സങ്കീർത്തനങ്ങൾ 48 - സത്യവേദപുസ്തകം C.L. (BSI)

സീയോൻ-ദൈവത്തിന്റെ നഗരം

ഒരു ഗാനം; കോരഹ്പുത്രന്മാരുടെ ഒരു സങ്കീർത്തനം.

¹ സർവേശ്വരൻ വലിയവനാണ്, നമ്മുടെ ദൈവത്തിന്റെ നഗരത്തിൽ അവിടുന്ന് അത്യന്തം സ്തുത്യനുമാണ്.

² ഉയർന്ന മനോഹരമായ അവിടുത്തെ വിശുദ്ധഗിരി, സർവലോകത്തിനും സന്തോഷം പകരുന്നു. അത്യുത്തരഗിരിയായ സീയോൻ മഹാരാജാവിന്റെ നഗരമാണ്.

³ അതിന്റെ കോട്ടകൾക്കുള്ളിൽ, ദൈവം ഇളകാത്ത രക്ഷാസങ്കേതമായി വെളിപ്പെട്ടിരിക്കുന്നു.

⁴ ഇതാ, രാജാക്കന്മാർ ഒരുമിച്ചുകൂടി, നഗരത്തെ ആക്രമിക്കാൻ വന്നു.

⁵ അവർ സീയോനെ കണ്ട് അമ്പരന്നു. അവർ പരിഭ്രാന്തരായി ഓടിപ്പോയി.

⁶ അവർ ഭയവിഹ്വലരായി, ഈറ്റുനോവിനൊത്ത വേദന അവർക്കുണ്ടായി.

⁷ കിഴക്കൻകാറ്റിൽപ്പെട്ട് ആടിയുലയുന്ന തർശീശ് കപ്പലുകളിലെ നാവികരെപ്പോലെ അവർ ഭയന്നുവിറച്ചു.

⁸ സർവശക്തനായ ദൈവത്തിന്റെ നഗരത്തിൽ, നമ്മുടെ ദൈവം എന്നെന്നേക്കുമായി സ്ഥാപിച്ച സ്വന്ത നഗരത്തിൽതന്നെ, സംഭവിച്ചതായി കേട്ട കാര്യങ്ങളെല്ലാം ഇപ്പോൾ നാം നേരിൽ കണ്ടിരിക്കുന്നു.

⁹ ദൈവമേ, അവിടുത്തെ ആലയത്തിൽവച്ച്, അങ്ങയുടെ ശാശ്വതസ്നേഹത്തെ ഞങ്ങൾ ധ്യാനിച്ചു.

¹⁰ ദൈവമേ, അവിടുത്തെ കീർത്തിക്കൊത്ത്, അവിടുത്തെ സ്തുതികളും ഭൂമിയുടെ അതിർത്തിയോളം എത്തുന്നു. അവിടുത്തെ വലങ്കൈ വിജയം നിറഞ്ഞതാണ്.

¹¹ അവിടുത്തെ ന്യായവിധികൾ മൂലം സീയോനിലെ ജനം സന്തോഷിക്കട്ടെ. അങ്ങയുടെ വിധികൾ നിമിത്തം യെഹൂദാ നിവാസികൾ ആനന്ദിക്കട്ടെ.

¹² ദൈവജനമേ, സീയോനു ചുറ്റും നടന്ന് അതിന്റെ ഗോപുരങ്ങളെ എണ്ണുക.

^13-14 അതിന്റെ കോട്ടകളും കൊത്തളങ്ങളും പരിശോധിക്കുക. “ഈ ദൈവം എന്നേക്കും നമ്മുടെ ദൈവം, അവിടുന്നു നമ്മെ എന്നും വഴിനടത്തും” എന്നു വരുംതലമുറയോടു പറയാൻ വേണ്ടിയാണിത്.