സങ്കീർത്തനങ്ങൾ 80 - സത്യവേദപുസ്തകം C.L. (BSI)

പുനരുദ്ധാരണത്തിനു വേണ്ടിയുള്ള പ്രാർഥന

ഗായകസംഘനേതാവിന്; സാരസരാഗത്തിൽ, ആസാഫിന്റെ സങ്കീർത്തനം

¹ ഇസ്രായേലിന്റെ ഇടയനായ നാഥാ, ആട്ടിൻപറ്റത്തെ എന്നപോലെ യോസേഫിന്റെ സന്തതികളെ നയിക്കുന്ന അവിടുന്നു ഞങ്ങളെ ശ്രദ്ധിച്ചാലും; കെരൂബുകളുടെമേൽ സിംഹാസനസ്ഥനായവനേ,

² എഫ്രയീം, മനശ്ശെ, ബെന്യാമീൻഗോത്രങ്ങൾക്ക് അങ്ങയെ വെളിപ്പെടുത്തിയാലും, അവിടുത്തെ ശക്തി ഉണർത്തി, ഞങ്ങളെ രക്ഷിക്കാൻ വരണമേ.

³ ദൈവമേ, ഞങ്ങളെ പുനരുദ്ധരിക്കണമേ, കരുണയോടെ കടാക്ഷിച്ച് ഞങ്ങളെ രക്ഷിക്കണമേ.

⁴ സർവേശ്വരാ, സർവശക്തനായ ദൈവമേ, അവിടുന്ന് എത്രകാലം ഞങ്ങളോടു കോപിക്കുകയും അവിടുത്തെ ജനത്തിന്റെ പ്രാർഥനകൾ കേൾക്കാതിരിക്കുകയും ചെയ്യും?

⁵ അവിടുന്നു ഞങ്ങൾക്കു ഭക്ഷിക്കാൻ ദുഃഖവും കുടിക്കാൻ അളവില്ലാതെ കണ്ണുനീരും നല്‌കിയിരിക്കുന്നു.

⁶ അയൽരാജ്യങ്ങൾ ഞങ്ങളുടെ ദേശത്തിനു വേണ്ടി ശണ്ഠ കൂടുന്നു. ഞങ്ങളുടെ ശത്രുക്കൾ ഞങ്ങളെ നോക്കി പരിഹസിക്കുന്നു.

⁷ സർവശക്തനായ ദൈവമേ, ഞങ്ങളെ പുനരുദ്ധരിക്കണമേ. കരുണയോടെ കടാക്ഷിച്ച് ഞങ്ങളെ രക്ഷിക്കണമേ.

⁸ അവിടുന്ന് ഈജിപ്തിൽനിന്ന് ഒരു മുന്തിരിവള്ളി കൊണ്ടുവന്ന് അന്യജനതകളെ പുറത്താക്കി അത് അവിടെ നട്ടു.

⁹ അവിടുന്ന് അതിനു തടമെടുത്തു, അത് ആഴത്തിൽ വേരൂന്നി, ദേശം മുഴുവൻ പടർന്നു.

¹⁰ അതു പർവതങ്ങൾക്കു തണൽ വിരിച്ചു. അതിന്റെ ശാഖകൾ കൂറ്റൻ ദേവദാരുക്കളെ ആവരണം ചെയ്തു.

¹¹ അത് തന്റെ ശാഖകൾ സമുദ്രംവരെയും ചില്ലകൾ നദിവരെയും നീട്ടി.

¹² അങ്ങ് ആ മുന്തിരിച്ചെടിയുടെ വേലിക്കെട്ട് തകർത്തതെന്ത്? വഴിപോക്കരെല്ലാം അതിന്റെ ഫലം പറിക്കുന്നു.

¹³ കാട്ടുപന്നി അതിനെ നശിപ്പിക്കുന്നു. വന്യമൃഗങ്ങൾ അതിനെ തിന്നുകളയുന്നു.

¹⁴ സർവശക്തനായ ദൈവമേ, ഞങ്ങളിലേക്കു തിരിയണമേ, സ്വർഗത്തിൽനിന്നു തൃക്കൺപാർക്കണമേ. ഈ മുന്തിരിവള്ളിയെ പരിഗണിച്ചാലും.

¹⁵ അവിടുത്തെ വലങ്കൈ നട്ട ഈ മുന്തിരിവള്ളിയെ, അങ്ങേക്കായി വളർത്തി വലുതാക്കിയ ഈ മുന്തിരിച്ചെടിയെ രക്ഷിക്കണമേ.

¹⁶ ശത്രുക്കൾ അതിനെ വെട്ടി വീഴ്ത്തുകയും തീവച്ചു ചുടുകയും ചെയ്തിരിക്കുന്നു. അവിടുത്തെ ഭർത്സനത്താൽ അവർ നശിച്ചുപോകട്ടെ.

¹⁷ അവിടുത്തെ വലത്തുഭാഗത്തിരിക്കുന്ന പുരുഷനെ, അവിടുത്തെ ശുശ്രൂഷയ്‍ക്കായി അവിടുന്നു ശക്തനാക്കിയ, മനുഷ്യപുത്രനെതന്നെ സംരക്ഷിക്കണമേ.

¹⁸ ഞങ്ങൾ ഇനി ഒരിക്കലും അങ്ങയെ വിട്ടുപിരിയുകയില്ല ഞങ്ങളെ പുനരുജ്ജീവിപ്പിക്കണമേ.

¹⁹ ഞങ്ങൾ അങ്ങയെ എന്നും ആരാധിക്കും. സർവേശ്വരാ, സർവശക്തനായ ദൈവമേ, ഞങ്ങളെ പുനരുദ്ധരിക്കണമേ. കരുണയോടെ കടാക്ഷിച്ച് ഞങ്ങളെ രക്ഷിക്കണമേ.