സങ്കീർത്തനങ്ങൾ 63 - സത്യവേദപുസ്തകം C.L. (BSI)

ദൈവത്തിനുവേണ്ടിയുള്ള അഭിവാഞ്ഛ

ദാവീദിന്റെ സങ്കീർത്തനം; യെഹൂദാ മരുഭൂമിയിൽവച്ചു പാടിയത്

¹ ദൈവമേ, അവിടുന്നാണ് എന്റെ ദൈവം; ഞാൻ അങ്ങയെ അന്വേഷിക്കുന്നു. ഉണങ്ങിവരണ്ട ദേശത്തെന്നപോലെ ഞാൻ സർവാത്മനാ അങ്ങേക്കായി ദാഹിക്കുന്നു. അങ്ങയെ കാണാതെ ഞാൻ തളരുന്നു.

² അങ്ങയുടെ ശക്തിയും മഹത്ത്വവും ദർശിക്കാൻ, വിശുദ്ധമന്ദിരത്തിൽ ഞാൻ അങ്ങയെ നോക്കുന്നു.

³ അങ്ങയുടെ അചഞ്ചലസ്നേഹം ജീവനെക്കാൾ അഭികാമ്യം. ഞാൻ അങ്ങയെ പ്രകീർത്തിക്കും.

⁴ എന്റെ ജീവിതകാലം മുഴുവൻ ഞാനങ്ങയെ വാഴ്ത്തും. ഞാൻ കൈകളുയർത്തി അങ്ങയോടു പ്രാർഥിക്കും.

⁵ കിടക്കയിൽവച്ച് ഞാൻ അങ്ങയെ ഓർക്കുകയും രാത്രിയാമങ്ങളിൽ അങ്ങയെ ധ്യാനിക്കുകയും ചെയ്യുമ്പോൾ,

⁶ മൃഷ്ടാന്നഭോജനം കഴിച്ചവനെപ്പോലെ ഞാൻ തൃപ്തനാകുന്നു. ഞാൻ അങ്ങയെ ആനന്ദപൂർവം സ്തുതിക്കും.

⁷ അവിടുന്ന് എന്റെ സഹായകനാണല്ലോ; അവിടുത്തെ ചിറകിൻകീഴിൽ ഞാൻ ആനന്ദഗീതം പാടും.

⁸ ഞാൻ അങ്ങയെ മുറുകെ പിടിച്ചിരിക്കുന്നു; അങ്ങയുടെ വലങ്കൈ എന്നെ സംരക്ഷിക്കുന്നു.

⁹ എന്നെ അപായപ്പെടുത്താൻ നോക്കുന്നവർ, മരണഗർത്തത്തിൽ പതിക്കും.

¹⁰ അവർ വാളിന് ഇരയാകും, അവരുടെ മൃതശരീരങ്ങൾ കുറുനരികൾ ഭക്ഷിക്കും.

¹¹ എന്നാൽ രാജാവ് ദൈവത്തിൽ ആനന്ദിക്കും; ദൈവനാമത്തിൽ സത്യം ചെയ്യുന്നവർ അവിടുത്തെ പുകഴ്ത്തും. വ്യാജം പറയുന്നവരുടെ വായ് അടഞ്ഞുപോകും.