾപോലെയും

¹⁵ അവിടുത്തെ കൊടുങ്കാറ്റ് അവരെ പിന്തുടരണമേ. അവിടുത്തെ ചുഴലിക്കാറ്റുകൊണ്ട് അവരെ പരിഭ്രാന്തരാക്കണമേ.

¹⁶ സർവേശ്വരാ, അവർ അങ്ങയുടെ മഹത്ത്വം അംഗീകരിക്കാൻ, അവരെ ലജ്ജിപ്പിക്കണമേ.

¹⁷ അവർ എന്നേക്കും അപമാനിതരും പരിഭ്രാന്തരുമാകട്ടെ. അവർ ലജ്ജിതരായി നശിക്കട്ടെ.

¹⁸ സർവേശ്വരൻ എന്നു നാമമുള്ള അവിടുന്നു മാത്രമാണ് ഭൂമിക്കെല്ലാം അധിപതിയായ അത്യുന്നതൻ എന്ന് അവർ അറിയട്ടെ.