സങ്കീർത്തനങ്ങൾ 29 - സത്യവേദപുസ്തകം C.L. (BSI)

സർവേശ്വരന്റെ സ്വരം

ദാവീദിന്റെ ഒരു സങ്കീർത്തനം

¹ സ്വർഗശക്തികളേ, സർവേശ്വരനെ മഹത്ത്വപ്പെടുത്തുവിൻ, അവിടുത്തെ മഹത്ത്വവും ശക്തിയും പ്രഘോഷിക്കുവിൻ;

² സർവേശ്വരന്റെ നാമം മഹിമയേറിയത് എന്ന് ഉദ്ഘോഷിക്കുവിൻ; വിശുദ്ധവസ്ത്രാലങ്കാരത്തോടെ അവിടുത്തെ ആരാധിക്കുവിൻ.

³ സർവേശ്വരന്റെ ശബ്ദം സമുദ്രങ്ങളുടെ മീതെ മുഴങ്ങുന്നു; മഹത്ത്വത്തിന്റെ ദൈവമായ സർവേശ്വരൻ പെരുവെള്ളത്തിൻ മീതെ ഇടി മുഴക്കുന്നു.

⁴ അവിടുത്തെ ശബ്ദം ശക്തിയോടും ഗാംഭീര്യത്തോടും മുഴങ്ങുന്നു.

⁵ അതു ദേവദാരുക്കളെ തകർക്കുന്നു; ലെബാനോനിലെ കരുത്തുറ്റ ദേവദാരുക്കളെപ്പോലും തകർക്കുന്നു.

⁶ അവിടുന്നു ലെബാനോൻ പർവതത്തെ വിറപ്പിക്കുന്നു, അതു കാളക്കുട്ടിയെപ്പോലെയും ഹെർമ്മോൻമല കാട്ടുപോത്തിൻ കുട്ടിയെപ്പോലെയും ഇളകിച്ചാടുന്നു.

⁷ സർവേശ്വരന്റെ ശബ്ദം മിന്നൽപ്പിണരുകൾ ഉളവാക്കുന്നു.

⁸ അവിടുത്തെ ശബ്ദം മരുഭൂമിയെ വിറപ്പിക്കുന്നു; അവിടുന്നു കാദേശ് മരുഭൂമിയെ പ്രകമ്പനം കൊള്ളിക്കുന്നു.

⁹ സർവേശ്വരന്റെ ശബ്ദം മാൻപേടകളെ പ്രസവിക്കുമാറാക്കുന്നു; വനവൃക്ഷങ്ങളുടെ ഇലകൾ പൊഴിക്കുന്നു. അവിടുത്തെ ആലയത്തിൽ എല്ലാവരും ദൈവത്തിനു മഹത്ത്വം എന്നു ഘോഷിക്കുന്നു.

¹⁰ സർവേശ്വരൻ ജലവിതാനത്തിൽ സിംഹാസനസ്ഥനായിരിക്കുന്നു; അവിടുന്നു രാജാവായി എന്നേക്കും വാഴുന്നു.

¹¹ സർവേശ്വരൻ തന്റെ ജനത്തെ ബലപ്പെടുത്തുന്നു; അവിടുന്ന് അവരെ സമാധാനം നല്‌കി അനുഗ്രഹിക്കുന്നു.