സങ്കീർത്തനങ്ങൾ 75 - സത്യവേദപുസ്തകം C.L. (BSI)

ന്യായാധിപനായ ദൈവം

ഗായകസംഘനേതാവിന്; നശിപ്പിക്കരുതേ എന്ന രാഗത്തിൽ, ആസാഫിന്റെ സങ്കീർത്തനം.

¹ ദൈവമേ, ഞങ്ങൾ അങ്ങേക്കു സ്തോത്രം ചെയ്യുന്നു; അതേ, ഞങ്ങൾ അങ്ങേക്കു സ്തോത്രം ചെയ്യുന്നു; അങ്ങയുടെ നാമം ഞങ്ങൾ വിളിച്ചപേക്ഷിക്കുന്നു. അവിടുത്തെ അദ്ഭുതകരമായ പ്രവൃത്തികൾ ഞങ്ങൾ പ്രഘോഷിക്കുന്നു.

² ദൈവം അരുളിച്ചെയ്യുന്നു: ഞാൻ നിശ്ചയിക്കുന്ന സമയത്ത് ഞാൻ നീതിപൂർവം വിധിക്കും.

³ ഭൂമിയും അതിലെ സകല നിവാസികളും പ്രകമ്പനം കൊള്ളുമ്പോൾ ഞാൻ അതിന്റെ തൂണുകൾ ഉറപ്പിച്ചു നിർത്തുന്നു.

⁴ ഗർവു കാണിക്കരുതെന്ന് അഹങ്കാരികളോടും ശക്തി കാട്ടരുതെന്ന് ദുഷ്ടരോടും ഞാൻ പറയുന്നു.

⁵ നിങ്ങൾ ശക്തിയിൽ ഊറ്റംകൊള്ളരുത്; ഗർവോടെ സംസാരിക്കയുമരുത്.

⁶ ന്യായവിധി വരുന്നത് കിഴക്കുനിന്നോ, പടിഞ്ഞാറുനിന്നോ, വടക്കുനിന്നോ തെക്കുനിന്നോ അല്ല.

⁷ വിധികർത്താവു ദൈവമാണ്. അവിടുന്നാണ് ഒരുവനെ താഴ്ത്തുകയും മറ്റൊരുവനെ ഉയർത്തുകയും ചെയ്യുന്നത്.

⁸ സർവേശ്വരന്റെ കൈയിൽ ഒരു പാനപാത്രമുണ്ട്. അതിൽ വീര്യമുള്ള വീഞ്ഞ് നുരഞ്ഞുപൊങ്ങുന്നു. അവിടുന്ന് അതു പകർന്നു കൊടുക്കുന്നു. ഭൂമിയിലെ സകല ദുഷ്ടന്മാരും അതു മട്ടുവരെ ഊറ്റിക്കുടിക്കും.

⁹ എന്നാൽ ഞാൻ എന്നേക്കും ആനന്ദിക്കും, യാക്കോബിന്റെ ദൈവത്തിനു ഞാൻ സ്തുതിഗീതം ആലപിക്കും.

¹⁰ ദുഷ്ടന്മാരുടെ ശക്തി അവിടുന്നു തകർക്കും; നീതിമാന്മാരുടെ ശക്തിയോ വർധിപ്പിക്കും.