സങ്കീർത്തനങ്ങൾ 35 - സത്യവേദപുസ്തകം C.L. (BSI)

പീഡിതന്റെ പ്രാർഥന

ദാവീദിന്റെ ഒരു സങ്കീർത്തനം

¹ സർവേശ്വരാ, എന്നെ എതിർക്കുന്നവരെ അവിടുന്ന് എതിർക്കണമേ; എന്നോടു പൊരുതുന്നവരോടു പൊരുതണമേ.

² കവചവും പരിചയും ധരിച്ച് എന്നെ സഹായിക്കാൻ വരണമേ.

³ എന്നെ പിന്തുടരുന്നവരെ കുന്തംകൊണ്ടു തടയണമേ; ‘ഞാൻ നിന്റെ രക്ഷ’ എന്ന് എനിക്ക് ഉറപ്പു തരണമേ.

⁴ എന്നെ അപായപ്പെടുത്താൻ ശ്രമിക്കുന്നവർ; പരാജിതരും ലജ്ജിതരുമായിരിക്കട്ടെ. എനിക്കെതിരെ ദ്രോഹപദ്ധതി ആവിഷ്കരിക്കുന്നവർ; പരിഭ്രാന്തരായി പിന്തിരിയട്ടെ.

⁵ അവർ കാറ്റിൽ പാറുന്ന പതിരുപോലെയാകട്ടെ; സർവേശ്വരന്റെ ദൂതൻ അവരെ ഓടിക്കട്ടെ.

⁶ അവരുടെ വഴി ഇരുളടഞ്ഞതും വഴുവഴുപ്പുള്ളതുമാകട്ടെ. സർവേശ്വരന്റെ ദൂതൻ അവരെ പിന്തുടർന്നു ചെല്ലട്ടെ.

⁷ അകാരണമായി അവർ എനിക്കുവേണ്ടി കെണി ഒരുക്കി; കാരണം കൂടാതെ അവർ എന്നെ പിടിക്കാൻ കുഴി കുഴിച്ചു.

⁸ നിനച്ചിരിക്കാത്ത സമയത്ത് അവർക്കു വിനാശം ഭവിക്കട്ടെ. അവർ ഒളിച്ചുവച്ച കെണിയിൽ അവർതന്നെ കുടുങ്ങട്ടെ. അവർ അതിൽ വീണു നശിക്കട്ടെ.

⁹ ഞാൻ സർവേശ്വരനിൽ ആനന്ദിക്കും; അവിടുന്നരുളിയ രക്ഷയിൽ ഉല്ലസിക്കും;

¹⁰ ബലഹീനനെ ശക്തനിൽനിന്നും എളിയവനും ദരിദ്രനുമായവനെ മർദകനിൽനിന്നും രക്ഷിക്കുന്ന അവിടുന്ന് അതുല്യൻ എന്നു ഞാൻ സർവാത്മനാ പറയും.

¹¹ നീചന്മാർ എനിക്കെതിരെ സാക്ഷ്യം പറയുന്നു. ഞാൻ അറിയാത്ത കാര്യങ്ങൾ അവർ എന്നോടു ചോദിക്കുന്നു.

¹² അവർ നന്മയ്‍ക്കു പകരം തിന്മയാണ് എന്നോടു പ്രവർത്തിക്കുന്നത്. ഞാൻ നിസ്സഹായനായിരിക്കുന്നു.

¹³ എന്നാൽ ഞാനാകട്ടെ അവർ രോഗികളായിരുന്നപ്പോൾ വിലാപവസ്ത്രം ധരിച്ചു. ഞാൻ ഉപവസിച്ച് ആത്മതപനം ചെയ്തു. ഞാൻ കുമ്പിട്ടു പ്രാർഥിച്ചു.

¹⁴ സ്വന്തം സഹോദരനെയോ സ്നേഹിതനെയോ ഓർത്തു ദുഃഖിക്കുന്നവനെപ്പോലെ ഞാൻ പ്രാർഥിച്ചു. അമ്മയെ ഓർത്തു വിലപിക്കുന്നവനെപ്പോലെ; ഞാൻ തല കുനിച്ചു കരഞ്ഞുകൊണ്ടു നടന്നു.

