സങ്കീർത്തനങ്ങൾ 38 - സത്യവേദപുസ്തകം C.L. (BSI)

പീഡിതന്റെ പ്രാർഥന

ദാവീദിന്റെ സങ്കീർത്തനം; അനുസ്മരണ യാഗത്തിന്

¹ സർവേശ്വരാ, കോപത്തോടെ എന്നെ ശാസിക്കരുതേ; രോഷത്തോടെ എന്നെ ശിക്ഷിക്കരുതേ.

² അവിടുത്തെ അസ്ത്രങ്ങൾ എന്നിൽ തറച്ചിരിക്കുന്നു; അവിടുത്തെ കരം എന്റെമേൽ പതിച്ചിരിക്കുന്നു.

³ അവിടുത്തെ രോഷം നിമിത്തം എനിക്കു സൗഖ്യമില്ല; എന്റെ പാപംമൂലം എനിക്കു സ്വസ്ഥതയുമില്ല.

⁴ എന്റെ അകൃത്യങ്ങൾ എന്റെ തലയ്‍ക്കു മുകളിൽ കൂമ്പാരം കൂടുന്നു; അവ താങ്ങാനാവാത്ത ഭാരമായിരിക്കുന്നു.

⁵ എന്റെ ഭോഷത്തംമൂലം എന്റെ വ്രണങ്ങൾ ചീഞ്ഞുനാറുന്നു.

⁶ ഞാൻ കൂനി നിലംതൊടുമാറായി ഞാൻ എപ്പോഴും വിലപിക്കുന്നു.

⁷ എന്റെ ശരീരം ജ്വരംകൊണ്ടു പൊള്ളുന്നു എനിക്കൊട്ടും സൗഖ്യമില്ല.

⁸ ഞാൻ ആകെ ക്ഷീണിച്ചു തളർന്നിരിക്കുന്നു. ഹൃദയവ്യഥ നിമിത്തം ഞാൻ ഞരങ്ങുന്നു.

⁹ സർവേശ്വരാ, എന്റെ ആഗ്രഹങ്ങൾ അവിടുന്നറിയുന്നു. എന്റെ നെടുവീർപ്പ് അവിടുന്നു കേൾക്കുന്നു.

¹⁰ എന്റെ നെഞ്ചിടിക്കുന്നു, എന്റെ ശക്തി ക്ഷയിച്ചിരിക്കുന്നു. എന്റെ കണ്ണുകളുടെ ശോഭ നഷ്ടപ്പെട്ടിരിക്കുന്നു.

¹¹ എന്റെ സുഹൃത്തുക്കളും അയൽക്കാരും; എന്റെ മഹാരോഗം നിമിത്തം എന്നിൽനിന്ന് അകന്നു നില്‌ക്കുന്നു. ഉറ്റവർപോലും അകന്നുമാറുന്നു.

¹² എന്നെ അപായപ്പെടുത്താൻ നോക്കുന്നവർ എനിക്കായി കെണി വയ്‍ക്കുന്നു. എന്നെ ഉപദ്രവിക്കാൻ ആഗ്രഹിക്കുന്നവർ; എന്റെ നാശത്തെപ്പറ്റി സംസാരിക്കുന്നു. അവർ നിരന്തരം എനിക്കെതിരെ വഞ്ചന നിരൂപിക്കുന്നു.

¹³ ഞാൻ ബധിരനെപ്പോലെ ഒന്നും കേൾക്കാതിരുന്നു; ഊമനെപ്പോലെ സംസാരിക്കാതിരുന്നു.

¹⁴ അതേ, ബധിരനെപ്പോലെ മറുപടി പറയാതിരുന്നു.

¹⁵ സർവേശ്വരാ, ഞാൻ അങ്ങയിൽ പ്രത്യാശവച്ചിരിക്കുന്നു; എന്റെ ദൈവമായ സർവേശ്വരാ, അവിടുന്ന് എനിക്ക് ഉത്തരമരുളുമല്ലോ.

¹⁶ എന്റെ കാൽ വഴുതുമ്പോൾ എനിക്കെതിരെ വീമ്പിളക്കുന്നവർ എന്നെച്ചൊല്ലി സന്തോഷിക്കാൻ ഇടയാക്കരുതേ.

¹⁷ ഞാൻ വീഴാറായിരിക്കുന്നു, വേദന എന്നെ വിട്ടുമാറുന്നില്ല.

¹⁸ എന്റെ അകൃത്യങ്ങൾ ഞാൻ ഏറ്റുപറയുന്നു; എന്റെ പാപത്തെക്കുറിച്ചു ഞാൻ ദുഃഖിക്കുന്നു.

¹⁹ അകാരണമായി എന്നെ ദ്വേഷിക്കുന്നവർ ശക്തരും കാരണം കൂടാതെ എന്നോടു ശത്രുത കാട്ടുന്നവർ അനവധിയുമാണ്.

²⁰ നന്മയ്‍ക്കു പകരം അവർ എന്നോടു തിന്മ പ്രവർത്തിക്കുന്നു. ഞാൻ നന്മ ചെയ്യുന്നതുകൊണ്ടാണ് അവർ എന്റെ വിരോധികളായത്.

²¹ സർവേശ്വരാ, എന്നെ കൈവിടരുതേ, എന്റെ ദൈവമേ, എന്നെ വിട്ട് അകന്നുപോകരുതേ.

²² എന്റെ രക്ഷകനായ സർവേശ്വരാ, എന്നെ സഹായിക്കാൻ വേഗം വരണമേ.