സങ്കീർത്തനങ്ങൾ 81 - സത്യവേദപുസ്തകം C.L. (BSI)

ഉത്സവഗാനം

ഗായകസംഘനേതാവിന്; ഗഥ്യരാഗത്തിൽ ആസാഫിന്റെ സങ്കീർത്തനം

¹ നമ്മുടെ സംരക്ഷകനായ ദൈവത്തിനു സ്തുതിഗീതം പാടുവിൻ. യാക്കോബിന്റെ ദൈവത്തിന് ആനന്ദത്തോടെ ആർപ്പിടുവിൻ.

² തപ്പു കൊട്ടുവിൻ, വീണയും കിന്നരവും മീട്ടി മധുരനാദമുതിർക്കുവിൻ.

³ അമാവാസിയിലും പൗർണമിയിലും ഉത്സവവേളയിലും കാഹളമൂതുവിൻ.

⁴ ഇത് ഇസ്രായേലിനു ലഭിച്ച നിയമമല്ലോ; യാക്കോബിന്റെ ദൈവം നല്‌കിയ പ്രമാണം.

⁵ അവിടുന്ന് ഈജിപ്തിനെതിരെ പുറപ്പെട്ടപ്പോൾ, യോസേഫിന്റെ സന്തതികൾക്ക് ഈ കല്പന നല്‌കി. ഞാൻ ഒരു അപരിചിത ശബ്ദം കേട്ടു.

⁶ ഞാൻ നിങ്ങളുടെ ചുമലിൽനിന്നു ചുമടു നീക്കി; അടിമവേലയിൽനിന്നു നിങ്ങളുടെ കൈകളെ സ്വതന്ത്രമാക്കി.

⁷ കഷ്ടകാലത്ത് നിങ്ങൾ എന്നെ വിളിച്ചപേക്ഷിച്ചു. ഞാൻ നിങ്ങളെ വിടുവിച്ചു. ഇടിമുഴക്കത്തിന്റെ മറവിൽനിന്ന്, ഞാൻ നിങ്ങൾക്ക് ഉത്തരമരുളി. മെരീബാ നീർച്ചാലിനരികിൽവച്ച് ഞാൻ നിങ്ങളെ പരീക്ഷിച്ചു.

⁸ എന്റെ ജനമേ, ഈ മുന്നറിയിപ്പു കേൾക്കുക, ഇസ്രായേൽജനമേ, നിങ്ങൾ എന്റെ വാക്ക് ശ്രദ്ധിച്ചിരുന്നെങ്കിൽ!

⁹ നിങ്ങൾക്ക് അന്യദേവന്മാർ ഉണ്ടാകരുത്, അന്യദേവന്മാരിൽ ഒന്നിനെയും നിങ്ങൾ നമസ്കരിക്കരുത്.

¹⁰ ഈജിപ്തിൽനിന്നു നിങ്ങളെ മോചിപ്പിച്ചു കൊണ്ടുവന്ന സർവേശ്വരനായ ഞാനാണു നിങ്ങളുടെ ദൈവം. നിങ്ങൾ വായ് മലർക്കെ തുറക്കുക. ഞാൻ അതു നിറയ്‍ക്കാം.

¹¹ എന്നാൽ, എന്റെ ജനം എന്റെ വാക്ക് ശ്രദ്ധിച്ചില്ല. ഇസ്രായേൽജനം എന്നെ ഗണിച്ചില്ല.

¹² അതുകൊണ്ട് തന്നിഷ്ടത്തിനു നടക്കുമെന്നുള്ള അവരുടെ ദുശ്ശാഠ്യം ഞാൻ അനുവദിച്ചുകൊടുത്തു.

¹³ എന്റെ ജനം എന്നെ അനുസരിച്ചിരുന്നെങ്കിൽ, ഇസ്രായേൽജനം എന്റെ വഴിയിൽ നടന്നിരുന്നെങ്കിൽ.

¹⁴ എങ്കിൽ, ഞാൻ അവരുടെ ശത്രുക്കളെ വേഗത്തിൽ കീഴടക്കി ശിക്ഷിക്കുമായിരുന്നു.

¹⁵ എന്നെ വെറുക്കുന്നവർ എന്റെ കാല്‌ക്കൽ വീഴുമായിരുന്നു. ഞാൻ അവരെ എന്നേക്കുമായി ശിക്ഷിക്കുമായിരുന്നു.

¹⁶ ഞാൻ നിങ്ങളെ മേൽത്തരം കോതമ്പുകൊണ്ട് പോഷിപ്പിക്കുമായിരുന്നു. പാറയിൽനിന്നുള്ള തേൻകൊണ്ട് സംതൃപ്തരാക്കുമായിരുന്നു.