സങ്കീർത്തനങ്ങൾ 82 - സത്യവേദപുസ്തകം C.L. (BSI)

ദൈവം സർവാധിപതി

ആസാഫിന്റെ സങ്കീർത്തനം

¹ ദൈവം സ്വർഗീയസഭയിൽ ഉപവിഷ്ടനായിരിക്കുന്നു; അവിടുന്ന് അവരുടെ ഇടയിൽ ന്യായം വിധിക്കുന്നു.

² നിങ്ങൾ എത്ര കാലം അന്യായമായി വിധിക്കും? എത്ര കാലം ദുഷ്ടരുടെ പക്ഷം പിടിക്കും?

³ എളിയവനും അനാഥനും നീതി പാലിച്ചു കൊടുക്കുവിൻ, പീഡിതന്റെയും അഗതിയുടെയും അവകാശം സംരക്ഷിക്കുവിൻ;

⁴ ദുർബലനെയും എളിയവനെയും രക്ഷിക്കുവിൻ. ദുഷ്ടരിൽനിന്ന് അവരെ വിടുവിക്കുവിൻ.

⁵ നിങ്ങൾക്ക് അറിവോ വിവേകമോ ഇല്ല. നിങ്ങൾ അനീതിയുടെ അന്ധകാരത്തിൽ നടക്കുന്നു. ധാർമികതയുടെ അടിത്തറ നിങ്ങൾ തകർത്തിരിക്കുന്നു.

⁶ നിങ്ങൾ ദേവന്മാർ എന്നും നിങ്ങൾ അത്യുന്നതന്റെ പുത്രന്മാർ എന്നും ഞാൻ പറഞ്ഞു.

⁷ എങ്കിലും നിങ്ങൾ മർത്യരെപ്പോലെ മരിക്കും; ഏതൊരു പ്രഭുവിനെയുംപോലെ വീണുപോകും.

⁸ ദൈവമേ, എഴുന്നേറ്റു ഭൂമിയെ വിധിക്കണമേ; സർവജനതകളും അങ്ങയുടേതാണല്ലോ.