സങ്കീർത്തനങ്ങൾ 77 - സത്യവേദപുസ്തകം C.L. (BSI)

ആശ്വാസം നല്‌കുന്ന ദൈവം

ഗായകസംഘനേതാവിന്, യെദൂഥൂന്യ രാഗത്തിൽ, ആസാഫിന്റെ സങ്കീർത്തനം

¹ ഞാൻ ദൈവത്തോടു നിലവിളിക്കുന്നു, ഞാൻ അവിടുത്തോട് ഉച്ചത്തിൽ നിലവിളിക്കുന്നു.

² എന്റെ കഷ്ടകാലത്ത് ഞാൻ സർവേശ്വരനെ വിളിച്ചപേക്ഷിച്ചു. രാത്രി മുഴുവൻ തളരാതെ ഞാൻ കൈ ഉയർത്തി പ്രാർഥിച്ചു, എങ്കിലും എനിക്ക്, ആശ്വാസം ലഭിച്ചില്ല.

³ ദൈവത്തെ ഓർക്കുന്നു എങ്കിലും ഞാൻ വിലപിക്കുന്നു. ദൈവത്തെ ധ്യാനിച്ചിട്ടും ഞാൻ നിരാശനായിത്തീരുന്നു.

⁴ അവിടുന്ന് എനിക്ക് ഉറക്കം നല്‌കുന്നില്ല. ഞാൻ വ്യാകുലനായിരിക്കുന്നു; എന്താണു പറയേണ്ടതെന്ന് എനിക്കറിഞ്ഞുകൂടാ.

⁵ ഞാൻ കഴിഞ്ഞ കാലത്തെക്കുറിച്ച് ഓർക്കുന്നു. പണ്ടത്തെ വർഷങ്ങളെ ഞാൻ അനുസ്മരിക്കുന്നു.

⁶ രാത്രിയിൽ ഞാൻ ഗാഢചിന്തയിൽ കഴിയുന്നു. ഞാൻ ധ്യാനിക്കുകയും ആത്മപരിശോധന നടത്തുകയും ചെയ്യുന്നു.

⁷ സർവേശ്വരൻ എന്നേക്കുമായി തള്ളിക്കളയുമോ? ഇനി ഒരിക്കലും അവിടുന്ന് എന്നിൽ പ്രസാദിക്കയില്ലേ?

⁸ അവിടുത്തെ അചഞ്ചലസ്നേഹം എന്നേക്കുമായി അറ്റുപോയോ? അവിടുന്നു നമ്മോടു ചെയ്ത വാഗ്ദാനങ്ങൾ നിറവേറ്റുകയില്ലേ?

⁹ കരുണ കാട്ടാൻ ദൈവം മറന്നുപോയോ? അവിടുന്നു നമ്മോടുള്ള കോപത്താൽ കരുണയുടെ വാതിൽ അടച്ചുകളഞ്ഞുവോ?

¹⁰ അത്യുന്നതനായ ദൈവം നമുക്കുവേണ്ടി, പ്രവർത്തിക്കാത്തതാണ് എന്റെ ദുഃഖകാരണം എന്നു ഞാൻ പറഞ്ഞു.

¹¹ സർവേശ്വരന്റെ പ്രവൃത്തികൾ ഞാൻ അനുസ്മരിക്കും, അവിടുന്നു പണ്ടു പ്രവർത്തിച്ച അദ്ഭുതങ്ങൾ തന്നെ.

¹² അവിടുത്തെ സകല പ്രവൃത്തികളെയും ഞാൻ ധ്യാനിക്കും. അവിടുത്തെ മഹത്തായ പ്രവൃത്തികൾതന്നെ.

¹³ ദൈവമേ, അവിടുത്തെ മാർഗം വിശുദ്ധമാകുന്നു. നമ്മുടെ ദൈവത്തെപ്പോലെ ഉന്നതനായി ആരുണ്ട്?

¹⁴ അവിടുന്നാണ് അദ്ഭുതങ്ങൾ പ്രവർത്തിക്കുന്ന ദൈവം, അവിടുന്നു ജനതകളുടെ ഇടയിൽ ശക്തി വെളിപ്പെടുത്തി.

¹⁵ തൃക്കൈകൊണ്ടു സ്വജനത്തെ അവിടുന്നു രക്ഷിച്ചു. യാക്കോബിന്റെയും യോസേഫിന്റെയും സന്തതികളെത്തന്നെ.

¹⁶ ദൈവമേ, വെള്ളം അങ്ങയെ കണ്ടു ഭ്രമിച്ചു, അഗാധത അങ്ങയെ കണ്ടു വിറച്ചു.

¹⁷ മേഘങ്ങൾ വെള്ളം ചൊരിഞ്ഞു, ആകാശം ഇടി മുഴക്കി; അവിടുത്തെ മിന്നലുകൾ അസ്ത്രങ്ങൾ പോലെ എല്ലാ ദിക്കുകളിലേക്കും പാഞ്ഞു.

¹⁸ അങ്ങയുടെ ഇടിമുഴക്കം ചുഴലിക്കാറ്റിൽ മാറ്റൊലികൊണ്ടു. മിന്നലുകൾ ഭൂതലത്തെ പ്രകാശിപ്പിച്ചു; ഭൂമി നടുങ്ങിവിറച്ചു.

¹⁹ അങ്ങയുടെ മാർഗം സമുദ്രത്തിലൂടെയും അങ്ങയുടെ വഴി ആഴിയുടെ അടിത്തട്ടിലൂടെയും ആയിരുന്നു. എന്നാൽ അങ്ങയുടെ കാൽപ്പാടുകൾ അദൃശ്യമായിരുന്നു.

²⁰ മോശയുടെയും അഹരോന്റെയും നേതൃത്വത്തിൽ, അവിടുത്തെ ജനത്തെ ഒരു ആട്ടിൻപറ്റത്തെ പോലെ, അവിടുന്നു നയിച്ചു.