സങ്കീർത്തനങ്ങൾ 76 - സത്യവേദപുസ്തകം C.L. (BSI)

ജേതാവായ ദൈവം

ഗായകസംഘനേതാവിന്; തന്ത്രിനാദത്തോടെ, ആസാഫിന്റെ ഒരു സങ്കീർത്തനം.

¹ ദൈവം യെഹൂദായിൽ പ്രസിദ്ധനാണ്; ഇസ്രായേലിൽ അവിടുത്തെ നാമം മഹത്ത്വപൂർണമാണ്.

² അവിടുത്തെ കൂടാരം യെരൂശലേമിലും തിരുനിവാസം സീയോനിലും ആകുന്നു.

³ അവിടെവച്ച് അവിടുന്നു ശത്രുക്കളുടെ തീയമ്പുകളും വാളും പരിചയും മറ്റെല്ലാ ആയുധങ്ങളും തകർത്തുകളഞ്ഞു.

⁴ ശാശ്വതശൈലങ്ങളെക്കാൾ അവിടുന്നു, മഹോന്നതനും മഹിമയുള്ളവനും ആകുന്നു.

⁵ ധീരന്മാരുടെ സമ്പത്ത് കൊള്ളയടിച്ചു, അവർ എല്ലാവരും മരണമടഞ്ഞു. അവർക്ക് കൈ ഉയർത്താൻപോലും കഴിഞ്ഞില്ല.

⁶ യാക്കോബിന്റെ ദൈവമേ, അങ്ങ് ശാസിച്ചപ്പോൾ കുതിരകളും തേരാളികളും പ്രജ്ഞയറ്റു വീണു.

⁷ എല്ലാവരും അങ്ങയെ ഭയപ്പെടുന്നു, അവിടുത്തെ കോപം ജ്വലിച്ചാൽ തിരുമുമ്പിൽ നില്‌ക്കാൻ ആർക്കു കഴിയും?

^8-9 സ്വർഗത്തിൽനിന്ന് അവിടുന്നു വിധി പ്രസ്താവിച്ചു, ഭൂമി നടുങ്ങി വിറച്ചു. ദൈവം വിധി നടപ്പിലാക്കാൻ എഴുന്നേറ്റു, ഭൂമിയിലെ സകല പീഡിതരെയും രക്ഷിക്കാൻ തന്നെ.

¹⁰ ദൈവമേ, മനുഷ്യന്റെ കോപവും അവിടുത്തേക്കു സ്തുതിയായി ഭവിക്കും. അവിടുത്തെ കോപത്തിൽനിന്നു രക്ഷപെടുന്നവർ അങ്ങയോടു ചേർന്നു നില്‌ക്കും.

¹¹ നിങ്ങളുടെ ദൈവമായ സർവേശ്വരനു നേർച്ചകൾ നേരുകയും നിറവേറ്റുകയും ചെയ്യുവിൻ. എല്ലാവരും ഭയപ്പെടുന്ന അങ്ങേക്ക്, ചുറ്റുമുള്ള രാജ്യങ്ങൾ കാഴ്ചകൾ കൊണ്ടുവരട്ടെ.

¹² അവിടുന്നു പ്രഭുക്കന്മാരുടെ ഗർവ് അടക്കും. ഭൂമിയിലെ രാജാക്കന്മാർക്ക് അവിടുന്നു ഭീതിദനാണ്.