സങ്കീർത്തനങ്ങൾ 60 - സത്യവേദപുസ്തകം C.L. (BSI)

പരാജയത്തിനു ശേഷമുള്ള പ്രാർഥന

ഗായകസംഘനേതാവിന്; സാക്ഷ്യസാരസം എന്ന രാഗത്തിൽ, ദാവീദിന്റെ ഒരു പ്രബോധനഗീതം. യോവാബ് മെസൊപ്പൊത്താമ്യയിലെയും സോബയിലെയും സിറിയാക്കാരോടു യുദ്ധം ചെയ്യുകയും മടക്കയാത്രയിൽ പന്തീരായിരം എദോമ്യരെ ഉപ്പുതാഴ്‌വരയിൽവച്ച് വധിക്കുകയും ചെയ്തപ്പോൾ പാടിയത്.

¹ ദൈവമേ, അവിടുന്നു ഞങ്ങളെ പരിത്യജിച്ചിരിക്കുന്നു. ഞങ്ങളുടെ പ്രതിരോധനിര തകർത്തിരിക്കുന്നു. അവിടുന്ന് ഞങ്ങളോടു കോപിച്ചിരിക്കുന്നു. നാഥാ, ഞങ്ങളെ പുനഃസ്ഥാപിക്കണമേ.

² അവിടുന്നു ദേശത്തെ വിറപ്പിച്ചു; അവിടുന്ന് അതിനെ പിളർന്നിരിക്കുന്നു. അതു തകർന്നുവീഴാറായിരിക്കുന്നു. അതിന്റെ വിള്ളലുകൾ അടയ്‍ക്കണമേ.

³ അവിടുന്നു സ്വജനത്തെ കഠിനദുരിതത്തിന് ഇരയാക്കി, അവിടുന്നു ഞങ്ങൾക്കു പരിഭ്രാന്തിയുടെ വീഞ്ഞു പകർന്നുതന്നു.

⁴ ശത്രുവിന്റെ വില്ലിൽനിന്നു രക്ഷപെടാൻ തന്റെ ഭക്തർക്ക് അടയാളമായി, അവിടുന്ന് ഒരു കൊടി ഉയർത്തിയിരിക്കുന്നു.

⁵ അവിടുത്തെ വലങ്കൈയാൽ ഞങ്ങളെ രക്ഷിക്കണമേ; ഞങ്ങളുടെ പ്രാർഥനയ്‍ക്ക് ഉത്തരം അരുളിയാലും; അങ്ങനെ അവിടുന്നു സ്നേഹിക്കുന്ന ജനം വിടുവിക്കപ്പെടട്ടെ.

⁶ ദൈവം അവിടുത്തെ വിശുദ്ധമന്ദിരത്തിൽനിന്ന് അരുളിച്ചെയ്തിരിക്കുന്നു. വിജയാഹ്ലാദത്തോടെ ഞാൻ ശെഖേം പട്ടണം വിഭജിക്കും. സുക്കോത്ത് താഴ്‌വര എന്റെ ജനത്തിനു ഞാൻ അളന്നുകൊടുക്കും.

⁷ ഗിലെയാദുദേശം എൻറേതാണ്. മനശ്ശെയും എനിക്കുള്ളത്. എഫ്രയീം എന്റെ പടത്തൊപ്പിയും യെഹൂദാ എന്റെ ചെങ്കോലുമാണ്.

⁸ മോവാബ് എന്റെ ക്ഷാളനപാത്രം, എദോമിന്മേൽ ഞാൻ എന്റെ ചെരുപ്പെറിയും. ഫെലിസ്ത്യദേശത്തിന്റെമേൽ ഞാൻ ജയഘോഷംകൊള്ളും.

⁹ ദൈവമേ, കോട്ട കെട്ടി ഉറപ്പിച്ച നഗരത്തിലേക്ക് എന്നെ ആർ കൊണ്ടുപോകും? എദോമിലേക്ക് ആരെന്നെ നയിക്കും?

¹⁰ ദൈവമേ, അവിടുന്നു ഞങ്ങളെ കൈവെടിഞ്ഞിരിക്കുന്നുവോ? അവിടുന്നു ഞങ്ങളുടെ സൈന്യങ്ങളോടുകൂടി വരുന്നില്ലല്ലോ.

¹¹ ശത്രുവിനെ നേരിടുന്നതിനു ഞങ്ങളെ സഹായിക്കണമേ, മനുഷ്യന്റെ സഹായം വ്യർഥമാണല്ലോ.

¹² ദൈവത്തോടൊത്തു ഞങ്ങൾ സുധീരം പോരാടും, അവിടുന്നു ഞങ്ങളുടെ വൈരികളെ ചവിട്ടിമെതിക്കും.