സങ്കീർത്തനങ്ങൾ 58 - സത്യവേദപുസ്തകം C.L. (BSI)

ന്യായം വിധിക്കുന്ന ദൈവം

ഗായകസംഘനേതാവിന്, നശിപ്പിക്കരുതേ എന്ന രാഗത്തിൽ; ദാവീദിന്റെ ഒരു സങ്കീർത്തനം

¹ ശക്തരായ പ്രഭുക്കന്മാരേ, നിങ്ങളുടെ വിധി നീതിനിഷ്ഠമോ? നിങ്ങൾ നീതിപൂർവമാണോ മനുഷ്യരെ വിധിക്കുന്നത്?

² നിങ്ങൾ ഹൃദയത്തിൽ ദുഷ്ടത നിരൂപിക്കുന്നു, നിങ്ങൾ ദേശത്ത് അക്രമങ്ങൾ അഴിച്ചുവിടുന്നു.

³ ദുഷ്ടർ ജനനം മുതലേ വ്യാജം പറയുന്നു. ഉരുവാകുമ്പോൾ മുതൽ അവർ വഴിപിഴയ്‍ക്കുന്നു.

⁴ അവർക്ക് സർപ്പത്തിൻറേതുപോലെ വിഷമുണ്ട്. അണലിയെപ്പോലെ ബധിരരാണവർ.

⁵ പാമ്പാട്ടിയുടെ സ്വരമോ മന്ത്രവാദിയുടെ മന്ത്രമോ അതു കേൾക്കുന്നില്ല.

⁶ ദൈവമേ, അവരുടെ പല്ലു പിഴുതു കളയണമേ, സർവേശ്വരാ, ഈ ക്രൂരസിംഹങ്ങളുടെ പല്ലു തകർത്തുകളയണമേ.

⁷ ഒഴുകിപ്പോകുന്ന വെള്ളംപോലെ അവർ അപ്രത്യക്ഷരാകട്ടെ. ചവിട്ടിമെതിക്കപ്പെട്ട പുല്ലുപോലെ അവർ വാടിപ്പോകട്ടെ.

⁸ അലിഞ്ഞില്ലാതാകുന്ന ഒച്ചുപോലെയാകട്ടെ അവർ. അവർ സൂര്യപ്രകാശം കാണാൻ ഇടവരാത്ത, ചാപിള്ളപോലെ ആയിത്തീരട്ടെ.

⁹ നിങ്ങളുടെ കലം ചൂടാകുന്നതിനു മുമ്പേ ചുള്ളിവിറകുകൾ, പച്ചയും എരിയുന്നതും ഒരുപോലെ അവിടുന്നു വാരിക്കളയും.

¹⁰ ദുഷ്ടനു ലഭിക്കുന്ന ശിക്ഷ കണ്ട് നീതിമാൻ സന്തോഷിക്കും. അവൻ ദുഷ്ടന്മാരുടെ രക്തത്തിൽ കാൽ മുക്കും.

¹¹ “നീതിമാനു പ്രതിഫലം ലഭിക്കും നിശ്ചയം. ഭൂമിയിൽ ന്യായം വിധിക്കുന്ന ഒരു ദൈവം ഉണ്ട് സംശയമില്ല” എന്ന് എല്ലാവരും പറയും.