¹⁵ എന്നാൽ എന്റെ അനർഥത്തിൽ അവർ ഒരുമിച്ചുകൂടി സന്തോഷിച്ചു. അവർ എനിക്കെതിരെ ഒത്തുചേർന്നു. എനിക്ക് അപരിചിതരായ അധമന്മാർ ഇടവിടാതെ എന്നെ ദുഷിച്ചു.

¹⁶ അവർ എന്നെ അതിനിന്ദ്യമായി പരിഹസിച്ച് എന്റെ നേരേ പല്ലു കടിക്കുന്നു.

¹⁷ സർവേശ്വരാ, അങ്ങ് എത്രകാലം ഇതു നോക്കിനില്‌ക്കും? അവരുടെ ആക്രമണങ്ങളിൽനിന്ന് എന്നെ രക്ഷിക്കണമേ. ഈ സിംഹങ്ങളിൽനിന്ന് എന്നെ വിടുവിക്കണമേ.

¹⁸ അപ്പോൾ അങ്ങയെ ആരാധിക്കുന്നവരുടെ മഹാസഭയിൽ; ഞാൻ അങ്ങേക്കു സ്തോത്രം അർപ്പിക്കും. സമൂഹമധ്യേ ഞാൻ അങ്ങയെ പ്രകീർത്തിക്കും.

¹⁹ അകാരണമായി എന്നെ ദ്വേഷിച്ചവർ; എന്നെക്കുറിച്ചു സന്തോഷിക്കാൻ ഇടയാക്കരുതേ. കാരണം കൂടാതെ എന്നെ വെറുക്കുന്നവർ എന്നെ പരിഹസിക്കരുതേ.

²⁰ അവർക്കു സമാധാനം ആവശ്യമില്ല; ശാന്തരായി കഴിയുന്നവർക്കെതിരെ അവർ വഞ്ചന നിരൂപിക്കും.

²¹ ‘ആഹാ, നീ ചെയ്തതു ഞങ്ങൾ കണ്ടല്ലോ,’ എന്നവർ പരിഹാസത്തോടെ വിളിച്ചുകൂകും.

²² എന്നാൽ സർവേശ്വരാ, അവിടുന്നെല്ലാം കാണുന്നുവല്ലോ. അങ്ങു മൗനമായിരിക്കരുതേ; നാഥാ, എന്നിൽനിന്ന് അകന്നിരിക്കരുതേ!

²³ എന്റെ ദൈവമായ സർവേശ്വരാ, ഉണർന്നെഴുന്നേല്‌ക്കണമേ; എനിക്കു നീതിയും ന്യായവും നടത്തിത്തരണമേ,

²⁴ അവിടുന്നു നീതിമാനാണല്ലോ, എനിക്കു നീതി നടത്തിത്തന്നാലും; അവർ എന്നെക്കുറിച്ചു സന്തോഷിക്കാൻ ഇടയാക്കരുതേ.

²⁵ ‘ഞങ്ങൾ ആഗ്രഹിച്ചതു നടന്നല്ലോ; ഞങ്ങൾ അവന്റെ ഉന്മൂലനാശം വരുത്തിയല്ലോ’ എന്ന് അവർ പറയാതിരിക്കട്ടെ.

²⁶ എന്റെ അനർഥത്തിൽ സന്തോഷിക്കുന്നവർ ലജ്ജിച്ചു ഭ്രമിക്കട്ടെ. എനിക്കെതിരെ വീമ്പിളക്കിയവർ, ലജ്ജിതരും അപമാനിതരും ആകട്ടെ.

²⁷ എനിക്കു നീതി ലഭിക്കാൻ ആഗ്രഹിച്ചവർ ആർപ്പുവിളിച്ച് ആഹ്ലാദിക്കട്ടെ. ‘അവിടുത്തെ ദാസന്റെ ശ്രേയസ്സിൽ സന്തോഷിക്കുന്ന സർവേശ്വരൻ എത്ര വലിയവൻ’ എന്ന് അവർ എപ്പോഴും പറയട്ടെ.

²⁸ അവിടുത്തെ നീതിയും സ്തുതിയും ഞാൻ രാപ്പകൽ ഘോഷിക്കും.