സങ്കീർത്തനങ്ങൾ 74 - സത്യവേദപുസ്തകം C.L. (BSI)

ദേവാലയനാശത്തെക്കുറിച്ചുള്ള വിലാപം

ആസാഫിന്റെ ധ്യാനം.

¹ ദൈവമേ, അവിടുന്ന് ഞങ്ങളെ എന്നേക്കുമായി തള്ളിക്കളഞ്ഞതെന്ത്? അങ്ങയുടെ മേച്ചിൽപ്പുറത്തെ ആടുകളായ ഞങ്ങളുടെ നേരേ അവിടുത്തെ കോപം ജ്വലിക്കുന്നതെന്ത്?

² അങ്ങു പണ്ടേ തിരഞ്ഞെടുത്ത അവിടുത്തെ ജനത്തെ, അങ്ങു വീണ്ടെടുത്ത അവിടുത്തെ അവകാശമായ ഗോത്രത്തെത്തന്നെ ഓർക്കണമേ. അങ്ങു വസിച്ചിരുന്ന സീയോൻപർവതത്തെ വിസ്മരിക്കരുതേ.

³ പൂർണമായി തകർന്നടിഞ്ഞ നാശാവശിഷ്ടങ്ങൾ നടന്നു കാണണമേ. വിശുദ്ധമന്ദിരത്തിലുള്ളതെല്ലാം ശത്രുക്കൾ നശിപ്പിച്ചിരിക്കുന്നു.

⁴ അങ്ങയുടെ ശത്രുക്കൾ വിശുദ്ധമന്ദിരത്തിന്റെ നടുവിൽ നിന്നുകൊണ്ട് ഗർജിക്കുന്നു. അവിടെ അവർ വിജയക്കൊടി നാട്ടിയിരിക്കുന്നു.

⁵ മരംവെട്ടുകാരെപ്പോലെ അവർ ദേവാലയകവാടത്തിലെ

⁶ ചിത്രപ്പണികൾ മഴുകൊണ്ടും ചുറ്റികകൊണ്ടും തകർത്തുകളഞ്ഞിരിക്കുന്നു.

⁷ അവിടുത്തെ വിശുദ്ധമന്ദിരം അവർ അഗ്നിക്കിരയാക്കി, അവിടുത്തെ തിരുനിവാസം അവർ ഇടിച്ചുനിരത്തി അശുദ്ധമാക്കിയിരിക്കുന്നു.

⁸ ഞങ്ങളെ പൂർണമായി തകർത്തുകളയുമെന്ന് അവർ പറഞ്ഞു. ദേശത്തുള്ള എല്ലാ ആരാധനാസ്ഥലങ്ങളും അവർ ചുട്ടുകളഞ്ഞു.

⁹ ഞങ്ങൾ ഒരു അടയാളവും കാണുന്നില്ല, ഒരു പ്രവാചകനും ശേഷിച്ചിട്ടില്ല. ഈ ദുരിതങ്ങൾ എത്ര കാലത്തേക്കെന്ന് ആർക്കും നിശ്ചയവുമില്ല.

¹⁰ ദൈവമേ, ശത്രുക്കൾ എത്ര കാലം അങ്ങയെ നിന്ദിക്കും? അവർ എന്നും അങ്ങയുടെ നാമം ദുഷിക്കുമോ?

¹¹ അവിടുന്നു തൃക്കരം പിൻവലിച്ചിരിക്കുന്നതെന്ത്? അവിടുന്നു ഞങ്ങളെ സഹായിക്കാതെ കൈ കെട്ടിയിരിക്കുന്നതെന്ത്?

¹² ദൈവമേ, ആദിമുതലേ അവിടുന്നു ഞങ്ങളുടെ രാജാവല്ലോ, ഭൂമിയിൽ രക്ഷ പ്രദാനം ചെയ്യുന്നത് അവിടുന്നാണ്.

¹³ സ്വന്തം ശക്തിയാൽ അവിടുന്ന് സമുദ്രത്തെ വിഭജിച്ചു, കടലിലെ ഭീകരജന്തുക്കളുടെ തലകൾ അവിടുന്നു തകർത്തു.

¹⁴ ലിവ്യാഥാന്റെ തലകൾ അവിടുന്നു തകർത്തു. അതിനെ മരുഭൂമിയിലെ ജന്തുക്കൾക്ക് ആഹാരമായി നല്‌കി.

¹⁵ അവിടുന്നു നീരുറവുകളും നീർച്ചാലുകളും തുറന്നുവിട്ടു. ഒരിക്കലും വറ്റാത്ത നദികൾ അവിടുന്നു വറ്റിച്ചു.

¹⁶ അവിടുന്നു രാവും പകലും സൃഷ്‍ടിച്ചു, അവിടുന്നു ചന്ദ്രനെയും നക്ഷത്രങ്ങളെയും സൂര്യനെയും സ്ഥാപിച്ചു.

¹⁷ അവിടുന്നാണ് ഭൂമിക്ക് അതിരുകൾ നിശ്ചയിച്ചത്. വേനൽക്കാലവും ശീതകാലവും സൃഷ്‍ടിച്ചതും അവിടുന്നാണ്.

¹⁸ സർവേശ്വരാ, ശത്രുക്കൾ അങ്ങയെ നിന്ദിക്കുന്നതും മൂഢജനം അങ്ങയെ അധിക്ഷേപിക്കുന്നതും ഓർക്കണമേ.

¹⁹ അങ്ങയുടെ പ്രാവിനെ ദുഷ്ടമൃഗങ്ങൾക്കു വിട്ടുകൊടുക്കരുതേ, ഈ എളിയവരെ എന്നേക്കും മറന്നുകളയരുതേ.

²⁰ അവിടുന്നു ഞങ്ങളോടു ചെയ്ത ഉടമ്പടി ഓർക്കണമേ; ദേശത്തെ ഇരുണ്ടയിടങ്ങളിൽ അക്രമം കുടിപാർക്കുന്നു.

²¹ പീഡിതർ ലജ്ജിതരാകാൻ ഇടയാകരുതേ. ദരിദ്രരും എളിയവരും അവിടുത്തെ സ്തുതിക്കട്ടെ.

²² ദൈവമേ, എഴുന്നേറ്റ് അങ്ങേക്കുവേണ്ടി വാദിക്കണമേ, മൂഢജനം എപ്പോഴും അങ്ങയെ നിന്ദിക്കുന്നത് ഓർക്കണമേ.

²³ അങ്ങയുടെ ശത്രുക്കളുടെ ആരവം ശ്രദ്ധിക്കണമേ, അങ്ങയുടെ വൈരികളുടെ ഇടവിടാതെയുള്ള അട്ടഹാസം ഓർക്കണമേ.