സങ്കീർത്തനങ്ങൾ 49 - സത്യവേദപുസ്തകം C.L. (BSI)

ധനത്തിന്റെ നശ്വരത

ഗായകസംഘനേതാവിന്; കോരഹ്പുത്രന്മാരുടെ സങ്കീർത്തനം

¹ ജനതകളേ കേൾക്കുവിൻ, ഭൂവാസികളേ ശ്രദ്ധിക്കുവിൻ.

² താണവരും ഉയർന്നവരും ധനികരും ദരിദ്രരും ഒരുപോലെ ചെവികൊടുക്കുവിൻ.

³ ഞാൻ ജ്ഞാനം പ്രഘോഷിക്കും. എന്റെ ഹൃദയവിചാരങ്ങൾ വിവേകം നിറഞ്ഞതായിരിക്കും.

⁴ സുഭാഷിതം ഞാൻ ശ്രദ്ധിക്കും; കിന്നരം മീട്ടിക്കൊണ്ട് എന്റെ കടങ്കഥയുടെ പൊരുൾ ഞാൻ വിവരിക്കും.

⁵ വഞ്ചകരായ ശത്രുക്കൾ എന്നെ വലയം ചെയ്യുന്ന അനർഥകാലത്തു ഞാൻ ഭയപ്പെടുകയില്ല.

⁶ അവർ തങ്ങളുടെ ധനത്തിൽ ആശ്രയിക്കുന്നു. ധനസമൃദ്ധിയിൽ അവർ അഹങ്കരിക്കുന്നു.

⁷ തന്നെത്തന്നെ വീണ്ടെടുക്കാനോ, സ്വജീവന്റെ വില ദൈവത്തിനു കൊടുക്കാനോ, ആർക്കും കഴിയുകയില്ല.

^8-9 എന്നേക്കും ജീവിക്കാനോ, പാതാളം കാണാതിരിക്കാനോ ആർക്കും കഴിയുകയില്ല. മനുഷ്യന്റെ വീണ്ടെടുപ്പുവില അത്ര വലുതാണ്. എത്ര കൊടുത്താലും അതു മതിയാകയില്ല.

¹⁰ മടയനും മൂഢനും മാത്രമല്ല ജ്ഞാനിയും മരിക്കുമെന്നും; തങ്ങളുടെ സമ്പത്ത് അവർ മറ്റുള്ളവർക്കായി ഉപേക്ഷിച്ചുപോകുന്നു എന്നും അവർ കാണും.

¹¹ ദേശങ്ങൾ സ്വന്തപേരിലാക്കിയാലും ശവക്കുഴിയാണ് അവരുടെ നിത്യവസതി. തലമുറകളോളം അവരുടെ വാസസ്ഥലം

¹² മനുഷ്യനു പ്രതാപൈശ്വര്യത്തിൽ നിലനില്‌ക്കാൻ കഴിയുകയില്ല. മൃഗങ്ങളെപ്പോലെ അവനും നശിച്ചുപോകും.

¹³ വിവേകശൂന്യമായ ആത്മവിശ്വാസം പുലർത്തുന്നവരുടെ ഗതി ഇതാണ്; ധനത്തിലാശ്രയിക്കുന്നവരുടെ അവസാനം ഇതുതന്നെ.

¹⁴ കൊല്ലാനുള്ള ആടുകളെപ്പോലെ അവർ മരണത്തിനു വിധിക്കപ്പെട്ടവരാണ്. മൃത്യുവാണ് അവരുടെ ഇടയൻ. നീതിമാന്മാർ അവരുടെമേൽ വിജയം നേടും, അവരുടെ രൂപസൗന്ദര്യം ജീർണതയടയും. പാതാളമായിരിക്കും അവരുടെ പാർപ്പിടം.

¹⁵ എന്നാൽ ദൈവം എന്നെ പാതാളത്തിൽ നിന്നു വീണ്ടെടുക്കും; അവിടുന്നെന്നെ സ്വീകരിക്കും.

¹⁶ ഒരുവൻ സമ്പന്നനായാലും അവന്റെ ഭവനത്തിന്റെ മഹത്ത്വം വർധിച്ചാലും നീ അസ്വസ്ഥനാകരുത്.

¹⁷ അവൻ മരിക്കുമ്പോൾ യാതൊന്നും കൊണ്ടുപോകയില്ല. അവന്റെ മഹത്ത്വം അവനെ പിന്തുടരുകയില്ല.

¹⁸ ഐഹിക ജീവിതകാലത്തു താൻ ഭാഗ്യവാനാണെന്നു ഒരുവൻ കരുതിയാലും അവന്റെ ഐശ്വര്യത്തിൽ അന്യർ പ്രശംസിച്ചാലും;

¹⁹ അവൻ മരിച്ചു തന്റെ പിതാക്കന്മാരോടു ചേരും. അവൻ എന്നും അന്ധകാരത്തിൽ വസിക്കും.

²⁰ മനുഷ്യനു തന്റെ പ്രതാപത്തിലും ധനത്തിലും നിലനില്‌ക്കാൻ കഴിയുകയില്ല. മൃഗങ്ങളെപ്പോലെ അവൻ നശിച്ചുപോകും.